മുംബൈ: അപ്രതീക്ഷിതമായിട്ടാണ് ഇന്ത്യന്‍ വനിതാടീമിന്റെ നായികാ സ്ഥാനത്ത് നിന്നും ഹര്‍മന്‍പ്രീത് കൗര്‍ പടിയിറങ്ങിയത്. ആരാധകരെ മുഴുവന്‍ അമ്പരപ്പിച്ച തീരുമാനത്തിന് ശേഷം ടീമിനെ നയിക്കാനുള്ള ചുമതല വന്നുചേര്‍ന്നത് സൂപ്പര്‍താരം സ്മൃതി മന്ഥാനയ്ക്കാണ്. ഏതെങ്കിലും ഫോര്‍മാറ്റിലെങ്കിലും ടീമിനെ നയിക്കാന്‍ ബിസിസിഐ ആവശ്യപ്പെട്ടിട്ട് പോലും ഹര്‍മ്മന്‍പ്രീത് സമ്മതിച്ചില്ലെന്നാണ് വിവരം.
ക്യാപ്റ്റന്‍ സ്ഥാനം സംബന്ധിച്ച കാര്യത്തില്‍ ഇരുവരും രസത്തില്‍ അല്ലായിരുന്നെന്നാണ് വിവരം. മുമ്പ് നല്ല സൗഹൃദത്തിലായിരുന്ന ഹര്‍മന്‍പ്രീതും മന്ഥാനയും തമ്മില്‍ ക്യാപ്റ്റന്‍സിയുടെ പേരില്‍ അടുത്തിടെ പ്രശ്‌നങ്ങള്‍ ഉടലെടുത്തിരുന്നു. 2013-ല്‍ അന്താരാഷ്ട്ര ക്രിക്കറ്റില്‍ അരങ്ങേറിയ സ്മൃതി എല്ലാ ഫോര്‍മാറ്റിലുമായി 10,000-ത്തിലധികം റണ്‍സ് നേടിയ താരമാണ്. കളിയിലെ മികവുകൊണ്ട് എപ്പോഴും മറ്റുള്ളവരേക്കാള്‍ ഏറെ മുന്നിലാണ് മന്ഥാന.
ഹര്‍മ്മന്‍പ്രീതിന് കീഴില്‍ ലോകകപ്പ് ഉള്‍പ്പെടെയുള്ള ഏകദിന വിജയങ്ങള്‍ക്കിടയിലും ടി20 ലോകകപ്പുകളില്‍ ഇന്ത്യ തുടര്‍ച്ചയായി ആദ്യ ഘട്ടത്തില്‍ തന്നെ പുറത്തായത് ഏറ്റവും ചെറിയ ഫോര്‍മാറ്റിലെ നേതൃത്വത്തെ ചോദ്യം ചെയ്യുന്നതായിരുന്നു.
കഴിഞ്ഞ വര്‍ഷം നാട്ടില്‍ നടന്ന ഏകദിന ലോകകപ്പ് ജയത്തിലൂടെ ഇന്ത്യ തങ്ങളുടെ ഐസിസി ട്രോഫി വരള്‍ച്ച അവസാനിപ്പിച്ചതിന് ശേഷവും ക്യാപ്റ്റന്‍സി കാര്യത്തില്‍ സെലക്ടര്‍മാര്‍ പഴയ നിലപാട് തന്നെ തുടര്‍ന്നതില്‍ മന്ഥാനയ്ക്ക് അതൃപ്തിയുണ്ടായിരുന്നു. അടുത്തിടെ നല്‍കിയ ഒരു അഭിമുഖത്തില്‍ ഇന്ത്യയെ നയിക്കാന്‍ താന്‍ തയ്യാറാണെന്ന് അവര്‍ വ്യക്തമാക്കിയിരുന്നു.
ജപ്പാനില്‍ നടന്ന ഏഷ്യന്‍ ഗെയിംസില്‍ ഇന്ത്യയെ തുടര്‍ച്ചയായ രണ്ടാം സ്വര്‍ണ്ണത്തിലേക്ക് നയിച്ച ഹര്‍മന്‍പ്രീത്, ബിസിസിഐയുമായുള്ള അവലോകന യോഗത്തിന് ശേഷമാണ് ക്യാപ്റ്റന്‍സി സ്ഥാനത്തുനിന്ന് ഒഴിയാന്‍ തീരുമാനിച്ചത്. അടുത്തിടെ ഗുവാഹത്തിയില്‍ ബിസിസിഐ സെക്രട്ടറി ദേവജിത് സൈകിയയുടെ അധ്യക്ഷതയില്‍ ചേര്‍ന്ന അവലോകന യോഗത്തില്‍ നേതൃമാറ്റം അനിവാര്യമാണെന്ന് ബിസിസിഐ ഹര്‍മന്‍പ്രീതിനെ ബോധ്യപ്പെടുത്തുകയും തുടര്‍ന്ന് അവര്‍ സ്വയം ഈ തീരുമാനം എടുക്കുകയുമായിരുന്നു.
Comments