ന്യൂഡൽഹി: മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാർ രാജിവെക്കണം എന്ന് ആവശ്യപ്പെട്ട് ഇന്ത്യ മുന്നണി നടത്തുന്ന പ്രതിഷേധം മൂന്നാം ദിവസവും രാജ്യതലസ്ഥാനത്തെ സമരകലുഷിതമാക്കുന്നു. രാജ്ഘട്ടിലേക്കുള്ള പ്രതിഷേധ മാർച്ചിനിടെ രാഹുൽ ഗാന്ധി ഭരണ നേതൃത്വത്തെയും ആർഎസ്‌എസിനെയും രൂക്ഷമായി വിമർശിച്ചു. "കഴിഞ്ഞ രണ്ട് ദിവസമായി മുന്നൂറോളം എം.പിമാർ സമാധാനപരമായി പ്രതിഷേധിക്കാൻ ശ്രമിക്കുകയാണ്, എന്നാൽ ഞങ്ങളെ അതിന് അനുവദിക്കുന്നില്ല. പ്രധാനമന്ത്രിയും അമിത് ഷായും മോഹൻ ഭഗവതും ഗ്യാനേഷ് കുമാറും ക്രിമിനൽ ഗൂഢാലോചനയിലൂടെ രാജ്യത്തെ ഹൈജാക്ക് ചെയ്തിരിക്കുകയാണ്, അവരെ നിയമത്തിന് മുന്നിൽ വിചാരണ ചെയ്യുക തന്നെ ചെയ്യും," രാഹുൽ ഗാന്ധി പറഞ്ഞു.
കോൺഗ്രസ് അധ്യക്ഷൻ മല്ലികാർജുൻ ഖാർഗെയും മാർച്ചിനു മുന്നോടിയായി ബിജെപി നേതാക്കളെ രൂക്ഷമായി വിമർശിച്ചിരുന്നു. "ഇന്ത്യാ സഖ്യത്തിലെ അംഗങ്ങളായ ഞങ്ങൾ സമാധാനപരമായ ധർണ്ണാ സമരം നടത്തുന്നതിനായി ഗാന്ധി സ്മാരകത്തിലേക്ക് (രാജ്‌ഘട്ട്) പോകുകയാണ്. ബി.ജെ.പി സർക്കാരിനും, പ്രത്യേകിച്ച് പ്രധാനമന്ത്രി മോദിക്കും കേന്ദ്ര ആഭ്യന്തരമന്ത്രി അമിത് ഷായ്ക്കും തങ്ങളുടെ നിലപാട് രാജ്യ താല്പര്യത്തിന് നിരക്കാത്തതാണെന്ന് തിരിച്ചറിയാനുള്ള വിവേകം ഉണ്ടാകണമേ എന്ന് ഞങ്ങൾ അവിടെയിരുന്ന് പ്രാർത്ഥിക്കും. അത് വോട്ട് മോഷണത്തിന്റെ വിഷയമാകട്ടെ, വർദ്ധിച്ചുവരുന്ന പണപ്പെരുപ്പമാകട്ടെ, യുവാക്കൾ നേരിടുന്ന പ്രശ്നങ്ങളാകട്ടെ, അല്ലെങ്കിൽ അവർ സൃഷ്ടിച്ച മറ്റേതൊരു പ്രതിസന്ധിയാകട്ടെ, എല്ലാം പൊതുതാല്പര്യത്തിന് എതിരാണ്" എന്നായിരുന്നു ഖാർഗെ പറഞ്ഞത്.
പ്രതിഷേധത്തിന്റെ മൂന്നാം ദിനമായ വ്യാഴാഴ്ച മോയറ്റ്സ് ഹോട്ടലിൽ ഉച്ചഭക്ഷണത്തിനു ശേഷമായിരുന്നു ഇന്ത്യ സഖ്യ നേതാക്കൾ രാജ്ഘട്ടിലേക്ക് ബസ് മാർഗം യാത്ര തുടങ്ങിയത്. രാജ്ഘട്ടിൽ സമാധാനപരമായ പ്രതിഷേധത്തിന് ഇന്ത്യ മുന്നണി അനുവാദം തേടിയിരുന്നെങ്കിലും ലഭിച്ചില്ല. ഹോട്ടലിനു മുന്നിലടക്കം ഡൽഹി പൊലീസും കേന്ദ്ര സേനയും കഴിഞ്ഞ ദിവസത്തെപ്പോലെതന്നെ ശക്തമായ ബന്തവസ്സാണൊരുക്കിയിരിക്കുന്നത്.
Comments