സമാധാന നോബൽ നവി പിള്ളയ്ക്ക്; ആരാണ് നവി പിള്ള? മലയാളിയാണെന്ന് പേരു കേട്ടാൽ തോന്നും, പക്ഷേ...

ന്യൂഡൽഹി: ഇക്കൊല്ലത്തെ സമാധാന നോബൽ നേടിയ നവി പിള്ളയുടെ പേര് കേൾക്കുമ്പോൾ ഒരു മലയാള ബന്ധം തോന്നിയേക്കാം. എന്നാൽ, അവർ ദക്ഷിണാഫ്രിക്കയിൽ ഒരു ഇന്ത്യൻ തമിഴ് കുടുംബത്തിലാണ് ജനിച്ചത്. അവിടുത്തെ തമിഴ് സമൂഹത്തിന്റെ സംസ്കാരവും പാരമ്പര്യവും ഉൾക്കൊണ്ടാണ് അവർ വളർന്നത്.

നവി പിള്ളയുടെ പിതാവ് നരൈൻ സ്വാമി ഒരു ബസ് ഡ്രൈവറായിരുന്നു. സാധാരണക്കാരനായ അദ്ദേഹത്തിന് കുടുംബത്തിന് വലിയ സമ്പാദ്യമൊന്നും നൽകാൻ കഴിഞ്ഞിരുന്നില്ലെങ്കിലും മക്കളുടെ വിദ്യാഭ്യാസത്തിന് അദ്ദേഹം വലിയ പ്രാധാന്യം നൽകി. സാമ്പത്തികമായി പിന്നാക്കം നിന്ന കുടുംബത്തിൽ നിന്ന് വന്ന്, അക്കാലത്തെ ദക്ഷിണാഫ്രിക്കൻ സമൂഹത്തിലെ വർണ്ണവിവേചനത്തെയും സാമ്പത്തിക പ്രതിസന്ധികളെയും അതിജീവിച്ചാണ് നവി പിള്ള ഉന്നത വിദ്യാഭ്യാസവും നിയമ ബിരുദവും നേടി അന്താരാഷ്ട്ര തലത്തിൽ ശ്രദ്ധേയയായ ജഡ്ജിയായി ഉയർന്നത്.

അഭിഭാഷകനായ ഗാബി പിള്ള ആയിരുന്നു നവി പിള്ളയുടെ ഭർത്താവ്. ദക്ഷിണാഫ്രിക്കയിലെ വർണ്ണവിവേചനത്തിനെതിരായ പോരാട്ടങ്ങളിൽ ഇരുവരും ഒന്നിച്ച് പ്രവർത്തിച്ചു. അക്കാലത്ത് ഭർത്താവ് ഗാബി പിള്ളയെ ഭരണകൂടം തടവിലാക്കിയപ്പോൾ, അദ്ദേഹത്തിന് വേണ്ടി കോടതിയിൽ വാദിച്ചതും നവി പിള്ള തന്നെയാണ്. ഇവർക്ക് രണ്ട് പെൺമക്കളുണ്ട്.

പിന്നീട്, ദക്ഷിണാഫ്രിക്കൻ ഹൈക്കോടതിയിലെ ആദ്യത്തെ വെള്ളക്കാരല്ലാത്ത വനിതാ ജഡ്ജിയായി അവർ ചരിത്രം കുറിച്ചു. 2008 മുതൽ 2014 വരെ യു.എൻ. മനുഷ്യാവകാശ ഹൈക്കമ്മീഷണറായി സേവനമനുഷ്ഠിച്ച അവർ, അന്താരാഷ്ട്ര തർക്കങ്ങളും രാഷ്ട്രീയ പ്രതിസന്ധികളും നിറഞ്ഞ കാലഘട്ടത്തിൽ യു.എന്നിന്റെ മനുഷ്യാവകാശ പ്രവർത്തനങ്ങൾക്ക് മുൻനിരയിൽ നിന്ന് നേതൃത്വം നൽകി. സമാധാനവും അന്താരാഷ്ട്ര നിയമങ്ങളും പ്രോത്സാഹിപ്പിക്കുന്നതിനായി നടത്തിയ സേവനങ്ങളെ മാനിച്ചാണ് 85-കാരിയായ നവി പിള്ളയെ ഈ പുരസ്കാരത്തിനായി തിരഞ്ഞെടുത്തതെന്ന് നോർവീജിയൻ നോബൽ കമ്മിറ്റി അറിയിച്ചു.

അതേസമയം, 2026-ലെ നോബൽ സമാധാന പുരസ്കാരത്തിനായി 287 നാമനിർദ്ദേശങ്ങളാണ് ലഭിച്ചത്. ഇതിൽ നാലിലൊന്നിലധികം സംഘടനകളായിരുന്നു. സമാധാനം, അന്താരാഷ്ട്ര സൗഹാർദ്ദം, ഇവ ഉറപ്പാക്കുന്ന സ്ഥാപനങ്ങളുടെ ശക്തിപ്പെടുത്തൽ എന്നിവയ്ക്കായി പ്രവർത്തിക്കുന്നവർക്കാണ് സാധാരണയായി ഈ പുരസ്കാരം നൽകാറുള്ളത്.

നോബൽ സമാധാന പുരസ്കാരത്തിന്റെ 125-ാം വാർഷിക വേളയിലാണ് പിള്ളയ്ക്ക് ഈ പുരസ്കാരം ലഭിക്കുന്നത്. 1901-ൽ ആരംഭിച്ചതിനുശേഷം ഇതുവരെ 112 വ്യക്തികൾക്കും 28 സംഘടനകൾക്കും ഈ പുരസ്കാരം നൽകിയിട്ടുണ്ട്. ഇന്റർനാഷണൽ കമ്മിറ്റി ഓഫ് ദി റെഡ് ക്രോസിന് (ICRC) മൂന്ന് തവണയും യു.എൻ. അഭയാർത്ഥി ഏജൻസിക്ക് (UNHCR) രണ്ട് തവണയും ഈ ബഹുമതി ലഭിച്ചിട്ടുണ്ട്.

നോബൽ പുരസ്കാര ജേതാക്കൾക്ക് 12 ദശലക്ഷം സ്വീഡിഷ് ക്രോണർ (ഏകദേശം 1.2 മില്യൺ യു.എസ്. ഡോളർ) സമ്മാനത്തുകയായി ലഭിക്കും. വ്യക്തികൾക്കായാലും സംഘടനകൾക്കായാലും തുകയിൽ മാറ്റമില്ല. ദക്ഷിണാഫ്രിക്കൻ നീതിന്യായ വ്യവസ്ഥയിൽ നിന്ന് ഐക്യരാഷ്ട്രസഭയുടെ ഏറ്റവും ഉയർന്ന മനുഷ്യാവകാശ പദവി വരെ എത്തിയ നവി പിള്ളയുടെ മഹത്തായ കരിയറിന് സമാധാന നോബൽ മറ്റൊരു പൊൻതൂവലായി മാറുന്നു.