നടനും സംവിധായകനുമായ ഭാഗ്യരാജിനെ അനുസ്മരിക്കുന്ന ചടങ്ങില്‍ അദ്ദേഹത്തിന്റെ മകനും നടനുമായ ശന്തനു പറഞ്ഞ വാക്കുകളാണിപ്പോള്‍ ശ്രദ്ധനേടുന്നത്. തന്റെ ഒരു ആഗ്രഹം കാണാതെ ആണ് അച്ഛന്‍ പോയതെന്നും അതില്‍ തനിക്കിപ്പോഴും വിഷമമുണ്ടെന്നും പറയുകയാണ് ശന്തനു.
'അപ്പ, അദ്ദേഹത്തിന്റെ ജീവിതവുമായി ബന്ധപ്പെട്ട കാര്യങ്ങളാണ് തിരക്കഥയില്‍ എഴുതാറുള്ളത്. നമ്മള്‍ എഴുതുന്ന കഥ ഏതെങ്കിലും വിഷയവുമായി ബന്ധപ്പെട്ടിരിക്കണം. ഇല്ലെങ്കില്‍ അതൊരു നല്ല കഥയാകില്ലെന്ന് അദ്ദേഹം എപ്പോഴും പറയുമായിരുന്നു.
അത്രത്തോളം യഥാര്‍ഥ ജീവിതവുമായി അദ്ദേഹം കണക്ട് ചെയ്ത് എഴുതിയതുകൊണ്ട് മാത്രമാണ് അതെല്ലാം പ്രേക്ഷക മനസില്‍ ഇത്രയും കാലമായിട്ടും നിലനില്‍ക്കുന്നത്. സത്യസന്ധമായി പറയുകയാണെ?ങ്കില്‍ ഞാനും അപ്പയും തമ്മിലങ്ങനെ തിരക്കഥയെക്കുറിച്ചൊന്നും സംസാരിക്കാറില്ലായിരുന്നു. കാരണം ഞാന്‍ തുടങ്ങിയത് തന്നെ അഭിനയത്തിലൂടെയാണ്.
മറ്റൊരു കാര്യമോര്‍ത്ത് എനിക്കിപ്പോഴും വിഷമമുണ്ട്. ഒരു മൂന്നോ നാലോ മാസം മുന്‍പ്, ഞാന്‍ പതിയെ പതിയെ എഴുതാന്‍ തുടങ്ങിയിരുന്നു. ഞാന്‍ എഴുതാന്‍ തുടങ്ങി. പക്ഷേ അതെന്റെ അപ്പയ്ക്ക് അറിയില്ല. എന്റെ ആദ്യത്തെ കഥ എഴുതി പൂര്‍ത്തിയാക്കിയ ശേഷം അപ്പയുടെ അടുത്ത് പോയി പറയണമെന്ന് കരുതിയിരിക്കുകയായിരുന്നു ഞാന്‍.
അപ്പ മരിച്ച അന്ന് ഞാന്‍ എഴുത്ത് നിര്‍ത്തിയതാണ്. പിന്നെ ഞാന്‍ എഴുതിയിട്ടേയില്ല. എനിക്ക് ആ റൈറ്റിങ് പാഡ് എടുക്കാന്‍ പോലുമുള്ള മനസ് വരുന്നില്ല. കാരണം അത് കാണുമ്പോള്‍ മുതല്‍, അപ്പ എന്ത് ചെയ്യുകയായിരിക്കും, അപ്പ എന്താണ് ചിന്തിക്കുന്നത് എന്നൊക്കെ എന്റെ മനസില്‍ വരും.
അത് എഴുതി കഴിഞ്ഞ ശേഷം അപ്പയോട് പോയി അഭിപ്രായം ചോദിക്കാനായിരുന്നു ഞാനിരുന്നത്. പക്ഷേ അത് സംഭവിച്ചില്ല. പക്ഷേ തീര്‍ച്ചയായും ഒരു ദിവസം ഞാനത് തിരിച്ചെടുക്കും, എഴുതി തുടങ്ങും. എന്റെ അച്ഛന്‍ അതില്‍ അഭിമാനിക്കുമെന്ന് എനിക്കുറപ്പുണ്ട്'. - ശന്തനു പറഞ്ഞു.
ഹൃദയാഘാതത്തെ തുടര്‍ന്ന് കഴിഞ്ഞ ജൂണിലായിരുന്നു ഭാഗ്യരാജിന്റെ അന്ത്യം. അദ്ദേഹത്തിന്റെ മരണം തമിഴ് ചലച്ചിത്രലോകത്തിന് വലിയ നഷ്ടമാണ് സൃഷ്ടിച്ചത്.
Comments