ഒരേ ജോലി ചെയ്തിട്ടും പുരുഷ രൂപത്തിലുള്ള എഐ ഏജന്റിനെ അപേക്ഷിച്ച് സ്ത്രീ രൂപത്തിലുള്ള എഐ ഏജന്റിന് കുറഞ്ഞ പ്രതിഫലം നൽകിയതായി പഠനം. സ്ത്രീ രൂപത്തിലുള്ള എഐ അസിസ്റ്റന്റിന് പുരുഷ രൂപത്തിലുള്ള എഐ അസിസ്റ്റന്റിനെക്കാൾ ശരാശരി 10.25 ശതമാനം കുറവ് തുകയാണ് ലഭിച്ചത്. അയർലൻഡിലെ ലിമെറിക് സർവകലാശാലയിലെ ഗവേഷകർ നടത്തിയ പഠനത്തിലാണ് ഈ വ്യത്യാസം കണ്ടെത്തിയത്. സാങ്കേതികവിദ്യയിലും പ്രവർത്തനശേഷിയിലും വ്യത്യാസമില്ലാതിരുന്നിട്ടും പ്രതിഫലം നൽകുന്നതിൽ ലിംഗപരമായ മുൻവിധികൾ സ്വാധീനം ചെലുത്തുന്നതായാണ് പഠനം സൂചിപ്പിക്കുന്നത്.
പഠനത്തിന്റെ ഭാഗമായി 189 ജീവനക്കാരെ വെർച്വൽ റിയാലിറ്റി ഓഫിസിൽ പങ്കെടുപ്പിച്ചു. ജോലിസംബന്ധമായ വിവിധ പ്രവർത്തനങ്ങൾ എഐ അസിസ്റ്റന്റുമാരുടെ സഹായത്തോടെ പൂർത്തിയാക്കാനായിരുന്നു നിർദേശം. ടെക്സ്റ്റ് ചാറ്റ്ബോട്ട്, മേശപ്പുറത്ത് പ്രവർത്തിക്കുന്ന റോബോട്ട്, മനുഷ്യരൂപത്തിലുള്ള എഐ ഏജന്റുകൾ എന്നിവയായിരുന്നു പരീക്ഷണത്തിൽ ഉൾപ്പെടുത്തിയത്. മനുഷ്യരൂപത്തിലുള്ള രണ്ട് എഐ ഏജന്റുകൾക്ക് പുരുഷരൂപത്തിലുള്ള ജോഹാൻ എന്നും സ്ത്രീരൂപത്തിലുള്ള ജോഹന്ന എന്നും പേരുകൾ നൽകി. ഇരുവർക്കും ഒരേ സാങ്കേതികവിദ്യയും പ്രവർത്തനശേഷിയുമായിരുന്നു ഉണ്ടായിരുന്നത്.
ജോലി പൂർത്തിയാക്കിയശേഷം പങ്കെടുക്കുന്നവർക്ക് തങ്ങൾക്കും എഐ അസിസ്റ്റന്റിനും ഇടയിൽ യഥാർഥ പണം പ്രതിഫലമായി വിഭജിക്കാൻ അവസരം നൽകി. ഇതിലാണ് ശ്രദ്ധേയമായ വ്യത്യാസം കണ്ടെത്തിയത്. ഒരേ ജോലികൾ ചെയ്ത ജോഹന്നയ്ക്ക് ജോഹാനെക്കാൾ ശരാശരി 10.25 ശതമാനം കുറവ് പണമാണ് ലഭിച്ചത്. മാത്രമല്ല, പുരുഷരൂപത്തിലുള്ള എഐ ഏജന്റിനെ കൂടുതൽ മനുഷ്യസമാനമായും ചിലർ വിലയിരുത്തി. തീരുമാനങ്ങളിൽ ലിംഗഭേദം സ്വാധീനിക്കുന്നില്ലെന്ന് പറഞ്ഞവരിൽ ചിലർ പോലും ജോഹാന് കൂടുതൽ പണം നൽകിയതായി ഗവേഷകർ കണ്ടെത്തി.
പഠനത്തിന് നേതൃത്വം നൽകിയവരിലൊരാളായ ലിമെറിക് സർവകലാശാലയിലെ കെമ്മി ബിസിനസ് സ്കൂളിലെ ഡോ. മേരി ഹൗസ്ഫെൽഡ്, എഐ സംവിധാനങ്ങളുടെ രൂപകൽപ്പനയും അവയെ അവതരിപ്പിക്കുന്ന രീതിയും മനുഷ്യരുടെ മുൻവിധികളെ സ്വാധീനിക്കാമെന്ന് ചൂണ്ടിക്കാട്ടി. ജോലിസ്ഥലങ്ങളിൽ എഐ ഏജന്റുമാരുടെ ഉപയോഗം വർധിക്കുന്ന സാഹചര്യത്തിൽ ഇത്തരം സംവിധാനങ്ങൾ രൂപകൽപ്പന ചെയ്യുമ്പോൾ കൂടുതൽ ശ്രദ്ധ ആവശ്യമാണെന്നും ഗവേഷകർ മുന്നറിയിപ്പ് നൽകി. മനുഷ്യരുടെ ഇടപെടലുകളിൽ കാണുന്ന ലിംഗപരമായ അസമത്വങ്ങൾ സാങ്കേതികവിദ്യയുമായുള്ള ഇടപെടലുകളിലും ആവർത്തിക്കപ്പെടാമെന്നതാണ് പഠനത്തിലെ പ്രധാന കണ്ടെത്തൽ.
Comments