ഗായകന്‍ എം.ജി. ശ്രീകുമാറിനൊപ്പമുള്ള ചിത്രം സോഷ്യല്‍ മീഡിയയില്‍ പങ്കുവെച്ച് നടന്‍ മനോജ് കെ ജയന്‍. എം.ജി. ശ്രീകുമാറിനെ ചേട്ടന്‍ എന്ന് അഭിസംബോധന ചെയ്തുകൊണ്ടുള്ള മനോജ് കെ. ജയന്റെ കുറിപ്പും ഇരുവരുടെയും സന്തോഷം നിറഞ്ഞ ചിത്രവും നിമിഷങ്ങള്‍ക്കകം ആരാധകര്‍ ഏറ്റെടുത്തു.
'' Dear chetta നമ്മുടെ ഈ ഫോട്ടോയ്ക്ക് minimum ഒരു ''പയിനായിരം'' Likes എങ്കിലും കിട്ടുമെന്ന് എനിക്ക് തോന്നുന്നു'', എന്ന രസകരമായ അടിക്കുറിപ്പോടെയാണ് മനോജ് കെ ജയന്‍ ചിത്രം പങ്കുവെച്ചത്. നിരവധി ആരാധകരാണ് ചിത്രങ്ങള്‍ക്ക് ലൈക്കും കമന്റുമായി എത്തുന്നത്. അഭിനയത്തിനു പുറമെ ഗായകനായും ശ്രദ്ധ നേടിയ താരമാണ് മനോജ് കെ ജയന്‍.
1988-ല്‍ ദൂരദര്‍ശനില്‍ സംപ്രേക്ഷണം ചെയ്ത കുമിളകള്‍ എന്ന പരമ്പരയിലൂടെയായിരുന്നു മനോജ് കെ ജയന്റെ അരങ്ങേറ്റം. 1987ല്‍ റിലീസായ എന്റെ സോണിയ ആയിരുന്നു ആദ്യ സിനിമ. 1992ല്‍ പുറത്തിറങ്ങിയ സര്‍ഗ്ഗത്തിലെ കുട്ടന്‍ തമ്പുരാന്‍ എന്ന കഥാപാത്രത്തിലൂടെയാണ് മനോജ് ശ്രദ്ധേയനാവുന്നത്. പെരുന്തച്ചന്‍, ചമയം, വെങ്കലം, അനന്തഭദ്രം, പഴശ്ശിരാജ തുടങ്ങി നിരവധി സിനിമകളില്‍ അദ്ദേഹം ശ്രദ്ധേയമായ കഥാപാത്രങ്ങളെ അവതരിപ്പിച്ചു. മലയാളത്തിന് പുറമെ തമിഴ്, തെലുങ്ക്, കന്നട, ഹിന്ദി സിനിമകളിലും താരം അഭിനയിച്ചിട്ടുണ്ട്.
Comments