തമിഴകത്തിന്റെ പ്രിയതാരം സൂര്യ തെന്നിന്ത്യ കണ്ട മികച്ച നടന്മാരില്‍ ഒരാളാണ്. ഒരുകാലത്ത് ബോക്സോഫീസ് ഹിറ്റുകളുടെ ഒരു തരംഗം തന്നെയായിരുന്നു സൂര്യയുടെ സിനിമകള്‍. എന്നാല്‍ ഒരുകാലത്ത് കൈപ്പിടിയിലൊതുക്കിയ ബോക്‌സ് ഓഫീസ് പവര്‍ തിരികെ പിടിക്കാനാകാതെ നില്‍ക്കുകയാണ് താരം. മികച്ച സംവിധായകര്‍ക്കൊപ്പം വന്‍ ഹൈപ്പിലെത്തിയ സൂര്യയുടെ പല സിനിമകളും പ്രതീക്ഷയ്ക്കൊത്ത് ഉയരുന്നതേയില്ല. അക്കൂട്ടത്തില്‍ ഒന്നായി മാറിയതാണ് കാർത്തിക് സുബ്ബരാജ് സംവിധാനം ചെയ്ത് സൂര്യ നായകനായി എത്തിയ റെട്രോയും ബോക്സോഫീസില്‍ വന്‍ തിരിച്ചടി നേരിട്ടിരുന്നു.
ഇപ്പോഴിതാ റെട്രോ ഒരു പൊട്ട സിനിമയാണെന്ന് പറയുകയാണ് നടനും സംവിധായകനുമായ മിഷ്കിൻ. കാർത്തിക് സുബ്ബരാജിന്റെ ഏറ്റവും പുതിയ സിനിമയായ ഡൊറോത്തിയുടെ താങ്ക്സ് മീറ്റിലാണ് മിഷ്കിൻ റെട്രോയെ വിമർശിച്ചത്. ട്രോളുകള്‍ വാരിവിതറി മിഷ്കിന്‍ സംസാരിക്കുന്ന സമയത്ത് സദസിൽ കാർത്തിക്കുമുണ്ടായിരുന്നു. താൻ തിയറ്ററിൽ പോയികണ്ട ആദ്യ കാർത്തിക് സുബ്ബരാജ് ചിത്രമായിരുന്നു റെട്രോയെന്നും എന്നാൽ സിനിമ നിരാശയാണ് സമ്മാനിച്ചതെന്നും മിഷ്കിന്‍ പറഞ്ഞു.
‘‘എനിക്ക് കാർത്തിയെ നേരത്തെ അറിയാമായിരുന്നു. ഈ ചിത്രത്തിന് തൊട്ടുമുമ്പ് അവൻ ചെയ്തൊരു സിനിമയുണ്ട്, സത്യം പറഞ്ഞാൽ അതൊരു മൊക്ക സിനിമ തന്നെയാണ്. ഞാൻ ആ പടം കണ്ടതാണ്. കാർത്തിക്കിനെ നേരത്തെ തന്നെ അറിയാം. ഞാൻ ‘പിശാശ്’ ഒക്കെ ചെയ്യുന്ന സമയത്ത്, ഉച്ചയ്ക്ക് ഒരു മണിക്ക് ഞാൻ തിയറ്റർ വിസിറ്റിന് എത്തുമെന്ന് അറിഞ്ഞ് കാർത്തിക് രാവിലെയും ആ പടം കണ്ടു, ഉച്ചയ്ക്കും കണ്ടു, വൈകുന്നേരവും കണ്ട് അവിടെത്തന്നെ നിൽക്കുകയാണ്! ഞാൻ അകത്തേക്ക് കയറുമ്പോഴാണ് കാർത്തിക് വന്നിട്ടുണ്ടെന്ന് എന്നോട് പറയുന്നത്. ഉടനെ ഞാൻ ഓടിച്ചെന്ന് അവനെ കെട്ടിപ്പിടിച്ചു, അവൻ അപ്പോഴും അവിടെത്തന്നെ നിൽക്കുകയാണ്.
അന്ന് അവനെ കണ്ടപ്പോൾ തന്നെ എനിക്ക് മനസ്സിലായതാണ്, ‘ഇവൻ എല്ലാവരെയും വെട്ടിച്ച് മുന്നേറും’ എന്ന്. പക്ഷേ ‘റെട്രോ’ മോശം സിനിമയാണ്. അതിൽ കട്ടുകളില്ലാത്ത ഒരു ഡാൻസ് സീക്വൻസ് ഉണ്ട്. എന്തൊരു മോശമായിരുന്നു അത്.
എന്റെ അസിസ്റ്റന്റ് ഡയറക്ടർമാർക്ക് കാർത്തിക് സുബ്ബരാജിന്റെ സിനിമകൾ ഇഷ്ടമാണ്, അവ കാണാൻ അവർ എന്നോട് നിർദ്ദേശിക്കുകയും ചെയ്തിരുന്നു; എന്നാൽ കുറച്ചു കാത്തിരിക്കാനാണ് ഞാൻ അവരോട് പറഞ്ഞത്. എനിക്ക് ധാരാളം പുസ്തകങ്ങൾ വായിക്കാനുള്ളതുകൊണ്ട് ഞാൻ ആ സിനിമകൾ കാണുകതന്നെ ചെയ്യും. വിനോദത്തിനായല്ല ഞാൻ തിയേറ്ററുകളിൽ പോകുന്നത്. ദൈവങ്ങളെ പ്രാർത്ഥിക്കാനാണ് ഞാൻ തിയേറ്ററുകൾ സന്ദർശിക്കുന്നത്. ഡൊറോത്തി കണ്ടുകഴിഞ്ഞപ്പോൾ ശരിക്കും ദൈവത്തെ കുമ്പിട്ട് വണങ്ങി. ഞങ്ങള്‍ തമ്മിൽ നല്ല അടുപ്പമാണ്...’’ മിഷ്കിന്‍ പറഞ്ഞു. ശകാരത്തിനൊപ്പം പ്രശംസയും നിറഞ്ഞ മിഷ്കിന്റെ ഈ മാസ് പ്രസംഗം കാര്‍ത്തിക് സുബ്ബരാജ് അടക്കമുള്ള ചലച്ചിത്ര പ്രവർത്തകർ ചിരിയോടെയാണ് സ്വീകരിച്ചത്. വളച്ചുകെട്ടുകളില്ലാത്ത ‘റെട്രോ’യെക്കുറിച്ച് പരിഹസിച്ചും വിമര്‍ശിച്ചും മിഷ്കിന്‍ സംസാരിച്ചത് സോഷ്യല്‍ മീഡിയയില്‍ തരംഗമായിരിക്കുകയാണ്. അതിനെ കാർത്തിക് ഏറ്റെടുത്ത രീതിയെയും ആരാധകർ പ്രശംസിക്കുന്നുണ്ട്.
Comments