വീണ്ടും ശുദ്ധീകരണ വിവാദം; പ്രതിഷേധത്തിനു പിന്നാലെ ഗ്യാനേഷ് കുമാറിന്റെ തറവാട് ഗംഗാജലം തളിച്ച് ശുദ്ധീകരിച്ചു!

ആഗ്ര: വിവാദമാകാൻ വീണ്ടുമൊരു ശുദ്ധീകരണ ചടങ്ങ്! തിരഞ്ഞെടുപ്പ് കമ്മീഷന്റെ പ്രവർത്തനത്തിലും വോട്ടർ പട്ടികയുടെ പ്രത്യേക തീവ്ര പരിഷ്കരണത്തിലും (എസ്‌ഐ‌ആർ) പ്രതിഷേധിച്ച് കോൺഗ്രസ് പ്രവർത്തകർ വീടിന് മുന്നിൽ ധർണ നടത്തി ദിവസങ്ങൾക്ക് ശേഷം, ചൊവ്വാഴ്ച ആഗ്രയിലെ ചീഫ് ഇലക്ഷൻ കമ്മീഷണർ ജ്ഞാനേഷ് കുമാറിന്റെ തറവാട് വസതിയിൽ ഒരു മതപരമായ ശുദ്ധീകരണ ചടങ്ങ് നടന്നു.

അഖില ഭാരതീയ മാഥുർ വൈശ്യ മഹാസഭയുടെ നേതൃത്വത്തിൽ, ഒരു കൂട്ടം സ്ത്രീകൾ വിജയ് നഗർ കോളനിയിലെ രാധാകൃഷ്ണ ക്ഷേത്രത്തിൽ നിന്ന് കലശയാത്ര നടത്തി. ശംഖനാദത്തിന്റെയും ക്ഷേത്രമണികളുടെയും അകമ്പടിയോടെ എത്തിയ സംഘം, കുമാറിന്റെ തറവാട്ടു വീടിന്റെ പ്രധാന കവാടം ഉൾപ്പെടെ വീടിന് അകത്തും പുറത്തും ഗംഗാജലം തളിച്ചു. ഗ്യാനേഷ് കുമാറിന്റെ മാതാപിതാക്കളായ സത്യവതി, സുബോധ് കുമാർ ഗുപ്ത എന്നിവരും സമുദായത്തിലെ നിരവധി അംഗങ്ങളും പ്രദേശവാസികളും ചടങ്ങിൽ പങ്കെടുത്തു.

തന്റെ മകൻ രാജ്യത്തെ സേവിക്കുകയാണെന്നും തറവാട്ട് വീടിന് മുന്നിൽ പ്രതിഷേധം സംഘടിപ്പിക്കാനുള്ള തീരുമാനത്തെ കുമാറിന്റെ പിതാവ് ചോദ്യം ചെയ്യുകയും ചെയ്തു. ഈ പ്രതിഷേധം കുടുംബത്തിന്റെ പ്രതിച്ഛായയെ ബാധിച്ചുവെന്നും, ജനങ്ങൾക്കിടയിലുള്ള തെറ്റിദ്ധാരണ മാറ്റാനാണ് ശുദ്ധീകരണ ചടങ്ങ് നടത്തിയതെന്നും അദ്ദേഹം പറഞ്ഞു.

സംസ്ഥാന സെക്രട്ടറി അനിൽ യാദവ്, മഥുര ജില്ലാ പ്രസിഡന്റ് മുകേഷ് ധൻഗർ എന്നിവരുൾപ്പെടെയുള്ള കോൺഗ്രസ് പ്രവർത്തകർ സെപ്റ്റംബർ 28-ലെ പ്രതിഷേധത്തിൽ പങ്കെടുത്തിരുന്നു. തുടർന്ന് പോലീസ് ഗുരുതരമായ വകുപ്പുകൾ ചുമത്തി കേസ് രജിസ്റ്റർ ചെയ്യുകയും പ്രതികളെ അറസ്റ്റ് ചെയ്യുകയും ചെയ്തു. പിന്നീട് കോടതി ഉത്തരവിനെ തുടർന്ന് ഇവരെ ജാമ്യത്തിൽ വിട്ടയച്ചു.

നേരത്തെ, ഉത്തരാഖണ്ഡിലെ ഹൽദ്വാനി രാംലീല മൈതാനത്ത് കോൺഗ്രസ് അധ്യക്ഷൻ മല്ലികാർജുൻ ഖാർഗെ പങ്കെടുത്ത റാലിക്ക് ശേഷം, ചില സംഘടനകൾ ആ വേദിയിൽ 'ഗംഗാജലം തളിച്ച് ശുദ്ധീകരണം നടത്തിയത് വൻ വിവാദമായിരുന്നു. ഖർഗെ ദളിത് സമുദായക്കാരനായതുകൊണ്ടാണ് വേദി ശുദ്ധീകരിച്ചതെന്നും ഇത് ജാതീയ അയിത്തവും വിവേചനവുമാണെന്നുമാണ് കോൺഗ്രസ് ആരോപിച്ചത്.