ചെന്നൈ : മുഖ്യമന്ത്രി സി.ജോസഫ് വിജയ് മുന്നിൽ നിന്നു നയിച്ച തമിഴ്നാട്ടിലെ ഉപതിരഞ്ഞെടുപ്പിൽ അണ്ണാഡിഎംകെയുടെ കോട്ടകൾ ടിവികെ പിടിച്ചെടുത്തു. അണ്ണാഡിഎംകെ എംഎൽഎമാർ രാജിവച്ചതിനാൽ നടന്ന ഉപതിരഞ്ഞെടുപ്പിൽ രണ്ടു സീറ്റിലും മികച്ച ഭൂരിപക്ഷത്തോടെയാണ് വിജയം. രണ്ടിടത്തും അണ്ണാഡിഎംകെ മൂന്നാമതായതോടെ എടപ്പാടി കെ.പളനിസാമിയുടെ നേതൃത്വം വീണ്ടും ചോദ്യമുനയിലായി.
മുഖ്യമന്ത്രി തന്നെ രണ്ടു മണ്ഡലത്തിലെയും മുക്കിലും മൂലയിലുമെത്തി നടത്തിയ പ്രചാരണത്തിന്റെ പ്രഭയിലാണ് ടിവികെ വിജയം. അണ്ണാഡിഎംകെയിൽ നിന്നു രാജിവച്ചവർ ടിവികെയിലെത്തി സ്ഥാനാർഥിയായതോടെ കുതിരക്കച്ചവടമെന്നു പ്രതിപക്ഷം ആരോപിച്ചു.ഉപതിരഞ്ഞെടുപ്പിൽ ഭരണകക്ഷി തോൽക്കാത്ത ചരിത്രം തമിഴകത്ത് തിരുത്താതെ തന്നെ തുടരാനായി. എസ്‌സി സംവരണ മണ്ഡലങ്ങളാണ്.
ചെങ്കൽപ്പെട്ട് ജില്ലയിലെ മധുരാന്തകത്തു ടിവികെ സ്ഥാനാർഥിയായ മരഗതം കുമരവേലിന്റെ ലീഡ് 57994 വോട്ടാണ്. രണ്ടാമത് ഡിഎംകെ സ്ഥാനാർഥി ഐ.പരന്താമനാണ്.285 ബൂത്തുകളിലായി ആകെ 2,13,788 വോട്ടർമാരുള്ള മണ്ഡലത്തിൽ 86.26 ശതമാനമായിരുന്നു പോളിങ്. തിരുപ്പൂർ ജില്ലയിലെ ധാരാപുരത്തു ടിവികെ സ്ഥാനാർഥി പി.സത്യഭാമയ്ക്കു 66,841 വോട്ട് ലീഡുണ്ട്. ഡിഎംകെ സ്ഥാനാർഥി എസ്.സുകന്യയാണ് രണ്ടാമത്.
ഒറ്റയ്ക്കു മത്സരിച്ച ഇടതുപക്ഷത്തിനു കെട്ടിവച്ച കാശ് പോയി. 2000 വോട്ട് പോലും നേടാനായില്ല. രണ്ടിടത്തും നാം തമിഴർ കക്ഷിയുടെയും പിന്നിലാണിവർ. മധുരാന്തകത്തു സിപിഎം സ്ഥാനാർഥിയും ധാരാപുരത്തു സിപിഐ യുമാണ് മത്സരിച്ചത്. ടിവികെ സർക്കാരിനു പുറത്തു നിന്നു പിന്തുണ നൽകവേയാണ് മത്സരിക്കാനിറങ്ങിയത്.
അതേസമയം പുതുച്ചേരിയിലെ തട്ടന്‍ചാവടി മണ്ഡലത്തിലെ ഉപതെരഞ്ഞെടുപ്പില്‍ ഭരണകക്ഷിയായ ഓള്‍ ഇന്ത്യ എന്‍ ആര്‍ കോണ്‍ഗ്രസ് വിജയിച്ചു. എന്‍ആര്‍ കോണ്‍ഗ്രസ് സ്ഥാനാര്‍ത്ഥി അശോക് ആനന്ദ് 8482 വോട്ടുകള്‍ക്കാണ് വിജയിച്ചത്. കോണ്‍ഗ്രസ് സ്ഥാനാര്‍ത്ഥി ഇ വിനായകത്തെയാണ് തോല്‍പ്പിച്ചത്. ഡിഎംകെ സ്ഥാനാര്‍ത്ഥി മൂന്നാമതാണ്
Comments