തിരുവനന്തപുരം: ഫോണ്‍വിളിച്ചിട്ട് എടുത്തില്ലെന്ന് ആരോപിച്ച് യുവതിക്ക് നേരെ ട്രെയിനില്‍ യുവാവിന്റെ ആക്രമണം. യുവതിയുടെ പരാതിയില്‍ വര്‍ക്കല പോലീസ് വര്‍ക്കല സ്വദേശിയായ ബോബി എന്നയാളെ പിടികൂടി. ട്രെയിനിലും റെയില്‍വേ സ്‌റ്റേഷനിലും സമീപത്തെ ഒരു വീടിനുള്ളിലിട്ടും ക്രൂരമായി മര്‍ദ്ദിച്ചെന്നാണ് പരാതിയില്‍ പറയുന്നത്.
യുവാവുമായുള്ള പ്രണയത്തില്‍ നിന്നും യുവതി പിന്മാറിയതാണ് പ്രകോപനത്തിന് കാരണമെന്ന് സംശയിക്കുന്നുണ്ട്. കഴിഞ്ഞ 9 ാം തീയതിയായിരുന്നു സംഭവം. തിരുവനന്തപുരത്ത് നിന്നും കൊല്ലത്തേക്ക് പോകുകയായിരുന്നു യുവതി. ഇതിനിടയില്‍ ട്രെയിനില്‍ കയറിയ യുവാവ് യുവതിയോട് ഫോണ്‍ വിളിച്ചാല്‍ എടുക്കാത്തത് എന്താണെന്ന് ചോദിച്ചു. താന്‍ വിളിച്ചാല്‍ ഞാന്‍ എടുക്കുന്നത് എന്തിനാണെന്ന് ചോദിച്ചപ്പോള്‍ യുവതിയെ യുവാവ് മര്‍ദ്ദിക്കുകയായിരുന്നു.
തുടര്‍ന്ന് വര്‍ക്കല സ്‌റ്റേഷനിലെ പ്ലാറ്റ്‌ഫോമില്‍ വെച്ചും മര്‍ദ്ദിച്ചു. പിന്നീടും യുവതിക്ക് നേരെ മര്‍ദ്ദനം തുടര്‍ന്നു. സമീപത്തെ വീട്ടില്‍ വെച്ച് ചവിട്ടുകയും ഇടിക്കുകയും തല്ലുകയും തല ഭിത്തിയില്‍ ഇടുപ്പിക്കുകയും ചെയ്തതായിട്ടാണ് പരാതിയില്‍ ആരോപിച്ചിരിക്കുന്നത്. യുവതിയുടെ ഫോണ്‍ പിടിച്ചുവാങ്ങി നിലത്തെറിഞ്ഞ് പൊട്ടിക്കുകയും ചെയ്തു. തുടര്‍ന്ന് യുവതി പോലീസില്‍ പരാതി നലകുകയും യുവാവിനെ വര്‍ക്കല പോലീസ് പിടികൂടുകയുമായിരുന്നു.
Comments