പഞ്ചാബിലെ ലുധിയാനയിൽ ഐഫോൺ 17 പ്രോ മാക്സ് മോഷ്ടിച്ച് സ്കൂട്ടറിൽ രക്ഷപ്പെടാൻ ശ്രമിച്ചയാളെ തടയുന്നതിനിടെ കടയുടമയ്ക്ക് പരിക്കേറ്റു. മോഷ്ടാവിന്റെ സ്കൂട്ടറിന്റെ പിൻഭാഗത്ത് പിടിച്ച കടയുടമയെ വാഹനം മുന്നോട്ടെടുത്തതോടെ റോഡിലൂടെ 10 മുതൽ 15 മീറ്റർ വരെ വലിച്ചിഴയ്ക്കുകയായിരുന്നു. സംഭവത്തിന്റെ ദൃശ്യങ്ങൾ സിസിടിവി ക്യാമറയിൽ പതിഞ്ഞതോടെ സമൂഹമാധ്യമങ്ങളിൽ പ്രചരിച്ചുകൊണ്ടിരിക്കുകയാണ്.
മീത് എന്ന കടയുടമയുടെ മൊബൈൽ ഫോൺ കടയിലാണ് സംഭവം നടന്നത്. രാവിലെ 11 മണിയോടെ കടയിലെത്തിയ യുവാവ് തവണകളായി പണം നൽകി ഐഫോൺ വാങ്ങുന്നതിനെക്കുറിച്ച് അന്വേഷിച്ചശേഷം മടങ്ങിപ്പോയി. എന്നാൽ ഉച്ചയ്ക്ക് 2.55-ഓടെ ഇയാൾ വീണ്ടും കടയിലെത്തി ഫോണുകൾ പരിശോധിച്ചു. ഇതിനിടെ ഐഫോൺ 17 പ്രോ മാക്സ് ഷർട്ടിനുള്ളിൽ ഒളിപ്പിച്ച് കടയിൽനിന്ന് പുറത്തേക്ക് ഓടുകയായിരുന്നു. ഫോൺ മോഷണം പോയെന്ന് മനസ്സിലാക്കിയ മീത് ഉടൻതന്നെ ഇയാളെ പിന്തുടർന്നു.
കടയ്ക്കു പുറത്ത് നിർത്തിയിട്ടിരുന്ന ആക്ടീവ സ്കൂട്ടറിൽ രക്ഷപ്പെടാൻ ശ്രമിച്ച യുവാവിനെ മീത് തടയാൻ ശ്രമിച്ചു. സ്കൂട്ടറിന്റെ പിൻഭാഗത്ത് പിടിച്ചെങ്കിലും യുവാവ് വേഗം കൂട്ടി മുന്നോട്ടുപോയതോടെ കടയുടമ റോഡിലൂടെ വലിച്ചിഴയ്ക്കപ്പെട്ടു. ഏതാനും മീറ്ററുകൾ മുന്നോട്ടുപോയ സ്കൂട്ടറിന്റെ നിയന്ത്രണം നഷ്ടപ്പെട്ട് യുവാവ് താഴെ വീണു. തുടർന്ന് മോഷ്ടിച്ച ഫോണും സ്കൂട്ടറും ഉപേക്ഷിച്ച് ഇയാൾ സ്ഥലത്തുനിന്ന് ഓടിരക്ഷപ്പെട്ടതായാണ് റിപ്പോർട്ട്.
സംഭവത്തിൽ മീതിന്റെ കാൽമുട്ടുകൾക്ക് പരിക്കേറ്റു. മോഷ്ടാവിനെ തടയാൻ ശ്രമിക്കുന്നതിനിടെ സമീപത്തെ ചില കടയുടമകൾ സംഭവം കണ്ടിട്ടും സഹായിക്കാൻ മുന്നോട്ടുവന്നില്ലെന്നും അദ്ദേഹം നിരാശ പ്രകടിപ്പിച്ചു. പ്രതിയുടെ വ്യക്തിവിവരങ്ങളും അന്വേഷണത്തിന്റെ തുടർനടപടികളും സംബന്ധിച്ച കൂടുതൽ വിവരങ്ങൾ പുറത്തുവന്നിട്ടില്ല. കടയുടമയെ സ്കൂട്ടറിൽ വലിച്ചിഴയ്ക്കുന്ന ദൃശ്യങ്ങളാണ് ഇപ്പോൾ സമൂഹമാധ്യമങ്ങളിൽ ശ്രദ്ധ നേടുന്നത്.
Comments