വാഷിംഗ്ടണ്‍: അമേരിക്കന്‍ തൊഴിലാളികളെ തൊഴില്‍ വിപണിയില്‍ നിന്ന് ഒഴിവാക്കുന്നുവെന്ന് ആരോപിച്ച്, തൊഴിലുടമകള്‍ സ്‌പോണ്‍സര്‍ ചെയ്യുന്ന ഗ്രീന്‍ കാര്‍ഡ് പ്രക്രിയയിലെ നിര്‍ണായക പടിയായ പെര്‍മനന്റ് ലേബര്‍ സര്‍ട്ടിഫിക്കേഷന്‍ (പി.ഇ.ആര്‍.എം.) പ്രോഗ്രാമില്‍ നിന്ന് മൈക്രോസോഫ്റ്റ്, ടാറ്റ, വിപ്രോ, ഇന്‍ഫോസിസ് എന്നിവയുള്‍പ്പെടെ എട്ട് ഐ.ടി സ്ഥാപനങ്ങളെ യുണൈറ്റഡ് സ്റ്റേറ്റ്‌സ് വിലക്കി.
ടി.സി.എസ്, ഇന്‍ഫോസിസ്, കോഗ്‌നിസെന്റ്, വിപ്രോ, എച്ച്.സി.എല്‍ എന്നിവയാണ് പേരെടുത്ത് പറഞ്ഞിരിക്കുന്ന ഇന്ത്യന്‍ കമ്പനികള്‍. കൂടാതെ യു.എസില്‍ എച്ച്-1ബി തൊഴിലാളികളെ ജോലിക്കമര്‍ത്തുന്ന പ്രമുഖ കമ്പനികളില്‍ ടാറ്റ, ഇന്‍ഫോസിസ്, കോഗ്‌നിസെന്റ്, എച്ച്.സി.എല്‍, വിപ്രോ എന്നിവയും ഉള്‍പ്പെടുന്നു. മൈക്രോസോഫ്റ്റ്, അഡോബി, ക്യാപ്‌ജെമിനി എന്നിവയാണ് വിശാലമായ പട്ടികയിലുള്ള മറ്റ് കമ്പനികള്‍.
ഈ കമ്പനികളുടെ പെര്‍മ് അപേക്ഷകളുടെ പ്രോസസ്സിംഗ് ലേബര്‍ ഡിപ്പാര്‍ട്ട്‌മെന്റ് സസ്‌പെന്‍ഡ് ചെയ്തിട്ടുണ്ട്. അമേരിക്കന്‍ ഐടി കമ്പനികളില്‍ ജോലി ചെയ്യുന്ന ഇന്ത്യാക്കാര്‍ ഉള്‍പ്പെടെയുള്ള വിദേശികള്‍ക്ക് തിരിച്ചടിയാണ് ഇത്. കമ്പനികള്‍ ഈ സംവിധാനത്തെ ദുരുപയോഗം ചെയ്ത് അമേരിക്കക്കാര്‍ക്ക് പകരം വിദേശ ജീവനക്കാരെ നിയമിക്കുന്നുവെന്ന് ട്രംപ് ഭരണകൂടത്തിന്റെ ആരോപണം.
യു.എസില്‍ തൊഴില്‍ അധിഷ്ഠിത സ്ഥിര താമസത്തിനോ (ഗ്രീന്‍ കാര്‍ഡ്) വേണ്ടിയുള്ള ശ്രമത്തില്‍ വിദേശ തൊഴിലാളികള്‍ക്ക് നിര്‍ണായകമായ ഒരു പടിയാണ് പെര്‍മ് അഥവാ പെര്‍മനന്റ് ലേബര്‍ സര്‍ട്ടിഫിക്കേഷന്‍ പ്രോഗ്രാം. ഏറ്റവും പുതിയ നടപടിയില്‍ ഉള്‍പ്പെടുത്തിയിട്ടുള്ള കമ്പനികളില്‍ നിന്നുള്ള പുതിയതോ നിലവിലുള്ളതോ ആയ പെര്‍മ് അപേക്ഷകള്‍ പ്രോസസ്സ് ചെയ്യില്ലെന്ന് ലേബര്‍ ഡിപ്പാര്‍ട്ട്‌മെന്റ് വ്യക്തമാക്കി. തൊഴിലുടമകള്‍ പെര്‍മ് വഴി സ്‌പോണ്‍സര്‍ ചെയ്യുന്ന ഇന്ത്യന്‍ ജീവനക്കാരെ സംബന്ധിച്ചിടത്തോളം ഈ സസ്‌പെന്‍ഷന്‍ അവരുടെ ഗ്രീന്‍ കാര്‍ഡ് എന്‍ട്രിയെ ബാധിച്ചേക്കാം.
എന്നാല്‍ ആമസോണ്‍, ഗൂഗിള്‍, മെറ്റ തുടങ്ങിയ കമ്പനികളെ വ്യാഴാഴ്ച പ്രഖ്യാപിച്ച സസ്‌പെന്‍ഷനില്‍ ഉള്‍പ്പെടുത്തിയിട്ടില്ല. നിലവില്‍ എച്ച്-1ബി വിസയില്‍ യു.എസില്‍ കഴിയുന്നവരും, അവരുടെ തൊഴിലുടമകള്‍ സ്ഥിര താമസത്തിനായുള്ള ശ്രമങ്ങള്‍ നടത്തുന്നവരുമായ ഇന്ത്യന്‍ സാങ്കേതിക വിദഗ്ധരെ സംബന്ധിച്ചിടത്തോളം ഈ നടപടി നിര്‍ണ്ണായകമാണ്. അതേസമയം ബാധിക്കപ്പെട്ട കമ്പനികളിലെ നിലവിലുള്ള എച്ച്-1ബി ജീവനക്കാര്‍ യു.എസ് വിട്ടുപോകണമെന്നോ അവരുടെ നിലവിലുള്ള എച്ച്-1ബി പദവി റദ്ദാക്കപ്പെട്ടെന്നോ നല്‍കിയിരിക്കുന്ന വിവരങ്ങളില്‍ പറയുന്നില്ല.
അതേസമയം യു.എസ് സര്‍ക്കാരിന്റെ അവകാശവാദങ്ങള്‍ മൈക്രോസോഫ്റ്റ് തള്ളിക്കളഞ്ഞു. കഴിഞ്ഞ സാമ്പത്തിക വര്‍ഷം സമര്‍പ്പിച്ച ഏകദേശം 6,000 എച്ച്-1ബി അപേക്ഷകളില്‍ 80% വും പുതിയ നിയമനങ്ങള്‍ക്കായല്ല, മറിച്ച് നിലവിലുള്ള ജീവനക്കാരുടെ വിസ നീട്ടുന്നതിനോ പദവി മാറ്റുന്നതിനോ വേണ്ടിയുള്ളതാണെന്ന് കമ്പനി ഔദ്യോഗിക പ്രസ്താവനയില്‍ വ്യക്തമാക്കി. കൂടാതെ, ശേഷിക്കുന്ന അപേക്ഷകളില്‍ ഉള്‍പ്പെടുന്ന പുതിയ ജീവനക്കാര്‍ ഇതിനകം തന്നെ നിയമപരമായി യു.എസിലാണ് ഉള്ളതെന്നും മൈക്രോസോഫ്റ്റ് പറഞ്ഞു.
തുല്യ ജോലി ചെയ്യുന്ന എച്ച്-1ബി ജീവനക്കാര്‍ക്ക് മറ്റ് ജീവനക്കാരെപ്പോലെ തന്നെ ശമ്പളം ലഭിക്കുന്നുണ്ടെന്നും, യു.എസിലെ അവരുടെ ജീവനക്കാരില്‍ ഭൂരിഭാഗവും അമേരിക്കക്കാരാണെന്നും കമ്പനി വ്യക്തമാക്കി. എച്ച്-1ബി പ്രോഗ്രാം നിലനില്‍ക്കുമ്പോള്‍ തന്നെ, ബാധിക്കപ്പെട്ട ഇന്ത്യന്‍ ഐ.ടി ജീവനക്കാരുടെ ഗ്രീന്‍ കാര്‍ഡ് വഴിയെക്കുറിച്ചുള്ള അനിശ്ചിതത്വത്തിനാണ് ഈ പുതിയ നടപടി വഴിതുറന്നിരിക്കുന്നത്.
Comments