ന്യൂഡൽഹി: പൊലീസ് കസ്റ്റഡിയിലായിരുന്ന യൂട്യൂബർ ധ്രുവ് റാഠിയെ ഡൽഹി പോലീസ് വെള്ളിയാഴ്ച രാത്രി വൈകി വിട്ടയച്ചു. എന്നിരുന്നാലും, കോക്രോച്ച് ജനത പാർട്ടിയുടെ ഞായറാഴ്ച നടക്കുന്ന പ്രതിഷേധത്തിൽ പങ്കെടുക്കാനായി ജന്തർമന്തറിലേക്ക് പോകരുതെന്ന് അദ്ദേഹത്തിന് മുന്നറിയിപ്പ് നൽകിയിട്ടുണ്ടെന്നാണ് റിപ്പോർട്ടുകൾ. ജന്തർമന്തറിൽ സിജെപി നടത്താൻ നിശ്ചയിച്ചിരുന്ന പ്രതിഷേധ സമരത്തിന് മുന്നോടിയായി റാഠിയെ ഗുഡ്‌ഗാവിലെ വസതിയിൽ നിന്നായിരുന്നു പോലീസ് കസ്റ്റഡിയിലെടുത്തത്.
ധ്രുവ് റാഠി മുമ്പ് നരേന്ദ്ര മോദിയെ വിമര്‍ശിച്ചുകൊണ്ട് ശ്രദ്ധനേടിയ ആളാണ്. ബെംഗളൂരുവിൽ നടന്ന പ്രതിഷേധത്തിൽ സജീവ സാന്നിധ്യമായിരുന്നു. വിദേശത്ത് താമസിക്കുന്ന രാഠി, പ്രതിഷേധത്തിൽ പങ്കെടുക്കാനായി എത്തിയതായിരുന്നു. മൂന്ന് ക്രൈംബ്രാഞ്ച് സംഘങ്ങൾ ചേർന്ന് കഴിഞ്ഞ ദിവസം രാവിലെ 6 മണിയോടെയാണ് റാഠിയെ കസ്റ്റഡിയിലെടുത്തത്. തുടർന്ന് അദ്ദേഹത്തെ ഒരു ക്രൈംബ്രാഞ്ച് ഓഫീസിലേക്ക് കൊണ്ടുപോകുകയും ഏകദേശം ഒരു മണിക്കൂറോളം ചോദ്യം ചെയ്യുകയും ചെയ്തു. ചോദ്യം ചെയ്യലിന് ശേഷം, റാഠിയുമായി പോയ വാഹനം ഉൾപ്പെടെ മൂന്ന് കാറുകളുടെ അകമ്പടിയോടെയുള്ള സംഘം ഡൽഹിയിലേക്ക് എത്തി.
റാഠിയെ കസ്റ്റഡിയിൽ എടുത്ത നടപടിയെ സിജെപി ശനിയാഴ്ച ശക്തമായി അപലപിച്ചിരുന്നു. ഡൽഹിയിലെ ജന്തർ മന്തറിലെ പ്രതിഷേധ സ്ഥലത്തേക്ക് യാത്ര ചെയ്യാനൊരുങ്ങിയ റാഠിയെയും മറ്റ് നൂറുകണക്കിന് യുവാക്കളെയും ഉപാധികളില്ലാതെ ഉടൻ മോചിപ്പിക്കണമെന്ന് സംഘടന ആവശ്യപ്പെട്ടിരുന്നു.
Comments