ന്യൂഡല്‍ഹി: മുഖ്യതെരഞ്ഞെടുപ്പ് കമ്മീഷണര്‍ ഗ്യാനേഷ്‌കുമാറിന്റെ രാജി ആവശ്യപ്പെട്ടുള്ള സിജെപിയുടെ പ്രതിഷേധം തടഞ്ഞ് പോലീസ്. ഡല്‍ഹിയില്‍ പ്രതിഷേധക്കാരെ കാലുകുത്താന്‍ അനുവദിക്കാതെ പ്രതിഷേധക്കാര്‍ നില്‍ക്കുന്നിടത്ത് തടയുകയായിരുന്നു. രാവിലെ 10 മണിക്ക് ജന്തര്‍മന്ദറില്‍ പ്ലാന്‍ ചെയ്ത പ്രതിഷേധം നടന്നില്ലെങ്കിലും നഗരത്തിന്റെ വിവിധഭാഗങ്ങളിലെ മാര്‍ച്ചുകള്‍ തലസ്ഥാനത്തെ സംഘര്‍ഷഭരിതമാക്കി.
അഭിജീത് ദിപ്കെ, സൗരവ് ദാസ്, അശുതോഷ് റാങ്ക തുടങ്ങിയ സിജെപി നേതാക്കളെ തടങ്കലില്‍ വെച്ചും സമരത്തിന് പിന്തുണയുമായി എത്തിയ പ്രതിപക്ഷ പാര്‍ട്ടികളുടെ നേതാക്കളെയും ജന്തര്‍മന്ദറില്‍ എത്താതെ തടഞ്ഞുമായിരുന്നു പോലീസിന്റെ തന്ത്രം. ആരേയും അറസ്റ്റ് ചെയ്യാന്‍ കൂട്ടാക്കിയുമില്ല. ജന്തര്‍ മന്തറില്‍ പ്രതിഷേധിക്കാന്‍ എത്തിയവരെ ഡല്‍ഹിയില്‍ കാലുകുത്താന്‍ അനുവദിക്കാതെയായിരുന്നു പോലീസിന്റെ ഇടപെടല്‍. അഭിജിത് ദീപ്‌കേയെ വിമാനത്തില്‍ വെച്ചു തന്നെയും ഇടതു നേതാക്കളെ സമരം തുടങ്ങിയിടത്ത് വെച്ചും കസ്റ്റഡിയില്‍ എടുത്തു.
ശനിയാഴ്ച രാവിലെ പത്തുമണിക്ക് പ്രതിഷേധം ആരംഭിക്കുമെന്ന് പ്രഖ്യാപിച്ചിരുന്നെങ്കിലും മുംബൈയില്‍നിന്ന് ഡല്‍ഹിയിലെ ഇന്ദിരാ ഗാന്ധി വിമാനത്താവളത്തിലെത്തിയ അഭിജീത് ദിപ്കെ, അശുതോഷ് റാങ്ക, സൗരവ് ദാസ് എന്നിവരെ വിമാനത്തിനുള്ളില്‍വെച്ചുതന്നെ പോലീസ് കസ്റ്റഡിയില്‍ എടുത്തു. അഭിജീത്തിനെ ഗുരുഗ്രാമിലെ പോലീസ് സ്റ്റേഷനിലേക്കും സൗരവ് ദാസിനെ ഡല്‍ഹിയിലെ പോലീസ് സ്റ്റേഷനിലേക്കും അശുതോഷിനെ ദ്വാരകയിലെ പോലീസ് സ്റ്റേഷനിലേക്കുമാണ് കൊണ്ടുപോയതെന്നാണ് വിവരം.
എസ്എഫ്ഐ, ഡിവൈഎഫ്ഐ പ്രവര്‍ത്തകരും മാര്‍ച്ചുമായെത്തിയ മറ്റു യുവജന സംഘടനകളുടെ പ്രതിഷേധക്കാരെ ഡല്‍ഹി പോലീസ് ബലംപ്രയോഗിച്ചും നീക്കി. പ്രതിപക്ഷ നേതാവ് പിണറായി വിജയന്‍, സിപിഎം ജനറല്‍ സെക്രട്ടറി എം.എ. ബേബി, എം.വി. ഗോവിന്ദന്‍, പി.കെ. ശ്രീമതി, ജോണ്‍ ബ്രിട്ടാസ് തുടങ്ങിയ നേതാക്കളെയാണ് ഡല്‍ഹി പോലീസ് കസ്റ്റഡിയില്‍ എടുത്തത്.
Comments