മുംബൈ: സിജെപി നേതൃത്വത്തിൽ നിന്ന് പ്രതിഷേധത്തിന്റെ ബാറ്റൺ ഏറ്റെടുത്ത അജിങ്ക്യ ഷിൻഡെ കളത്തിലിറങ്ങി. ഡൽഹിയിലും രാജ്യത്തിന്റെ മറ്റ് ഭാഗങ്ങളിലും തങ്ങളുടെ നേതാക്കളെയും പ്രതിഷേധക്കാരെയും ബലമായി കസ്റ്റഡിയിലെടുത്തതിൽ പ്രതിഷേധിച്ച് മുംബൈയിലെ ശിവാജി പാർക്കിൽ 'കോക്രോച്ച് ജനത പാർട്ടി' (സിജെപി) നേതാവ് അജിങ്ക്യ ഷിൻഡെ ഞായറാഴ്ച പ്രതിഷേധത്തിന് ആഹ്വാനംചെയ്തു. സർക്കാർ ജനാധിപത്യത്തെ അടിച്ചമർത്തുകയാണെന്ന് അദ്ദേഹം ആരോപിച്ചു.
എക്‌സിലൂടെയാണ ഷിൻഡെ പ്രതിഷേധ വിവരം പങ്കുവെച്ചത്: "മോദിയും ഷായും ചേർന്ന് തങ്ങളുടെ പ്രിയപ്പെട്ട രാജ്യത്തെ ഒരു ഏകാധിപത്യത്തിലേക്ക് തള്ളിവിടുന്നതിൽ ഓരോ ഇന്ത്യക്കാരനും കോപാകുലനാണ്. ഇന്നലെ ഡൽഹിയിലും ഇന്ത്യയിലുടനീളവുമായി പതിനായിരക്കണക്കിന് ആളുകളെ കസ്റ്റഡിയിലെടുത്ത രീതിയെ ചോദ്യം ചെയ്യാതിരിക്കില്ല. ഏകാധിപത്യത്തിനെതിരെ രാജ്യത്തുടനീളം പ്രതിഷേധങ്ങൾ ആരംഭിച്ചുകഴിഞ്ഞു." ഞായറാഴ്ച വൈകിട്ട് 4 മണിക്ക് ശിവാജി പാർക്കിലെ ടി ജംഗ്ഷനിൽ ഒത്തുകൂടാൻ തന്റെ പോസ്റ്റിൽ ഷിൻഡെ ആളുകളോട് അഭ്യർത്ഥിച്ചു.
പ്രഖ്യാപനത്തിന് പിന്നാലെ ദാദറിലെ ശിവാജി പാർക്കിൽ മുംബൈ പോലീസ് സുരക്ഷ ശക്തമാക്കി. സ്ഥലത്ത് പോലീസ് ഉദ്യോഗസ്ഥരെ വിന്യസിച്ചിരിക്കുന്ന ദൃശ്യങ്ങൾ ഓൺലൈനിൽ പുറത്തുവന്നിട്ടുണ്ട്. ശനിയാഴ്ച അഭിജിത് ദീപ്‌കെ, അശുതോഷ് രങ്ക, സൗരവ് ദാസ് എന്നിവർ കസ്റ്റഡിയിലായതിനെ തുടർന്ന് ദീപ്‌കെയുടെ അടുത്ത അനുയായിയായ ഷിൻഡെയെ ഡൽഹിയിലെ ജന്തർ മന്തറിൽ പ്രതിഷേധത്തിന് നേതൃത്വം നൽകാൻ ചുമതലപ്പെടുത്തുകയായിരുന്നു.
Comments