പ്രായം കൂടുന്തോറും ആളുകളില്‍ കണ്ടുവരുന്ന ഏറ്റവും സാധാരണമായ പ്രശ്‌നങ്ങളിലൊന്നാണ് സന്ധിവേദന. എന്നാല്‍, ഇത് പ്രായമാകുന്നതിന്റെ സ്വാഭാവിക ഭാഗമാണെന്നോ അല്ലെങ്കില്‍ സ്വയം മാറിപ്പോകുന്ന ഒന്നാണെന്നോ കരുതി തള്ളിക്കളയരുത്. കഠിനമായ വ്യായാമത്തിനോ ജോലിയിലോ ശേഷം അനുഭവപ്പെടുന്ന താത്കാലികമായ അസ്വസ്ഥതകള്‍ വിശ്രമിക്കുമ്പോള്‍ മാറിയേക്കാം. എന്നാല്‍ വിട്ടുമാറാത്തതോ, ഇടയ്ക്കിടെ വരുന്നതോ, അല്ലെങ്കില്‍ കൂടുതല്‍ വഷളാകുന്നതോ ആയ വേദന ഓസ്റ്റിയോ ആര്‍ത്രൈറ്റിസ് (Osteoarthritis), ഇന്‍ഫ്‌ലമേറ്ററി ആര്‍ത്രൈറ്റിസ്, പഴയ പരിക്കുകള്‍, പേശികളുടെ ബലഹീനത, അല്ലെങ്കില്‍ സന്ധികളില്‍ അനുഭവപ്പെടുന്ന അമിതമായ സമ്മര്‍ദ്ദം എന്നിവയുടെ ലക്ഷണമാകാം. ആദ്യകാല ലക്ഷണങ്ങള്‍ തിരിച്ചറിഞ്ഞ് ജീവിതശൈലിയില്‍ ലളിതമായ മാറ്റങ്ങള്‍ വരുത്തുന്നത് സന്ധികളുടെ ആരോഗ്യം സംരക്ഷിക്കാനും ചലനശേഷി നിലനിര്‍ത്താനും സഹായിക്കും.
1. ശാരീരികമായി സജീവമായിരിക്കുക - സന്ധിവേദന ഒഴിവാക്കുന്നതിനുള്ള ഏറ്റവും പ്രധാനപ്പെട്ട ഒരു ശീലം ശാരീരികമായി സജീവമായിരിക്കുക എന്നതാണ്. എന്നാല്‍ സന്ധികള്‍ക്ക് അമിത സമ്മര്‍ദ്ദം നല്‍കാത്ത ലളിതമായ വ്യായാമങ്ങള്‍ (low-impact exercises) തിരഞ്ഞെടുക്കണം. നടത്തം, നീന്തല്‍, സൈക്ലിംഗ്, സ്‌ട്രെച്ചിംഗ് (stretching), സ്‌ട്രെങ്ത്-ട്രെയിനിംഗ് (strength-training) എന്നിവ പേശികളുടെ ബലം, വഴക്കം, സന്ധികളുടെ സ്ഥിരത എന്നിവ വര്‍ദ്ധിപ്പിക്കാന്‍ സഹായിക്കും. നിങ്ങള്‍ക്ക് ഇതിനകം വേദനയുണ്ടെങ്കില്‍, വ്യായാമത്തിന്റെ തീവ്രതയോ സമയമോ പെട്ടെന്ന് കൂട്ടുന്നത് ഒഴിവാക്കുക. പതുക്കെ പതുക്കെ വ്യായാമത്തിന്റെ അളവ് കൂട്ടുന്നതാണ് കൂടുതല്‍ സുരക്ഷിതവും സുസ്ഥിരവുമായ മാര്‍ഗ്ഗം.
2. ആരോഗ്യകരമായ ശരീരഭാരം നിലനിര്‍ത്തുക - പ്രത്യേകിച്ച് കാല്‍മുട്ടുകള്‍, ഇടുപ്പ്, കണങ്കാല്‍ എന്നിവയുടെ ആരോഗ്യത്തിന് ശരീരഭാരം നിയന്ത്രിക്കുന്നത് ഒരുപോലെ പ്രധാനമാണെന്ന് അദ്ദേഹം പറയുന്നു. ശരീരഭാരം കൂടുന്നത് സന്ധികളിലെ ഭാരം വര്‍ദ്ധിപ്പിക്കുകയും അവ പെട്ടെന്ന് തേഞ്ഞുപോകുന്നതിനും അസ്വസ്ഥതകള്‍ക്കും കാരണമാകുകയും ചെയ്യും. ആവശ്യത്തിന് പ്രോട്ടീന്‍, പച്ചക്കറികള്‍, പഴങ്ങള്‍, ധാന്യങ്ങള്‍, ആരോഗ്യകരമായ കൊഴുപ്പുകള്‍ എന്നിവയടങ്ങിയ സമീകൃത ആഹാരം കഴിക്കുന്നത് അസ്ഥികളുടെയും പേശികളുടെയും പൊതുവായ ആരോഗ്യത്തെ പിന്തുണയ്ക്കും.
3. ശരിയായ ഇരിപ്പും നില്പും (Posture) - ശരിയായ posture-ഉം ശരീരചലനങ്ങളും നിങ്ങളുടെ ദൈനംദിന ജീവിതത്തിന്റെ ഭാഗമാക്കണം. ഒരേ ഇരുപ്പ് തുടര്‍ച്ചയായി ഇരിക്കുന്നത് ഒഴിവാക്കുക, ഇടയ്ക്കിടെ ചെറിയ ഇടവേളകള്‍ എടുത്ത് നടക്കുക, ഭാരമുള്ള വസ്തുക്കള്‍ ഉയര്‍ത്തുമ്പോള്‍ ശരിയായ രീതി ഉപയോഗിക്കുക. സൗകര്യപ്രദവും പാദങ്ങള്‍ക്ക് താങ്ങ് നല്‍കുന്നതുമായ ചെരുപ്പുകള്‍ ഉപയോഗിക്കുന്നത് കാല്‍മുട്ടുകള്‍ക്കും കണങ്കാലിനും പാദങ്ങള്‍ക്കും ഉണ്ടാകുന്ന അനാവശ്യ സമ്മര്‍ദ്ദം കുറയ്ക്കും.
4. ആവശ്യത്തിന് വിശ്രമം ലഭിക്കുക - സന്ധികളുടെ ആരോഗ്യം നിലനിര്‍ത്തുന്നതില്‍ ആവശ്യത്തിന് ഉറക്കത്തിനും വിശ്രമത്തിനും വലിയ പങ്കുണ്ട്. ഉറക്കക്കുറവ് വേദന കൂടുതല്‍ കഠിനമായി അനുഭവപ്പെടാന്‍ ഇടയാക്കും. വ്യായാമത്തിന് ശേഷം ശരീരത്തിന് വീണ്ടെടുപ്പിനായി (recovery) മതിയായ സമയം നല്‍കുക. കഠിനമായ വേദനയുള്ളപ്പോള്‍ വീണ്ടും വീണ്ടും വ്യായാമം ചെയ്യുന്നത് ഒഴിവാക്കുക.
5. സ്വയം ചികിത്സ അരുത് - ഏറ്റവും പ്രധാനമായി, ഡോക്ടറുടെ നിര്‍ദ്ദേശമില്ലാതെ പതിവായി വേദനസംഹാരികള്‍ കഴിക്കരുത്. സന്ധിവേദന ആഴ്ചകളോളം നീണ്ടുനില്‍ക്കുകയോ, നീരോ വലിപ്പക്കൂടുതലോ (stiffness) അനുഭവപ്പെടുകയോ, ചലനശേഷിയെ ബാധിക്കുകയോ, പരിക്കിന് ശേഷമുണ്ടാകുകയോ, അല്ലെങ്കില്‍ വേദനയോടൊപ്പം ചുവപ്പുനിറമോ ചൂടോ പനിയോ അനുഭവപ്പെടുകയോ ചെയ്താല്‍ ഉടന്‍ തന്നെ ഒരു ഡോക്ടറെയോ ഓര്‍ത്തോപീഡിക് വിദഗ്ദ്ധനെയോ കാണുക. രോഗലക്ഷണങ്ങള്‍ തുടക്കത്തിലേ തിരിച്ചറിയുന്നത് ഒരു ചെറിയ സന്ധിപ്രശ്‌നം ഭാവിയില്‍ വലിയ പരിമിതിയായി മാറാതിരിക്കാന്‍ സഹായിക്കും.
Comments