അമിതാഭ് ബച്ചന് ഹൃദ്യമായ ജന്മദിനാശംസകൾ നേർന്ന് തെലുങ്ക് സൂപ്പർസ്റ്റാർ ചിരഞ്ജീവി. ബച്ചനെ കെട്ടിപ്പിടിച്ചു നിൽക്കുന്ന ചിത്രം എക്സിൽ പങ്കുവെച്ചുകൊണ്ടായിരുന്നു ചിരഞ്ജീവിയുടെ ആശംസ. അദ്ദേഹത്തെ തന്റെ ഏറ്റവും പ്രിയപ്പെട്ട 'ഗുരുജി' എന്ന് വിശേഷിപ്പിച്ച ചിരഞ്ജീവി, സിനിമയോടുള്ള ബച്ചന്റെ അഭിനിവേശത്തെയും കലയോടുള്ള ആദരവിനെയും പ്രത്യേകം പ്രശംസിച്ചു.
"എന്റെ പ്രിയപ്പെട്ട ഗുരുജിക്ക് ജന്മദിനാശംസകള്‍. സിനിമയോടുളള നിങ്ങളുടെ സ്‌നേഹവും കലയോട് നിങ്ങള്‍ കാണിക്കുന്ന ആദരവും എക്കാലത്തും എനിക്ക് ഒരു വലിയ പ്രചോദനമാണ്. നിങ്ങളുടെ ഉയരത്തിലുളള നേട്ടങ്ങള്‍ക്കപ്പുറം, നിങ്ങളുടെ സ്‌നേഹവും എളിമയുമാണ് നിങ്ങളെ വളരെ പ്രത്യേകതയുള്ളവരാക്കുന്നത്. നല്ല ആരോഗ്യവും അനന്തമായ സന്തോഷവും നിങ്ങള്‍ ഇഷ്ടപ്പെടുന്ന കാര്യങ്ങള്‍ ചെയ്തുകൊണ്ട് കൂടുതല്‍ വര്‍ഷങ്ങളും ആശംസിക്കുന്നു. സ്‌നേഹത്തോടും ആദരവോടും കൂടി, സര്‍!" - ചിരഞ്ജീവി കുറിച്ചു.
2019-ല്‍ പുറത്തിറങ്ങിയ 'സൈ രാ നരസിംഹ റെഡ്ഡി' എന്ന ചിത്രത്തില്‍ അമിതാഭ് ബച്ചനും ചിരഞ്ജീവിയും ഒന്നിച്ച് അഭിനയിച്ചിട്ടുണ്ട്. സ്വാതന്ത്ര്യസമര സേനാനിയുടെ കഥ പറഞ്ഞ ഈ ചിത്രത്തില്‍ ഗോസായി വെങ്കണ്ണ എന്ന ആത്മീയ ഗുരുവിന്റെ വേഷത്തിലാണ് ബച്ചന് എത്തിയത്.
1969-ല്‍ 'സാത് ഹിന്ദുസ്ഥാനി' എന്ന ചിത്രത്തിലൂടെ അന്‍വര്‍ അലി എന്ന കഥാപാത്രത്തെ അവതരിപ്പിച്ചുകൊണ്ടാണ് ബച്ചന് തന്റെ അഭിനയജീവിതം ആരംഭിച്ചത്. തുടക്കത്തില്‍ ബോക്‌സ് ഓഫീസില്‍ ചില വെല്ലുവിളികള്‍ നേരിട്ടെങ്കിലും, 'ആനന്ദ്' (1971), 'ബോംബെ ടു ഗോവ' (1972) തുടങ്ങിയ ചിത്രങ്ങളിലെ വേഷങ്ങള്‍ അദ്ദേഹത്തിന് വലിയ പ്രശസ്തി നേടിക്കൊടുത്തു. അന്നുമുതല്‍ വിവിധ തരം സിനിമകളിലും വ്യത്യസ്ത തലമുറകളില്‍പ്പെട്ട നടന്മാര്‍ക്കൊപ്പവും അദ്ദേഹം അഭിനയിച്ചിട്ടുണ്ട്. ടി.ജെ. ജ്ഞാനവേല്‍ സംവിധാനം ചെയ്ത 'വേട്ടയ്യന്‍' എന്ന തമിഴ് ചിത്രമാണ് അമിതാഭ് ബച്ചന്റെ സമീപകാലത്തെ പ്രധാന റിലീസുകളിൽ ഒന്ന്.
Comments