ന്യൂഡല്‍ഹി: എസ്.ഐ.ആര്‍. ക്രമക്കേടുകള്‍ ആരോപിച്ച് നടക്കുന്ന പ്രതിഷേധത്തില്‍ സുപ്രീം കോടതിയിലേക്ക് മാര്‍ച്ച് നടത്താന്‍ പ്രതിപക്ഷം. ഇത് 'ചലോ ദില്ലി - ജനാധിപത്യത്തിനായുള്ള മാര്‍ച്ച്' എന്ന് വിശേഷിപ്പിച്ച കോണ്‍ഗ്രസ്, ഉച്ചയ്ക്ക് 1:30-ന് കണാട്ട് പ്ലേസ്-ബരാഖംബ റോഡ് ജങ്ഷനില്‍ ഒത്തുകൂടുമെന്ന് അറിയിച്ചു. പാര്‍ട്ടി, ലിംഗഭേദം, ജാതി, മതം, സംസ്ഥാനം എന്നിവയ്ക്ക് അതീതമായി ഭാരതീയര്‍ ഒന്നിച്ചായിരിക്കും സുപ്രീം കോടതിയിലേക്ക് മാര്‍ച്ച് ചെയ്യുക എന്ന് കോണ്‍ഗ്രസ് നേതാവ് രാഹുല്‍ ഗാന്ധി ഞായറാഴ്ച പറഞ്ഞു.
മാര്‍ച്ചിന് മുന്നോടിയായി, ചീഫ് ജസ്റ്റിസ് സൂര്യ കാന്തിനെ കാണാന്‍ പ്രതിപക്ഷ നേതാക്കള്‍ ശ്രമം നടത്തിയെങ്കിലും അനുമതി കിട്ടിയില്ല. വോട്ട് ചോരി അവസാനിപ്പിക്കുക, മുഖ്യ തിരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിന്റെ രാജി, എസ്.ഐ.ആര്‍ നിര്‍ത്തിവെയ്ക്കുക, വീണ്ടും ബാലറ്റ് പേപ്പറിലേക്ക് മടങ്ങുക എന്നീ ആവശ്യങ്ങള്‍ അടങ്ങിയ നിവേദനം സമര്‍പ്പിക്കും. പ്രതിപക്ഷ നേതാക്കളായ രാഹുല്‍ ഗാന്ധിയും മല്ലികാര്‍ജുന്‍ ഖാര്‍ഗെയും ഇന്ന് വൈകുന്നേരം ചീഫ് ജസ്റ്റിസിനെ കാണാന്‍ അനുവാദം ചോദിച്ച് കത്തയച്ചിരുന്നു. എന്നാല്‍ അപേക്ഷ ചീഫ് ജസ്റ്റിസ് നിരസിച്ചു.
ഈ വിഷയം സുപ്രീം കോടതിയുടെ പരിഗണനയിലാണെന്നും, ചീഫ് ജസ്റ്റിസ് സൂര്യ കാന്ത് തന്നെയാണിതിന്മേലുള്ള ബെഞ്ചിന് നേതൃത്വം നല്‍കുന്നതെന്നും ചീഫ് ജസ്റ്റീസിന്റെ ഓഫീസ് ചൂണ്ടിക്കാണിച്ചു. കൂടാതെ, ഈ വിഷയത്തില്‍ ഒരു ഭരണപരമായ യോഗത്തിന് ശേഷം ഉത്തരവുകള്‍ പുറപ്പെടുവിക്കാന്‍ കഴിയില്ലെന്നും ഇക്കാര്യത്തില്‍ വാദം കേള്‍ക്കണമെന്ന് ആഗ്രഹിക്കുന്നുവെങ്കില്‍ രാഹുല്‍ ഗാന്ധിക്കും ഖാര്‍ഗെക്കും കോടതിയില്‍ ഒരു ഹര്‍ജി സമര്‍പ്പിക്കാമെന്നും വൃത്തങ്ങള്‍ അറിയിച്ചു.
പ്രധാന തിരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിനെ ഉടന്‍ പുറത്താക്കണമെന്ന് ആവശ്യപ്പെട്ട് ചൊവ്വാഴ്ച മുതല്‍ പ്രതിപക്ഷ കക്ഷികള്‍ പ്രതിഷേധം നടത്തിവരികയാണ്. ചൊവ്വാഴ്ച പാര്‍ലമെന്റില്‍ നിന്ന് തിരഞ്ഞെടുപ്പ് കമ്മീഷനിലേക്ക് മാര്‍ച്ച് നടത്തിയെങ്കിലും വഴിയില്‍ വെച്ച് അവരെ തടഞ്ഞു. തുടര്‍ന്ന് ആകാശവാണി ഭവന്‍ കോംപ്ലക്‌സില്‍ എട്ട് മണിക്കൂര്‍ സമരം നടത്തിയ രാഹുല്‍ ഗാന്ധിയെ പിന്നീട് അവിടെനിന്നും നീക്കം ചെയ്യുകയായിരുന്നു.
Comments