ആഭരണ ബ്രാൻഡായ ‘ജിവ’ യുടെ രക്ഷാബന്ധന്‍ പരസ്യത്തിലാണ് ‘ബ്രാലെറ്റ്’ ശൈലിയിലുള്ള ചോളി ധരിച്ച് കൃതി സനോണ്‍ എത്തിയത്. കഴിഞ്ഞ രക്ഷാബന്ധൻ സമയത്താണ് ഇൻഡോ-വെസ്റ്റേൺ വസ്ത്രം ധരിച്ച്, സഹോദരനും വളർത്തുനായയ്ക്കും രാഖി കെട്ടിക്കൊടുത്ത് ആഘോഷിക്കുന്ന പരസ്യം പ്രേക്ഷകര്‍ക്ക് മുന്നിലെത്തിയത്. ഓഫ്-വൈറ്റ് നിറത്തിലുള്ള ബ്രാലെറ്റ്-സ്റ്റൈൽ ബ്ലൗസും ഡ്രേപ്പ് ചെയ്ത സ്‌കർട്ടും കേപ്പും ധരിച്ചാണ് കൃതി രക്ഷാബന്ധൻ ആഘോഷിക്കുന്നത് പരസ്യത്തിൽ കാണുന്നത്. പരമ്പരാഗത ആഘോഷത്തിന് ആധുനികമായ ഒരു ഭാവം നൽകാനാണ് ക്യാമ്പെയ്ൻ ലക്ഷ്യമിട്ടതെങ്കിലും, ഈ അവസരത്തിന് ആ വസ്ത്രം അനുയോജ്യമാണോ എന്ന് ചിലർ ചോദ്യം ചെയ്തു. ഈ വസ്ത്രം വലിയ വിവാദങ്ങൾക്ക് വഴിവെക്കുകയും പ്രൈം-ടൈം ടെലിവിഷൻ ചർച്ചകളിൽ ഇടംപിടിക്കുകയും ചെയ്തിരുന്നു.
ഇപ്പോഴിതാ ‘രക്ഷാബന്ധൻ’ പരസ്യത്തിലെ വസ്ത്രധാരണത്തെച്ചൊല്ലി തനിക്കെതിരെ ഉയർന്ന വിമർശനങ്ങളോട് ആദ്യമായി പ്രതികരിക്കുകയാണ് കൃതി സനോണ്‍. വിവാദങ്ങൾക്ക് വഴിവെച്ച രക്ഷാബന്ധൻ പരസ്യത്തെക്കുറിച്ചും അതിനെ തുടർന്നുണ്ടായ മാധ്യമ ചർച്ചകളെക്കുറിച്ചും കരീന കപൂർ ഖാന്റെ ‘വാട്ട് വിമൻ വാണ്ട്’ സീസൺ 6 ലാണ് കൃതി മനസ്സു തുറന്നത്. തന്റെ വസ്ത്രധാരണം ഇത്രയധികം ശ്രദ്ധിക്കപ്പെടുമെന്ന് ഒരിക്കലും കരുതിയിരുന്നില്ലെന്നും ഈ വിഷയം പ്രൈം-ടൈം ചാനൽ ചർച്ചകളിൽ വിഷയമായതിൽ അത്ഭുതം തോന്നിയെന്നും കൃതി പറഞ്ഞു.
‘‘പ്രൈം-ടൈം വാർത്തകളിൽ ആറുപേരടങ്ങുന്ന പാനൽ ചർച്ചയിൽ എന്റെ ചോളി ഒരു വിഷയമായത് എനിക്ക് വിശ്വസിക്കാനായില്ല...’’ എന്നാണ് കൃതി കരീനയോട് പറഞ്ഞത്. അതിന് മറുപടിയായി, കരീന ‘എനിക്കറിയാം...’ എന്നാണ് പറഞ്ഞത്. ‘‘ആരും നമ്മളെ വിലയിരുത്താതിരിക്കുക, ആളുകൾ അവരവരുടെ കാര്യങ്ങൾ മാത്രം നോക്കുക...’’ എന്നാണ് സ്ത്രീകൾ യഥാർത്ഥത്തിൽ എന്താണ് ആഗ്രഹിക്കുന്നത് എന്നുള്ളതിന് കൃതി പറഞ്ഞ മറുപടി. മാസങ്ങൾക്ക് ശേഷമാണ് കൃതി സനോണ്‍ ഇതിനെക്കുറിച്ച് ആദ്യമായി സംസാരിച്ചത്.
ആഘോഷങ്ങളുടെ കാതൽ അവയുമായി ബന്ധപ്പെട്ട വികാരങ്ങളിലും പാരമ്പര്യങ്ങളിലുമാണെന്നും, ഒരാൾ എന്ത് വസ്ത്രം ധരിക്കുന്നു എന്നതിലല്ലെന്നും ചൂണ്ടിക്കാട്ടി കൃതി പിന്നീട് ഇൻസ്റ്റാഗ്രാമിൽ വിമർശനങ്ങളോട് പ്രതികരിച്ചിരുന്നു.
‘‘ആഘോഷങ്ങളുടെ കാതൽ നിങ്ങൾ ധരിക്കുന്ന വസ്ത്രത്തിലല്ല, മറിച്ച് പാരമ്പര്യങ്ങളോടുള്ള വികാരത്തിലും അർത്ഥത്തിലുമാണ്. രക്ഷാബന്ധൻ എന്നത് സംരക്ഷണത്തിന്റെ ഒരു ബന്ധമാണ്. ഞാനും എന്റെ സഹോദരിയും പരസ്പരം രാഖി കെട്ടാറുണ്ട്. ഒരു സഹോദരന് കഴിയുന്നതുപോലെ തന്നെ പരസ്പരം സംരക്ഷിക്കാൻ ഞങ്ങൾക്ക് കഴിയുമെന്ന് ഞങ്ങൾക്കറിയാം. ഞങ്ങൾ പരസ്പരം ആരോഗ്യത്തിനും സന്തോഷത്തിനും ദീർഘായുസ്സിനും വേണ്ടി പ്രാർത്ഥിക്കുന്നു. ഞങ്ങളെ സംബന്ധിച്ചിടത്തോളം, ഈ പ്രാർത്ഥനയും വാഗ്ദാനവും ഞങ്ങളുടെ വളർത്തുനായകൾക്കും ബാധകമാണ്! കാരണം, അവരും കുടുംബാംഗങ്ങളാണ്...
കൂടാതെ, സ്ത്രീകൾ എന്ത് ധരിക്കണമെന്ന് പറയുന്നത് നമ്മൾ എപ്പോഴാണ് അവസാനിപ്പിക്കുക? കാലക്രമേണ വസ്ത്രധാരണരീതികളിൽ മാറ്റങ്ങൾ വന്നിട്ടുണ്ട്, എന്നിട്ടും ഒരു സ്ത്രീക്ക് അവളുടെ സംസ്കാരത്തോടുള്ള ആദരവ് അളക്കുന്നത് അവളുടെ വസ്ത്രം നോക്കിയാണ്!! സംസ്കാരവും പാരമ്പര്യവും അവളുടെ ഹൃദയത്തിലാണ്, വസ്ത്രത്തിന്റെ നെക്ലൈനിലല്ല...’’ എന്നാണ് കൃതി കുറിച്ചത്.
ആഘോഷത്തിന്റെ ഭാഗമായി ഒരു നായയെയും പരസ്യത്തിൽ ഉൾപ്പെടുത്തിയിരുന്നു. ഒരു രംഗത്ത്, നായ കുരച്ചുകൊണ്ട് ഫ്രെയിമിലേക്ക് വരുന്നതും തുടർന്ന് താരം അതിന് രാഖി കെട്ടിക്കൊടുക്കുന്നതും കാണാം. ഈ ആശയം കാഴ്ചക്കാർക്ക് അത്ര ഇഷ്ടപ്പെട്ടില്ല. വിവാദത്തെത്തുടർന്ന് പരസ്യം പിൻവലിച്ചു. ഈ പരസ്യം സോഷ്യൽ മീഡിയയിൽ ഉടൻ തന്നെ വിമർശനങ്ങൾക്ക് വഴിവെച്ചു.
പരസ്യം പിൻവലിച്ചതിനെക്കുറിച്ച് ജ്വല്ലറി ബ്രാൻഡ് പ്രസ്താവന ഇറക്കുകയും തങ്ങൾ നടിക്കൊപ്പം ഉറച്ചുനിൽക്കുന്നുവെന്ന് വ്യക്തമാക്കുകയും ചെയ്തു. പ്രചാരണത്തിന്റെ സന്ദേശത്തിൽ മാറ്റമില്ലെന്നും, ജീവനക്കാരുടെയും സ്റ്റോറുകളുടെയും സുരക്ഷ മുൻനിർത്തിയാണ് പ്രധാനമായും ഈ തീരുമാനമെടുത്തതെന്നും സ്ഥാപകൻ വ്യക്തമാക്കിയിരുന്നു.
‘‘കൃതിയുമായുള്ള ഞങ്ങളുടെ രക്ഷാബന്ധൻ പ്രചാരണത്തെക്കുറിച്ചുള്ള ചർച്ചകളും, പ്രത്യേകിച്ച് പ്രചാരണത്തിനോ അതിനു പിന്നിലെ സന്ദേശത്തിനോ ഞങ്ങൾ പിന്തുണ നൽകിയില്ലെന്ന ധാരണയും ഞാൻ ശ്രദ്ധിക്കുന്നുണ്ട്. എനിക്ക് വ്യക്തമായി ഒന്ന് പറയണം. പ്രചാരണത്തിന് പിന്നിലുള്ള ഉദ്ദേശ്യത്തിലുള്ള ഞങ്ങളുടെ വിശ്വാസത്തിന് മാറ്റമൊന്നുമില്ല...’’ എന്നാണ് ബ്രാൻഡ് സ്ഥാപകനായ ഇഷേന്ദ്ര അഗർവാൾ കുറിച്ചത്.
കരിയറില്‍, ഷാഹിദ് കപൂറിനും രശ്മിക മന്ദാനയ്ക്കുമൊപ്പം അഭിനയിച്ച റൊമാന്റിക് കോമഡി-ഡ്രാമ ചിത്രമായ ‘കോക്ക്‌ടെയിൽ 2’ ലാണ് കൃതി അവസാനമായി പ്രത്യക്ഷപ്പെട്ടത്.
Comments