ആകാശവാണിഭവന്‍ പ്രതിഷേധം: രാഹുലിനെതിരേ കേസെടുക്കും ; എംപിമാരോട് ഡല്‍ഹിയില്‍ തുടരാന്‍ ഖാര്‍ഗേയുടെ നിര്‍ദേശം
ന്യൂഡല്‍ഹി: ആകാശവാണിഭവന്‍ പ്രതിഷേധത്തില്‍ രാഹുല്‍ഗാന്ധിക്കെതിരേ കേസ് എടുക്കും. പൊതുസുരക്ഷയെ മുന്‍നിര്‍ത്തിയാണ് കേസ് എടുക്കുന്നതെന്നാണ് പോലീസ് പറയുന്നത്. എം.പി. മാരുടെ മാര്‍ച്ച് മുന്‍കൂര്‍ അനുമതി വാങ്ങാതെയാണെന്നും 260 പേരെ കസ്റ്റഡിയില്‍ എടുത്തു വിട്ടയച്ചതായും പോലീസ് പറയുന്നു. രാഹുലിനെയും മറ്റ് നേതാക്കളെയും കസ്റ്റഡിയില്‍ എടുത്തത് സുരക്ഷാ നടപടിയുടെ ഭാഗമാണെന്നാണ് പോലീസിന്റെ ന്യായീകരണം.
അതേസമയം ഇന്നും പ്രതിഷേധം തുടരാനാണ് കോണ്‍ഗ്രസിന്റെ നീക്കം. നരേന്ദ്രമോദി ഭരണത്തില്‍ 25 വര്‍ഷം തികയ്ക്കുന്ന ദിവസം ഡല്‍ഹിയില്‍ തെരഞ്ഞെടുപ്പ് കമ്മീഷനെതിരേ നടത്തിവരുന്ന പ്രതിഷേധം ശക്തമാക്കാനാണ് ഒരുങ്ങുന്നത്. എംപിമാരോട് ഡല്‍ഹിയില്‍ തന്നെ തുടരാന്‍ കോണ്‍ഗ്രസ് അദ്ധ്യക്ഷന്‍ മല്ലികാര്‍ജ്ജുന ഖാര്‍ഗേ നിര്‍ദേശം നല്‍കിയിരിക്കുകയാണ്. 150 എംപിമാരാണ് ഇന്ത്യാ സഖ്യത്തിന്റെ തെരഞ്ഞെടുപ്പ് കമ്മീഷന്‍ ഓഫീസ് മാര്‍ച്ചിനായി രാവിലെ എത്തുക. കൂടിയാലോചിച്ച ശേഷം സമരരീതി തീരുമാനിക്കും.
മോദി ഭരണത്തില്‍ 25 വര്‍ഷം പൂര്‍ത്തിയാക്കുന്ന പശ്ചാത്തലത്തില്‍ ബിജെപി വന്‍ പരിപാടികള്‍ തലസ്ഥാനത്ത് പദ്ധതിയിട്ടിരിക്കെയാണ് കോണ്‍ഗ്രസിന്റെ നീക്കം. ഇന്നലെ മുതല്‍ കോണ്‍ഗ്രസ് ആരംഭിച്ചിരിക്കുന്ന പ്രതിഷേധത്തില്‍ രാഹുല്‍ഗാന്ധിയടക്കമുള്ള നേതാക്കള്‍ ഇന്നലെ തെരഞ്ഞെടുപ്പ് കമ്മീഷന്റെ ഔദ്യോഗികവസതിക്ക് മുന്നില്‍ എത്തിയിരുന്നു. തുടര്‍ന്ന് പോലീസ് ഇവരെ നീക്കം ചെയ്യുകയുമുണ്ടായി. അറസ്റ്റ ചെയ്ത നേതാക്കളെ പിന്നീട് വിട്ടയച്ചെങ്കിലും നേതാക്കളെ ശാരീരികമായി ഉപദ്രവിച്ചെന്നാണ് കോണ്‍ഗ്രസിന്റെ ആരോപണം.
അതേസമയം ഇന്നത്തെ സമരത്തിലും ആംആദ്മിപാര്‍ട്ടിയും ഡിഎംകെ യും പങ്കെടുക്കുന്നില്ല. ഇരു പാര്‍ട്ടികളും ഇന്നലെ കോണ്‍ഗ്രസ് നടത്തിയ സമരത്തില്‍ അതൃപ്തി പ്രകടിപ്പിച്ചിരുന്നു. കോണ്‍ഗ്രസ് നേതാക്കള്‍ അകാശവാണിക്കുള്ളില്‍ നടത്തിയ കുത്തിയിരിപ്പു സമരം ഇന്‍ഡ്യാസഖ്യത്തിലെ മറ്റു കക്ഷികളുമായി കൂടിയാലോചന നടത്താതെയാണ് ചെയ്തത് എന്നാണ് ആംആദ്മിപാര്‍ട്ടിയുടെ ആക്ഷേപം. ഇന്നലെ കോണ്‍ഗ്രസിനൊപ്പം പ്രതിഷേധത്തിന് ഇറങ്ങാതിരുന്ന ആപ്പ് നേരത്തേ തങ്ങളുടേതായ നിലയില്‍ തനിച്ച് പ്രതിഷേധം നടത്തുകയും ചെയ്തിരുന്നു.
അതേസമയം ഇന്നും സമരം തുടരാന്‍ ഇരിക്കുന്ന കോണ്‍ഗ്രസ് ഇന്‍ഡ്യാ സഖ്യത്തിലെ മറ്റു കക്ഷികളോടും ഈക്കാര്യത്തില്‍ പിന്തുണ തേടുകയും ഡല്‍ഹിയില്‍ തുടരാന്‍ അഭ്യര്‍ത്ഥിക്കുകയും ചെയ്തിട്ടുണ്ട്. അതേസമയം ഡല്‍ഹി ആകാശവാണി പരിസരത്തെ പ്രതിഷേധത്തില്‍ രാഹുല്‍ഗാന്ധി ഉള്‍പ്പെടെ ഉള്ളവര്‍ക്കെതിരെ കേസെടുത്തേക്കും. പൊലീസ് അറസ്റ്റ് ചെയ്ത രാഹുല്‍ ഗാന്ധി ഉള്‍പ്പെടെയുള്ള നേതാക്കളെ രണ്ടു മണിക്കൂര്‍ നീണ്ട കസ്റ്റഡിക്ക് ശേഷം വിട്ടയച്ചിരുന്നു.
Comments