പ്രശസ്ത നടി ശാരദയ്ക്കൊപ്പമുള്ള ചിത്രങ്ങൾ സമൂഹമാധ്യമങ്ങളിൽ പങ്കുവെച്ച് നടനും ദേശീയ ചലച്ചിത്ര വികസന കോർപ്പറേഷൻ ചെയർമാനുമായ കൃഷ്ണകുമാർ. ചെന്നൈയിലെ നടിയുടെ വീട്ടിലെത്തിയാണ് കൃഷ്ണകുമാർ ശാരദയെ സന്ദർശിച്ചത്. ഇരുവരും തമ്മിലുള്ള സൗഹൃദത്തെക്കുറിച്ചും വിശേഷങ്ങൾ പങ്കുവെച്ചതിനെക്കുറിച്ചും കൃഷ്ണകുമാർ ചിത്രത്തോടൊപ്പം പങ്കുവെച്ച കുറിപ്പിൽ പറയുന്നുണ്ട്.
‘ശാരദ ചേച്ചിയെ പരിചയപ്പെടുന്നത് 1993 ൽ ഡൽഹിയിൽ ഇന്ത്യ ഗേറ്റിനു മുന്നിൽ, കാശ്മീരം സിനിമയുടെ സെറ്റിൽ വെച്ചാണ്. ചേച്ചിയുടെ മകൻ ആയിട്ടാണ് അഭിനയിച്ചത്. ആദ്യ ദിവസം തന്നെ ഞങ്ങൾ കൂട്ടായി. പിന്നീട് ആ ബന്ധം വളർന്നു. സിനിമയിൽ തുടരുമ്പോൾ തന്നെ ചേച്ചി ആന്ധ്രയിലെ തെന്നാലി ലോക്സഭാ മണ്ഡലത്തിൽ നിന്ന് തെലുങ്ക്ദേശം പാർട്ടിയുടെ എംപി ആയി.. അപ്പോഴും ആ ബന്ധം തുടർന്നു.. ഇടയ്ക്കു സംസാരിക്കും, ചെന്നൈയിൽ ചേച്ചിയുടെ വീട്ടിൽ പോയി കാണും. സിന്ധുവിനെയും മക്കളെയും വലിയ ഇഷ്ടമാണ്.
ഇന്നലെ ചെന്നൈയിൽ ചേച്ചിയുടെ വീട്ടിൽ പോയി കണ്ടു. കുറേ നേരം സംസാരിച്ചു. ഡൽഹി സെറ്റിലെ വിശേഷങ്ങൾ പറഞ്ഞു ചിരിച്ചു.. എന്റെ അച്ഛനും അമ്മക്കും വളരെ ഇഷ്ടമുള്ള ഒരു നടിയാണ് ശാരദ. അമ്മ പണ്ട് പറയുമായിരുന്നു.. ശാരദയെ ഒന്ന് കാണണം. മനുഷ്യർ പലതും ആഗ്രഹിക്കും.. ചിലതു നടക്കും.. ചിലതു വളരെ അടുത്തുണ്ടെങ്കിലും നേടാനാവില്ല.. ഇന്നലെ ചേച്ചിയോടൊപ്പം ഇരുന്നപ്പോൾ അമ്മയെ ഓർത്തു.. അമ്മ ഇരിക്കുന്ന ലോകത്തു നിന്നു ഇതെല്ലാം കാണാൻ കഴിയുന്നുണ്ടോ എന്നു അറിയില്ല.. കാണുന്നുണ്ടെങ്കിൽ സന്തോഷം..’ എന്നായിരുന്നു കൃഷ്ണകുമാറിന്റെ വാക്കുകൾ.
ഇന്ത്യൻ സിനിമയിലെ തന്നെ എക്കാലത്തെയും മികച്ച നടികളിൽ ഒരാളായ ശാരദ, മൂന്ന് തവണ മികച്ച നടിക്കുള്ള ദേശീയ ചലച്ചിത്ര പുരസ്‌കാരം നേടിയിട്ടുള്ള പ്രതിഭയാണ്. മലയാളം, തെലുങ്ക് ഭാഷകളിൽ ഒട്ടനവധി അനശ്വര കഥാപാത്രങ്ങൾക്ക് ജീവൻ നൽകിയ അവർ, മലയാള സിനിമയ്ക്കുള്ള സമഗ്ര സംഭാവനയ്ക്കുള്ള കേരള സർക്കാരിന്റെ പരമോന്നത ചലച്ചിത്ര പുരസ്‌കാരമായ ജെ.സി. ഡാനിയേൽ പുരസ്‌കാരത്തിനും അർഹയായിട്ടുണ്ട്.
Comments