അമേരിക്കൻ പ്രസിഡന്റ് ഡൊണാൾഡ് ട്രംപിനൊപ്പം വൈറ്റ് ഹൗസിൽ പ്രത്യക്ഷപ്പെട്ടതിനു പിന്നാലെ സമൂഹമാധ്യമങ്ങളിൽ വൈറലായി പ്രമുഖ മനുഷ്യസ്‌നേഹിയും ഡെൽ ടെക്നോളജീസ് സ്ഥാപകൻ മൈക്കൽ ഡെല്ലിന്റെ ഭാര്യയുമായ സൂസൻ ഡെൽ. ഒക്ടോബർ ഏഴിനായിരുന്നു ഇരുവരും ട്രംപിനൊപ്പം പരിപാടിയിൽ പങ്കെടുത്തത്. കുട്ടികൾക്കായുള്ള നിക്ഷേപ അക്കൗണ്ടുകൾക്ക് പിന്തുണ നൽകുന്നതിനായി 6.25 ബില്യൺ ഡോളർ സംഭാവന ചെയ്യുമെന്ന പ്രഖ്യാപനമായിരുന്നു പരിപാടിയുടെ പ്രധാന ലക്ഷ്യം. എന്നാൽ സൂസന്റെ രൂപവും മുഖഭാവങ്ങളും കൈചലനങ്ങളും ചർച്ചയായതോടെ വലിയ സാമ്പത്തിക പ്രഖ്യാപനത്തെക്കാൾ സമൂഹമാധ്യമങ്ങളിൽ ശ്രദ്ധ നേടിയത് അവരുടെ വൈറ്റ് ഹൗസ് ദൃശ്യങ്ങളാണ്.
സാങ്കേതികവിദ്യാ രംഗത്തെ പ്രമുഖനായ മൈക്കൽ ഡെല്ലിനെ വിവാഹം കഴിക്കുന്നതിനു മുമ്പ് ഫാഷൻ മേഖലയിലും പ്രവർത്തിച്ചിരുന്ന വ്യക്തിയാണ് സൂസൻ ഡെൽ. 1988-ൽ ടെക്സസിലെ ഓസ്റ്റിനിൽ വച്ചാണ് ഇരുവരും പരിചയപ്പെട്ടത്. 1989-ൽ വിവാഹിതരായ ഇവർക്ക് നാല് മക്കളുണ്ട്. ഫാഷൻ രംഗത്തെ പ്രവർത്തനങ്ങൾക്കു പുറമെ കുട്ടികളുടെയും കുടുംബങ്ങളുടെയും ജീവിതനിലവാരം മെച്ചപ്പെടുത്തുന്നതിനുള്ള ജീവകാരുണ്യ പ്രവർത്തനങ്ങളിലും സൂസൻ സജീവമാണ്. 1999ൽ മൈക്കലിനൊപ്പം ചേർന്ന് മൈക്കൽ ആൻഡ് സൂസൻ ഡെൽ ഫൗണ്ടേഷനും സ്ഥാപിച്ചു. 2019-ൽ ടെക്സസ് വിമൻസ് ഹാൾ ഓഫ് ഫെയിമിൽ ഇടം നേടിയതും അവരുടെ പ്രവർത്തനങ്ങൾക്ക് ലഭിച്ച അംഗീകാരമാണ്.
കുട്ടികൾക്കായുള്ള നിക്ഷേപ അക്കൗണ്ടുകളെ പിന്തുണയ്ക്കുന്നതിനായി 6.25 ബില്യൺ ഡോളർ നൽകുമെന്നതാണ് ഡെൽ ദമ്പതികളുടെ പ്രധാന പ്രഖ്യാപനം. അർഹരായ രണ്ടരക്കോടി കുട്ടികളുടെ അക്കൗണ്ടുകളിലേക്ക് 250 ഡോളർ വീതം എത്തിക്കാനാണ് ഈ സംഭാവന ലക്ഷ്യമിടുന്നത്. കുട്ടികളുടെ ഭാവിയിലേക്കുള്ള നിക്ഷേപത്തിന്റെ പ്രാധാന്യവും കുടുംബങ്ങൾക്ക് അക്കൗണ്ടുകൾ പ്രയോജനപ്പെടുത്തേണ്ടതിന്റെ ആവശ്യകതയും പരിപാടിയിൽ സൂസൻ ചൂണ്ടിക്കാട്ടി. അവരുടെ പ്രസംഗത്തെ പ്രശംസിച്ച ട്രംപ്, ഭാവിയിൽ രാഷ്ട്രീയത്തിലേക്ക് ഇറങ്ങുന്നതിനെക്കുറിച്ച് ആലോചിക്കണമെന്നും അങ്ങനെ തീരുമാനിച്ചാൽ പിന്തുണ നൽകാമെന്നും തമാശരൂപേണ പറഞ്ഞു. എന്നാൽ രാഷ്ട്രീയ പ്രവേശനത്തെക്കുറിച്ച് സൂസൻ പ്രഖ്യാപനമൊന്നും നടത്തിയിട്ടില്ല.
അതേസമയം, പരിപാടിയുടെ ദൃശ്യങ്ങൾ വ്യാപകമായി പ്രചരിച്ചതോടെ സൂസന്റെ മുഖഭാവങ്ങൾ, മേക്കപ്പ്, കൈചലനങ്ങൾ, മൊത്തത്തിലുള്ള രൂപം എന്നിവയെക്കുറിച്ച് സമൂഹമാധ്യമങ്ങളിൽ നിരവധി അഭിപ്രായങ്ങളുയർന്നു. പഴയ ചിത്രങ്ങളുമായി താരതമ്യം ചെയ്ത ചിലർ സൗന്ദര്യവർധക ചികിത്സകൾ നടത്തിയിട്ടുണ്ടാകാമെന്നും ഊഹാപോഹങ്ങൾ പങ്കുവച്ചു. ട്രംപിന്റെ അടുത്ത വൃത്തങ്ങളിലുള്ള ചിലരുടെ രൂപവുമായി ബന്ധപ്പെടുത്തി ഉപയോഗിക്കുന്ന ‘മാർ-എ-ലാഗോ ഫേസ്’ എന്ന പ്രയോഗവും ചർച്ചയിൽ ഇടംപിടിച്ചു. എന്നാൽ സൂസൻ ഇത്തരം ചികിത്സകൾ നടത്തിയെന്നതിന് സ്ഥിരീകരണമില്ല. കുട്ടികൾക്കായി വൻതുക സംഭാവന ചെയ്ത പ്രഖ്യാപനത്തിനൊപ്പം അവരുടെ രൂപത്തെക്കുറിച്ചുള്ള ചർച്ചകളും വൈറലായതാണ് ഇപ്പോൾ വാർത്തകളിൽ ശ്രദ്ധ നേടുന്നത്.
Comments