രണ്ട് പതിറ്റാണ്ടിലേറെയായി മലയാള സിനിമയ്ക്കൊപ്പം ചലിക്കുന്ന താരമാണ് സുരേഷ് കൃഷ്ണ. കരിയറിന്റെ ഭൂരിഭാഗവും വില്ലന്‍ വേഷങ്ങളാണ് ചെയ്ത ശേഷം കോമഡിയിലും ക്യാരക്ടര്‍ റോളിലുമെല്ലാം ചെയ്ത് കൈയടി നേടിയ താരം കൂടിയാണ് സുരേഷ് കൃഷ്ണ. വില്ലനിസത്തില്‍ തുടങ്ങിയെങ്കിലും കോമഡിയിലാണ് താരമിപ്പോള്‍ തിളങ്ങുന്നത്. ‘കണ്‍വിന്‍സിംഗ് സ്റ്റാര്‍’ എന്നൊരു വിളിപ്പേരു കൂടി സുരേഷ് കൃഷ്ണയ്ക്ക് സോഷ്യല്‍ മീഡിയ നല്‍കിയിട്ടുണ്ട്.
ഇപ്പോഴിതാ കാലങ്ങളായി തമിഴ് പ്രേക്ഷകർക്കിടയിൽ നിലനിന്നിരുന്ന ഒരു കൺഫ്യൂഷന് ഒടുവിൽ ഫുൾ സ്റ്റോപ്പിടുകയാണ് സുരേഷ് കൃഷ്ണ. തന്റെ പഴയ തമിഴ് ചിത്രം ‘പൊട്ടു അമ്മൻ’ലെ ഫോട്ടോ ഇൻസ്റ്റാഗ്രാമിൽ പങ്കുവെച്ചുകൊണ്ടാണ് പ്രേക്ഷകരെ ഏറെ നാളായി കുഴക്കിയിരുന്ന ആ സംശയത്തിന് താരം മറുപടി നൽകിയത്. 2000ൽ അഭിനയിച്ച ‘പൊട്ടുഅമ്മൻ’ എന്ന തമിഴ് സിനിമയിൽ വില്ലനായി എത്തിയത് സുരേഷ് കൃഷ്ണയായിരുന്നു. പൊട്ടു അമ്മനിലെ വില്ലനും ‘ബെത്ലഹേമിലെ’ ബൈജുവും ഒരാൾ തന്നെയാണ് എന്ന വ്യക്തത വരുത്തി, വ്യത്യസ്ത കാലഘട്ടങ്ങളിലെ ഈ രണ്ട് കഥാപാത്രങ്ങളെയും അവതരിപ്പിച്ചത് ഒരാൾ തന്നെയാണെന്ന് സുരേഷ് കൃഷ്ണ കുറിച്ചത്.
‘‘രണ്ടും ഞാൻ തന്നെയാ ...
തമിഴ് നൻപർകളേ, ഇതു രണ്ടുമേ നാന്‍ താന്‍, എന്ത സന്ദേഹവും വേണ്ടാം...
പൊട്ടു അമ്മൻ സിനിമ, ബത്‌ലഹേം കുടുംബ യൂണിറ്റ്...’’ എന്ന ക്യാപ്ഷന്‍ നല്‍കിയാണ് സുരേഷ് കൃഷ്ണ ചിത്രങ്ങള്‍ പങ്കിട്ടിരിക്കുന്നത്. തമിഴ് ചിത്രത്തിൽ ഒരു മന്ത്രവാദി ഗെറ്റപ്പിലാണ് സുരേഷ് കൃഷ്ണ എത്തിയത്. നിരവധി ആരാധകരാണ് ഈ പോസ്റ്റിനു താഴെ രസകരമായ കമന്റുകള്‍ കുറിക്കുന്നത്. ‘അണ്ണനും ഉണ്ടായിരുന്നു ഒരു കഴിഞ്ഞ കാലം, പണ്ടൊക്കെ ഗുണ്ടകൾ ആയിരുന്നവർ ഇപ്പോൾ സമാധാനത്തിന്റെ പാതയിൽ ആണ്...,അങ്ങനെ തമിഴ് പ്രേക്ഷകരെയും കൺവിൻസ് ആക്കി...’ എന്നതടക്കമാണ് മലയാളികളുടെ കമന്റുകള്‍. ‘90-കളിലെ കുട്ടികൾ നിങ്ങളെ ഒരിക്കലും മറക്കില്ല; ഞങ്ങളുടെ കുട്ടിക്കാലത്തെ ഏറ്റവും ഭയപ്പെടുത്തുന്ന വ്യക്തിയായിരുന്നു നിങ്ങൾ...’ എന്ന് കുറിക്കുന്ന തമിഴ് പ്രേക്ഷകരും കമന്റ് ബോക്സിലുണ്ട്.
Comments