മിമിക്രി വേദികളില്‍ ചിരിപ്പിച്ചും ചിന്തിപ്പിച്ചും കൈയടി നേടിയ ശേഷം കമലിന്റെ സംവിധാന സഹായിയായി ക്യാമറയ്ക്ക് പിന്നിലെത്തി, അഭിനയമെന്ന വലിയ സ്വപ്നത്തിലേക്ക് സഹനായക വേഷങ്ങളിലൂടെ കയറിക്കൂടി അവസാനം ജനപ്രിയനായകനായി പ്രേക്ഷകമനസ്സിലിടം നേടിയ അഭിനേതാവാണ് ദിലീപ്. ഒരു സമയത്ത് തിയേറ്ററുകളില്‍ നിറയെ ദിലീപിന്റെ ബ്ലോക്ക്ബസ്റ്റര്‍ ചിത്രങ്ങളുടെ ചാകരയായിരുന്നു.
എന്നാല്‍ മഞ്ജുവിനൊപ്പമുള്ള വിവാഹജീവിതത്തിലെ തകര്‍ച്ച ദിലീപിനെ സിനിമകളെയും ചെറുതായി ബാധിച്ചു. നടിയെ ആക്രമിച്ച കേസിലേക്ക് ദിലീപിന്റെ പേര് വലിച്ചിഴയ്ക്കപ്പെട്ടതോടു കൂടി ദിലീപിന്റെ കരിയര്‍ പൂര്‍ണ്ണമായും തകര്‍ന്നുവെന്നു തന്നെ പറയാം. ജയില്‍വാസത്തിനു ശേഷം സിനിമയിലെത്തിയ ദിലീപ് ഇക്കഴിഞ്ഞ വര്‍ഷമാണ് നടിയെ ആക്രമിച്ച കേസില്‍ നിന്ന് കുറ്റവിമുക്തനായത്. പിന്നാലെ പ്രിന്‍സ് ആന്‍ഡ് ഫാമിലി എന്ന ചിത്രം ഹിറ്റായതോടെ കരിയറിലും തന്റെ തിളക്കം തിരിച്ചു പിടിക്കാന്‍ ദിലീപിനു കഴിഞ്ഞു.
ഇപ്പോഴിതാ താന്‍ അനുഭവിച്ച വ്യക്തിഹത്യയും പ്രതിസന്ധികളും തന്റെ പ്രിയപ്പെട്ട പ്രേക്ഷകരുമായി പങ്കുവയ്ക്കകയാണ് ദിലീപ്. ഖത്തറില്‍ ദിലീപ് ഫാൻസ് അസോസിയേഷന്റെ 10-ാം വാർഷികാഘോഷത്തിന്റെ ഭാഗമായി നടത്തിയ പരിപാടിയില്‍ ആരാധകരുമായി സംസാരിച്ചപ്പോഴാണ് ദിലീപ് മനസ്സു തുറന്നത്. കഴിഞ്ഞ പത്ത് വർഷക്കാലം സത്യം തുറന്നു പറയാൻ പറ്റാത്ത രീതിയിൽ തന്റെ കൈകാൽ കെട്ടിയിട്ട അവസ്ഥയിലായിരുന്നുവെന്നും മനസാ വാചാ അറിയാത്ത ഒരു കാര്യത്തിനാണ് താൻ ജയിലിലായതെന്നും താരം തുറന്നു പറഞ്ഞു.
‘‘ഞാൻ മനസ്സാ വാചാ അറിയാത്തൊരു കാര്യത്തിന് എന്നെ പിടിച്ച് അകത്തിട്ട്, കഴിഞ്ഞ പത്ത് വർഷക്കാലം, എനിക്ക് എന്റേതായ രീതിയിൽ എന്താണെന്ന് സത്യം എന്നു പറയാൻ പറ്റാത്ത രീതിയിൽ കൈകാൽ കെട്ടിയിട്ട അവസ്ഥയിലിട്ടു. അത്രയും ഞാൻ കഷ്ടപ്പെട്ട് ഉണ്ടാക്കിയെടുത്ത നിങ്ങൾ തന്ന സ്നേഹം. എന്റെ കഥാപാത്രങ്ങളിലൂടെ ദിലീപ് എന്ന കലാകാരനെ ഉണ്ടാക്കിയത് നിങ്ങളാണ്.
ആ എനിക്ക്, ശരിക്കു പറഞ്ഞാൽ ദിലീപ് ഫാൻസ് എന്ന പേരിലുളള അംഗങ്ങളും എന്റെ സിനിമയിലെ കഥാപാത്രങ്ങളിലൂടെ എന്നെ സ്നേഹിച്ച നിങ്ങളും, എനിക്കു വേണ്ടി പ്രാർഥിച്ച ഒരുപാട് ആളുകളുണ്ട്. പ്രായഭേദമന്യേ അമ്മമാരും സഹോദരികളും സഹോദരന്മാരും കൊച്ചു കുഞ്ഞുങ്ങളും വരെ എനിക്കു വേണ്ടി പ്രാർഥിച്ചിട്ടുണ്ടെന്ന് എനിക്കറിയാം. ആ പ്രാർഥയുടെ ഫലമാണ് ഞാനിവിടെ നിൽക്കുന്നത്.
ആ വലിയ യുദ്ധത്തിൽ, സുനാമിയിൽപെട്ട എന്നെ പിടിച്ചു നിർത്തിയത് നിങ്ങളാണ്, നിങ്ങളുെട പ്രാർഥനയാണ്. അതിന് നിങ്ങൾ ഓരോരുത്തരോടും കൈപിടിച്ചു നന്ദി പറയുകയാണ്...’’ എന്നാണ് ദിലീപ് പറഞ്ഞത്. തനിക്ക് നേരിട്ട വലിയ പ്രതിസന്ധി ഘട്ടത്തിലും പ്രാർത്ഥനകളിലൂടെയും പിന്തുണയിലൂടെയും ഒപ്പം നിന്ന ആരാധകർക്കും കുടുംബങ്ങൾക്കും താരം നന്ദി അറിയിക്കുകയും ചെയ്തു. നിറകൈയടിയോടെയാണ് ദിലീപിന്റെ വാക്കുകളെ സദസ്സും പ്രേക്ഷകരും ആരാധകരും ഏറ്റെടുത്തത്. ജഗൻ ഷാജി കൈലാസ് സംവിധാനം ചെയ്യുന്ന ‘നീക്കം’ മാണ് താരത്തിന്റെ റിലീസ് കാത്തിരിക്കുന്ന ചിത്രം. ദുരൂഹതകളും ഉദ്വേഗവും നിറത്ത മുഹൂർത്തങ്ങളുമായി സിനിമയുടെ ടീസർ ഇക്കഴിഞ്ഞ ദിവസം പ്രേക്ഷകര്‍ക്ക് മുന്നിലെത്തിയിരുന്നു. തികച്ചും ഗൗരവമായ ഒരു കഥാപാത്രമായി ഇതുവരെ കാണാത്ത വ്യത്യസ്തമായ ഗെറ്റപ്പിലാണ് താരം ഇതിലഭിനയിക്കുന്നത്.
Comments