രാജ്യത്ത് സമാധാനം അനുഭവപ്പെടുന്നില്ലെന്ന് ടോക്ക് ഷോയ്ക്കിടെ നടന്‍ സഞ്ജയ് ദത്ത് നടത്തിയ പ്രസ്താവന വന്‍ വിവാദങ്ങള്‍ക്ക് ഇടയാക്കിയിരുന്നു. ശേഖര്‍ സുമന്‍ അവതരിപ്പിക്കുന്ന 'ശേഖര്‍ ടുനൈറ്റ്' എന്ന പരിപാടിയിലായിരുന്നു താരത്തിന്റെ ഈ പരാമര്‍ശം.
എന്നാല്‍, ഈ വിഷയത്തില്‍ വ്യക്തത വരുത്തിക്കൊണ്ട് സഞ്ജയ് ദത്ത് തന്നെ ഇപ്പോള്‍ രംഗത്തെത്തിയിട്ടുണ്ട്. താന്‍ നടത്തിയ പരാമര്‍ശങ്ങള്‍
ഷോയുടെ ഭാഗമായി മുന്‍കൂട്ടി തയ്യാറാക്കിയ തിരക്കഥയുടെ ഭാഗം മാത്രമായിരുന്നുവെന്ന് സഞ്ജയ് ദത്ത് തന്റെ വിഡിയോ സന്ദേശത്തിലും എക്‌സിലും കുറിച്ചു.ഇവ തന്റെ വ്യക്തിപരമായ അഭിപ്രായങ്ങളോ വികാരങ്ങളോ അല്ലെന്നും ആരുടെയും വികാരങ്ങളെ വ്രണപ്പെടുത്താന്‍ താന്‍ ഉദ്ദേശിച്ചിട്ടില്ലെന്നും അദ്ദേഹം കൂട്ടിച്ചേര്‍ത്തു.
താന്‍ വേഷമിട്ട മുന്നാ ഭായ് സിനിമകളിലെ 'ഗാന്ധിഗിരി' പോലെ സ്‌നേഹവും സാഹോദര്യവും പങ്കുവെക്കാനാണ് താന്‍ ശ്രമിച്ചതെന്നും ടെലിവിഷന്‍ പ്രകടനത്തെ ആ രീതിയില്‍ മാത്രം കാണണമെന്നും താരം അഭ്യര്‍ത്ഥിച്ചു.
"എല്ലാവർക്കും നമസ്കാരം. അടുത്തിടെ, ശേഖർ സുമന്റെ ഷോയിൽ ഞാൻ പറഞ്ഞ ചില കാര്യങ്ങളുമായി ബന്ധപ്പെട്ട് സോഷ്യൽ മീഡിയയിലെ പലരും എന്നെ ബന്ധപ്പെട്ടിരുന്നു. എന്റെ പരാമർശങ്ങളിൽ ചിലർ അത്ഭുതം പ്രകടിപ്പിച്ചപ്പോൾ, മറ്റു പലരും ഞാൻ പറഞ്ഞതിനോട് ശക്തമായി വിയോജിച്ചു. അവരുടെ വികാരങ്ങൾ എനിക്ക് പൂർണമായും മനസ്സിലാകുന്നു,
ഇതിനെക്കുറിച്ച് ഒരു കാര്യം വ്യക്തമാക്കാൻ ഞാൻ ആഗ്രഹിക്കുന്നു. ഷോയിൽ ഞാൻ പറഞ്ഞതെല്ലാം ഒരു സ്ക്രിപ്റ്റ് ചെയ്ത സെഗ്മെന്റിന്റെ ഭാഗമായിരുന്നു. ഒരു സ്ക്രിപ്റ്റിന് അനുസരിച്ചാണ് ഞങ്ങൾ അഭിനയിച്ചത്. അവ ഒരിക്കലും എന്റെ വ്യക്തിപരമായ കാഴ്ചപ്പാടുകളോ ചിന്തകളോ വികാരങ്ങളോ അല്ല. എല്ലാവരുടേയും വിശ്വാസത്തെയും സ്നേഹത്തെയും ഞാൻ അഗാധമായി വിലമതിക്കുന്നു.
ഒരു സ്ക്രിപ്റ്റ് ചെയ്ത പ്രകടനത്തിന്റെ പേരിൽ എന്റെ യഥാർത്ഥ കാഴ്ചപ്പാടുകളെക്കുറിച്ച് തെറ്റിധാരണകളൊന്നും ഉണ്ടാകാൻ ഞാൻ ഒരിക്കലും ആഗ്രഹിക്കുന്നില്ല. ഈ വിഷയം മുഴുവൻ ശരിയായ പശ്ചാത്തലത്തിൽ ഇത് വ്യക്തമാക്കുമെന്ന് ഞാൻ കരുതുന്നു".- സഞ്ജയ് ദത്ത് പറഞ്ഞു.
ശേഖർ ടുനൈറ്റ് ഷോയിലെ രാഷ്ട്രീയ ആക്ഷേപഹാസ്യ സെഗ്‌മെന്റിനിടെ സഞ്ജയ് ദത്ത് പറഞ്ഞ കാര്യങ്ങളാണ് വിവാദമായത്. ഇന്ത്യയിലെ ജനങ്ങൾ വളരെ സ്നേഹമുള്ളവരാണെന്നും എന്നാൽ മുൻപുണ്ടായിരുന്ന സമാധാനം രാജ്യത്ത് ഇപ്പോൾ അനുഭവപ്പെടുന്നില്ലെന്നുമായിരുന്നു സഞ്ജയ് ദത്ത് അഭിപ്രായപ്പെട്ടത്.ഇന്ത്യക്കാർ വിശാലമനസ്കരും ആതിഥ്യമര്യാദയുള്ളവരുമാണെന്നും ആ പഴയ നല്ല നാളുകൾ തിരിച്ചെത്താൻ താൻ ഭഗവാനോട് പ്രാർത്ഥിക്കുന്നുവെന്നും അദ്ദേഹം കൂട്ടിച്ചേർത്തു.
Comments