കണ്ണൂര്‍: മൊബൈല്‍ ഫോണ്‍ വാങ്ങി വെച്ചതിന്റെ പേരില്‍ വീടുവിട്ട പെരിങ്ങത്തൂര്‍ സ്വദേശി ശിവസൂര്യയ്ക്കായി തെരഞ്ഞ് പോലീസ്. ആഗസ്റ്റില്‍ വീടുവിട്ടിറങ്ങിപ്പോയ 17 കാരന്റെ തിരോധാനം സംബന്ധിച്ച അന്വേഷണത്തില്‍ ക്രൈംബ്രാഞ്ച് തുമ്പുണ്ടാക്കുമെന്ന പ്രതീക്ഷയിലാണ് കുടുംബം. പയ്യനെ കാണാതായിട്ട് 60 ദിവസം തികഞ്ഞിട്ടും ഇരുട്ടില്‍ തപ്പുകയാണ്. കേരളത്തില്‍ ഉടനീളവും അയല്‍ സംസ്ഥാനങ്ങളിലും തീര്‍ത്ഥാടന കേന്ദ്രങ്ങളിലും വരെ തെരച്ചില്‍ നടത്തിയിട്ട് ഒരു സിസിടിവി ദൃശ്യം പോലും ഇതുവരെ കണ്ടെത്താന്‍ ആയിട്ടില്ല.
ഓഗസ്റ്റ് 8 ന് വീടുവിട്ട ശിവസൂര്യയെ കാണാതായിട്ട് രണ്ടു മാസം തികഞ്ഞു. കാശിയിലേക്ക് പോകുന്നുവെന്നും അവിടെയെത്തി ദൈവത്തില്‍ അലിയും എന്ന് കുറിപ്പ് എഴുതി വച്ച ശേഷമാണ് ശിവസൂര്യയെ കാണാതായത്. ആദ്യം കേസ് അന്വേഷിച്ച ചൊക്ലി പൊലീസും പ്രത്യേക സംഘവും കേരളത്തി ലുടനീളം പരിശോധന നടത്തിയെങ്കിലും ഗുണമുണ്ടായില്ല. അന്വേഷണം ക്രൈംബ്രാഞ്ച് ഏറ്റെടുക്കുമെന്ന് ആഭ്യന്തരമന്ത്രി രമേശ് ചെന്നിത്തല ഉറപ്പ് നല്‍കിയിരുന്നു. ക്രൈംബ്രാഞ്ച് അന്വേഷണം ഉടന്‍ ഉണ്ടാകുമെന്ന പ്രതീക്ഷയിലാണ് കുടുംബം.
കേരളത്തിന് പുറത്ത് ബെംഗളൂരു, മൈസൂരു, മംഗളൂരു എന്നിവിടങ്ങളിലും കാശിയിലും വാരണാസിയിലും പോലീസ് അന്വേഷണം നടത്തിയിരുന്നു. എന്നാല്‍ ശിവസൂര്യയെക്കുറിച്ച് യാതൊരു സൂചനയും കിട്ടിയിരുന്നില്ല. ശിവസൂര്യക്ക് ഒളിവില്‍ കഴിയാന്‍ മറ്റാരുടേയോ സഹായം കിട്ടുന്നുണ്ടെന്ന സംശയം പൊലീസിനും വീട്ടുകാര്‍ക്കുമുണ്ട്. മൊബൈല്‍ ഗെയിം ആസക്തി കൂടിയതോടെയാണ് ശിവസൂര്യയെ മൊബൈല്‍ ഉപയോഗിക്കുന്നതില്‍ നിന്നും വീട്ടുകാര്‍ തടഞ്ഞത്. ആദ്യം വിനോദത്തിനായി ഗെയിം കളിച്ചിരുന്ന കുട്ടി പിന്നീട് പണംവെച്ചുള്ള കളിയിലേക്ക തിരിയുകയായിരുന്നു. ബന്ധുക്കളില്‍ നിന്നു വരെ കടംവാങ്ങിച്ച് കളിയായതോടെയാണ് പിതാവ് ജിഗേഷ് മൊബൈല്‍ വാങ്ങിവെച്ചത്.
ആഗസ്റ്റ് രണ്ടാം തിയതി ഞായറാഴ്ചയാണ് അച്ഛന്‍ ജിഗേഷ് ഫോണ്‍ വാങ്ങിവെയ്ക്കുന്നത്. ഓഗസ്റ്റ് 2 നായിരുന്നു മൊബൈല്‍ഫോണ്‍ വാങ്ങിവെച്ചത്. ഒരാഴ്ചയ്ക്ക് ശേഷം, ആഗസ്റ്റ് 8 ശനിയാഴ്ച വീട്ടില്‍ സഹോദരിയും താനും മാത്രമുള്ളപ്പോഴാണ് ശിവസൂര്യയെ കാണാതായത്. പിതാവ് പുറത്തുപോയിരുന്നു. വീട്ടില്‍ പ്രസവത്തിനായി എത്തിയ അച്ഛന്റെ സഹോദരിയെയും കൊണ്ട് മുത്തശ്ശി ആശുപത്രിയിലും പോയിരുന്നു.
ഉച്ചയോടെ ഭക്ഷണം കഴിക്കുന്നതിനായി വിളിക്കാന്‍ അനിയത്തി ശിവസൂര്യയുടെ മുറിയിലെത്തിയപ്പോള്‍ കട്ടിലില്‍ മൂന്നാല് തലയിണകള്‍ അടുക്കിവെച്ച് പുതപ്പുകൊണ്ട് മൂടിയിട്ടിരുന്നതാണ് കണ്ടത്. സഹോദരനെ കാണാനുമില്ലായിരുന്നു. കളിക്കാന്‍ പോയതായിരിക്കുമെന്ന് വീട്ടുകാര്‍ കരുതി. വൈകിട്ട് നാലര വരെ അവര്‍ കാത്തിട്ടും കാണാതായതോടെയാണ് അന്വേഷിച്ച് തുടങ്ങിയത്.
മുറി പരിശോധിക്കുമ്പോള്‍ പഠനമേശയില്‍ നിന്നും താന്‍ കാശിക്ക് പോകുകയാണെന്നും ഇനിയുള്ള ജീവിതം അവിടെ ജീവിച്ച് ദൈവത്തോട് അലിയും എന്നെഴുതിയ കുറിപ്പും കണ്ടെത്തുകയായിരുന്നു. വീട്ടിലെ അലമാരയില്‍ നിന്നും 3000 രൂപ കാണാനുമില്ലായിരുന്നു. വീട്ടുകാരും നാട്ടുകാരും ചേര്‍ന്നുള്ള തെരച്ചിലില്‍ പ്രദേശത്തുള്ള രണ്ട് പേര്‍ അവനെ കണ്ടതായി വിവരം നല്‍കി. കാണാതായ ദിവസം ഉച്ചയ്ക്ക് 12.30ന് ശേഷം തൊട്ടടുത്ത പൂമരം ജംങ്ഷനിലേക്ക് ശിവസൂര്യ തിടുക്കത്തില്‍ നടന്നുപോകുന്നതായിട്ടാണ് അവര്‍ പറഞ്ഞത്.
തോളത്ത് സ്‌കൂള്‍ ബാഗുമുണ്ടായിരുന്നു. ശിവസൂര്യയെ കാണാതായ എട്ടാം ദിവസം പൊലീസ് നായ വീട്ടിലെത്തി. എന്നാല്‍ വീട്ടില്‍ നിന്നും അധികം ദൂരേയ്ക്ക് പൊലീസ് നായ പോയില്ല. പ്രദേശത്തെ സിസിടിവി ദൃശ്യങ്ങളെല്ലാം അരിച്ചുപെറുക്കിയിട്ടും ഒരു ദൃശ്യവും കിട്ടിയില്ല. ശിവസൂര്യയെ അവസാനം കണ്ട ഭാഗ്യശ്രീയുടെ വീട്ടില്‍ നിന്നും പൂമരം ജംങ്ഷന്‍ വരെ ഏകദേശം 500 മീറ്ററാണ് ദൂരം. ഈ വഴിയില്‍ എവിടെ നിന്നോ അവന്‍ അപ്രത്യക്ഷനായെന്നാണ് കരുതുന്നത്.
പോലീസ് പ്രദേശമാകെ ശിവസൂര്യക്കായി അരിച്ചുപെറുക്കി. കുളങ്ങളും തോടുകളും ഒന്നും വിട്ടില്ല. എന്നാല്‍ ഒരിടത്തും അവനെ കണ്ടെത്താന്‍ അവര്‍ക്ക് കഴിഞ്ഞില്ല. പെരുങ്ങത്തൂരിലുള്ള സിസിടിവി ക്യാമറകളിലും ശിവസൂര്യയുടെ ദൃശ്യമുണ്ടായിരുന്നില്ല. വടകര, നാദാപുരം ഭാഗങ്ങളിലേക്കും അന്വേഷണം വ്യാപിപ്പിച്ചു. ബസ് സ്റ്റാന്‍ഡുകള്‍, റെയില്‍വേ സ്റ്റേഷനുകള്‍ എന്നിങ്ങനെ ശിവസൂര്യ പോകാന്‍ സാധ്യതയുള്ളിടത്തെ സിസിടിവി ദൃശ്യങ്ങളെല്ലാം പരിശോധിച്ചു. പക്ഷേ, ഒരു ഫലവുമുണ്ടായില്ല.
പാലക്കാട് ഒറ്റപ്പാലത്ത് വെച്ച് കുട്ടിയെ കണ്ടുവെന്ന് ഒരു സ്ത്രീയും ബസ് കണ്ടക്ടറും മൊഴി നല്‍കിയിരുന്നു. പൊലീസ് അവിടെയെത്തി സിസിടിവി ക്യാമറകള്‍ പരിശോധിച്ചെങ്കിലും അത് മറ്റൊരു കുട്ടിയാണെന്ന് കണ്ടെത്തി. കൊല്ലം, കാസര്‍കോട്, കോഴിക്കോട് ജില്ലകളില്‍ നിന്നും ശിവസൂര്യയെ കണ്ടതായി ഫോണ്‍ കോളുകള്‍ വന്നു. അമ്പലങ്ങളിലും തീര്‍ഥാടന കേന്ദ്രങ്ങളിലും വരെ പൊലീസ് തിരഞ്ഞു. കാശി കേന്ദ്രീകരിച്ചും പൊലീസ് അന്വേഷണം നടത്തി. വാരണാസിയിലെ മലയാളി ഗ്രൂപ്പുകള്‍ക്ക് ഫോട്ടോ അയച്ചു കൊടുത്ത് ആ വഴിയും അന്വേഷണം നടന്നു.
Comments