സിനിമാ പ്രേമികള്‍ ഏറെ ആകാംഷയോടെ കാത്തിരിക്കുന്ന രജനികാന്ത് ചിത്രമാണ് ജയിലര്‍ 2. വന്‍ താരനിരയാണ് ചിത്രത്തില്‍ അണിനിരക്കുന്നത്. എന്നാല്‍ ഒരുതാരം ഇല്ലെന്നത് മിസ്സിങ്ങാണെന്ന് പറയുകയാണ് രജനികാന്ത്.
ജയിലര്‍ 2 വിന്റെ റിലീസിന് മുമ്പായി നടത്തിയ സൂപ്പര്‍ ഷോയില്‍ സംസാരിക്കുകയായിരുന്നു അദ്ദേഹം. ആദ്യ ഭാഗത്തില്‍ ഒരു പാട്ട് രംഗത്തിലെത്തി തരംഗം സൃഷ്ടിച്ച തമന്ന രണ്ടാം ഭാഗത്തിലില്ലെന്നത് സങ്കടകരമാണെന്നാണ് രജനികാന്ത് പറയുന്നത്. രണ്ടാം ഭാഗത്തില്‍ ഒരു പാട്ടിലെങ്കിലും തമന്നയെ കൊണ്ടുവരാമായിരുന്നുവെന്ന് താന്‍ നെല്‍സണോട് പറഞ്ഞിരുന്നുവെന്നും രജനി പറയുന്നു.
‘ഒരേയൊരു മിസ്സിങ് നമ്മുടെ തമന്നയാണ്. രണ്ട് പാട്ടുണ്ട്. ഒരു പാട്ടില്‍ തമന്നയെ വെക്കാമെന്ന് ഞാന്‍ നെല്‍സണോട് പറഞ്ഞിരുന്നു. നിങ്ങള്‍ക്ക് ഇഷ്ടമാണെന്ന് കരുതി വെക്കാനാകില്ലെന്നായിരുന്നു മറുപടി. എനിക്ക് ഇഷ്ടമായതു കൊണ്ടല്ല, ജനങ്ങള്‍ക്ക് ഇഷ്ടമാണ് അതുകൊണ്ടാണ് സാര്‍ എന്ന് ഞാന്‍ പറഞ്ഞു. എനിക്ക് ഇഷ്ടമുള്ളത് ചെയ്യാനാണെങ്കില്‍ വര്‍ഷങ്ങള്‍ക്ക് മുമ്പേ ബാംഗ്ലൂരിലേക്ക് തിരികെ പോയിട്ടുണ്ടാകും. ജനങ്ങള്‍ക്ക് ഇഷ്ടമുള്ളത് ചെയ്തതു കൊണ്ടാണ് ഇവിടെ നില്‍ക്കുന്നതെന്ന് ഞാന്‍ പറഞ്ഞു’ എന്നാണ് രജനികാന്ത് പറയുന്നത്.
2023 ല്‍ പുറത്തിറങ്ങി വലിയ വിജയമായി മാറിയ ജയിലറിന്റെ രണ്ടാം ഭാഗം ഒക്‌ടോബര്‍ 15 നാണ് തിയേറ്ററുകളിലെത്തുക. മോഹന്‍ലാല്‍, ശിവരാജ് കുമാര്‍, രമ്യ കൃഷ്ണന്‍, മിര്‍ന തുടങ്ങിയ ആദ്യ ഭാഗത്തിലെ താരങ്ങള്‍ക്കൊപ്പം സുരാജ് വെഞ്ഞാറമൂട്, വിദ്യ ബാലന്‍, മിഥുന്‍ ചക്രവര്‍ത്തി, എസ്ജെ സൂര്യ, ഹൃത്വിക് റോഷന്‍, തുടങ്ങിയവരും ചിത്രത്തിലുണ്ട്. ചിത്രത്തിന്റെ ട്രെയിലര്‍ കഴിഞ്ഞ ദിവസമാണ് പുറത്തിറങ്ങിയത്. സണ്‍ പിക്ചേഴ്സിന്റെ ബാനറില്‍ കലാനിധി മാരന്‍ ആണ് ചിത്രം നിര്‍മിക്കുന്നത്.
Comments