'പ്രസിഡന്റ് വോട്ട് മോഷണത്തിന് തെളിവ് ചോദിച്ചു; എല്ലാ തെളിവുകളും ഞങ്ങളുടെ പക്കലുണ്ട്': രാഹുൽ ഗാന്ധി

ന്യൂഡൽഹി: തിരഞ്ഞെടുപ്പ് പ്രക്രിയയിലെ നിയമവിരുദ്ധ നടപടികൾ ചൂണ്ടിക്കാണിക്കാൻ 'ഇന്ത്യ' മുന്നണി നേതാക്കൾ രാഷ്ട്രപതി ദ്രൗപദി മുർമുവുമായി കൂടിക്കാഴ്ച നടത്തിയതിന് ശേഷം, "അവർ ഈ ആരോപണം നിഷേധിച്ചില്ല" എന്നത് തന്നെ അത്ഭുതപ്പെടുത്തിയെന്ന് ലോക്‌സഭ പ്രതിപക്ഷ നേതാവ് രാഹുൽ ഗാന്ധി പറഞ്ഞു. എങ്കിലും രാഷ്ട്രപതി തെളിവ് ആവശ്യപ്പെട്ടിട്ടുണ്ടെന്ന് അദ്ദേഹം വ്യക്തമാക്കി.

"തിരഞ്ഞെടുപ്പ് എങ്ങനെയാണ് അട്ടിമറിക്കപ്പെട്ടത് എന്നതിന്റെ എല്ലാ തെളിവുകളും ഞങ്ങളുടെ പക്കലുണ്ട്. രാജ്യം മുഴുവൻ അത് കണ്ടതാണ്," രാഹുൽ കൂട്ടിച്ചേർത്തു. എന്നാൽ ഈ ചർച്ചകളെക്കുറിച്ച് രാഷ്ട്രപതിയുടെ ഓഫീസിൽ നിന്ന് ഉടൻ ഔദ്യോഗിക പ്രതികരണങ്ങളൊന്നും വന്നിട്ടില്ല.

തങ്ങൾ ഒരു നിവേദനം സമർപ്പിച്ചിട്ടുണ്ട് എന്നും ഇത് പരിശോധിക്കുമെന്നും വിശദാംശങ്ങൾ പഠിക്കുമെന്നും ഇതിനായി തെളിവുകൾ വേണമെന്നും രാഷ്ട്രപതി പറഞ്ഞതിനെ ഞങ്ങൾ വളരെ പോസിറ്റീവായി കാണുന്നുവെന്ന് തൃണമൂൽ നേതാവ് മമത ബാനർജി കൂടിക്കാഴ്ചയ്ക്ക് ശേഷം പറഞ്ഞു. തെളിവുകൾ അയച്ചുനൽകാമെന്ന് പറഞ്ഞിട്ടുണ്ട് എന്നും രാഷ്ട്രപതി വളരെ അനുകൂലമായാണ് പ്രതികരിച്ചത് എന്നും അവർ പറഞ്ഞു.

പാർലമെന്റിൽ നിന്ന് രാഷ്ട്രപതി ഭവനിലേക്ക് പ്രതിപക്ഷ എം.പിമാരും പാർട്ടി നേതാക്കളും നടത്തിയ മാർച്ചിന് രാഹുൽ ഗാന്ധി നേതൃത്വം നൽകി. തുടർന്ന് മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാർ രാജിവെക്കണമെന്ന് ആവശ്യപ്പെട്ട് പത്തംഗ സംഘം നേതാക്കൾ രാഷ്ട്രപതിയെ കണ്ടു. തർക്കവിഷയമായ എസ്‌ഐ‌ആർ വോട്ടർപട്ടിക പരിഷ്കരണം റദ്ദാക്കണമെന്നും കരട് പട്ടികയിൽ നിന്ന് ഒഴിവാക്കപ്പെട്ട 13 കോടി വോട്ടർമാരെ തിരികെ ചേർക്കണമെന്നും അവരുടെ മൂന്ന് പോയിന്റ് നിവേദനത്തിൽ ആവശ്യപ്പെട്ടു.

പാർലമെന്റിലെ സെൻട്രൽ ഹാളിൽ 'ഇന്ത്യ' മുന്നണിയിലെ നൂറ്റമ്പതോളം എം.പിമാരും മറ്റ് നേതാക്കളും പങ്കെടുത്ത യോഗത്തിന് ശേഷമാണ് മാർച്ച് ആരംഭിച്ചത്. തിരഞ്ഞെടുപ്പ് കമ്മീഷന്റെ പ്രവർത്തനങ്ങളിൽ ആശങ്കയറിയിച്ച് 16 വിവിധ പാർട്ടികളിൽ നിന്നുള്ള 16 നേതാക്കൾ രാഷ്ട്രപതിക്കുള്ള നിവേദനത്തിൽ ഒപ്പുവെച്ചു.