തമിഴ് സിനിമയിലൂടെ അരങ്ങേറ്റം കുറിച്ച്, മോഹന്‍ലാല്‍ നായകനായ ബിഗ് ബ്രദറിലൂടെ ശ്രദ്ധിക്കപ്പെട്ട താരമാണ് മിര്‍ണ മേനോന്‍. രജനികാന്ത് നായകനായ ‘ജയിലര്‍’ സിനിമയിലൂടെയാണ് മിര്‍ണ പ്രേക്ഷകര്‍ക്ക് പ്രിയങ്കരിയായത്. ചിത്രത്തിൽ രജനീകാന്തിന്റെ മരുമകളായി ശ്വേത പാണ്ഡ്യൻ എന്ന കഥാപാത്രത്തിലൂടെ മിര്‍ണ തിളങ്ങി. ചുരുക്കം സിനിമകളിൽ മാത്രമാണ് അഭിനയിച്ചിട്ടുള്ളതെങ്കിലും മലയാളത്തിലും തമിഴിലും തെലുങ്കിലുമെല്ലാം താരം സജീവമാണ്. സോഷ്യല്‍ മീഡിയയിലും നിറഞ്ഞു നില്‍ക്കുന്ന താരമാണ് മിര്‍ണ. ജയിലര്‍ 2 വിലും മിര്‍ണയുടെ കഥാപാത്രമെത്തുന്നുണ്ട്.
ഇപ്പോഴിതാ ജയിലര്‍ 2 വില്‍ അഭിനയിച്ചതിനു ശേഷമുള്ള അനുഭവങ്ങള്‍ പങ്കിടുകയാണ് മിര്‍ണ മേനോന്‍. ഷൂട്ടിംഗ് തിരക്കുകള്‍ക്കിടയിലെ ആരോഗ്യപ്രശ്നങ്ങളും അന്ന് നേരിട്ട വെല്ലുവിളികളുമാണ് താരം തുറന്നു പറഞ്ഞത്. കടുത്ത ശാരീരിക അസ്വസ്ഥതകള്‍ക്കിടയിലും ‘ജയിലർ 2’ വിലെ ഷൂട്ടിംഗില്‍ പങ്കെടുത്തെന്നും ആശുപത്രിയില്‍ പോയി മരുന്നും ഇൻജക്ഷനും എടുത്ത ശേഷമാണ് താൻ സെറ്റിലെത്തിയതെന്നും, എന്നാല്‍ ആ അവസ്ഥയിലും തന്റെ ഭാഗം ഭംഗിയാക്കാൻ കഴിഞ്ഞുവെന്നും മിർണ പറയുന്നു.
‘‘ഒരു ദിവസം എനിക്ക് തീരെ സുഖമില്ലാതെ വന്നു. ഷൂട്ടിങ്ങിനൊന്നും എനിക്ക് പോകാൻ വയ്യ. ആ സിനിമയിലെ പ്രധാനപ്പെട്ട ഒരു രംഗമാണ് എനിക്ക് അന്ന് ഷൂട്ട് ചെയ്യേണ്ടത്. അന്ന് രാവിലെ എഴുന്നേറ്റപ്പോള്‍ മുതല്‍ എനിക്ക് തീരെ വയ്യ. അങ്ങനെ ഞാനെന്റെ സ്റ്റാഫിനെ വിളിച്ച്‌ പറഞ്ഞ്, അവർ എനിക്ക് ഗുളികയൊക്കെ കൊണ്ടുവന്ന് തന്നു. ഞാൻ ഗുളിക കഴിച്ചിട്ടും എനിക്ക് ഓക്കെ ആകുന്നില്ല. അതായത്, പറയുകയാണെങ്കില്‍ പല്ല് തേക്കാൻ ബ്രഷ് എടുക്കാൻ പോലും എന്നെക്കൊണ്ട് പറ്റുന്നില്ല. അത്രയും ക്ഷീണമുണ്ട് എനിക്ക്. 6.30യ്ക്ക് ആണ് നമുക്ക് സെറ്റില്‍ എത്തേണ്ടത്. ഞാൻ പിന്നെ മാനേജരെ വിളിച്ച്‌ ആശുപത്രിയില്‍ പോകണം അര മണിക്കൂർ വൈകുമെന്ന കാര്യം പറഞ്ഞു.
പക്ഷേ ആ സമയത്ത് ഒറ്റ ആശുപത്രിയിലും ഡോക്ടർമാരില്ല. നാലഞ്ച് ആശുപത്രിയില്‍ ചെന്നിട്ടും ഡോക്ടർമാരില്ല. എന്നിട്ട് ഒരു ആശുപത്രിയിലെത്തി അവിടുത്തെ ഡോക്ടറോട് അടിയന്തിരമായി വരാൻ പറഞ്ഞ് ഞങ്ങള്‍ കാത്തിരുന്നു. എന്നെ ആരും രക്ഷിക്കാനില്ലേ എന്നൊക്കെയാണ് എന്റെ മനസില്‍. അങ്ങനെ ഡോക്ടർ വന്നു. എന്നിട്ട് എന്നോട് പറഞ്ഞു, കുറച്ച്‌ ഹൈ ഡോസുള്ള ഒരു ഇൻജെക്ഷൻ എടുക്കാം എന്ന് പറഞ്ഞു. ആറ് മണിക്കൂർ നേരത്തേക്ക് കുഴപ്പമൊന്നുമുണ്ടാകില്ല, എന്ന് പറഞ്ഞ് ഇൻജെക്ഷൻ എടുത്തു. അതിന് ശേഷവും ബുദ്ധിമുട്ട് തോന്നുകയാണെങ്കില്‍ കഴിക്കാനായി ഒരു ഗുളികയും തന്നു. പ്രധാനപ്പെട്ട സീൻ ആയതുകൊണ്ട്, സെറ്റിലേക്ക് പോകുന്ന വഴി ഞാൻ ആ ഗുളിക കൂടി കഴിച്ചു.
അന്ന് രാവിലെ വെറും വയറ്റില്‍ ഞാനൊരു ഗുളിക കഴിച്ചു. പിന്നെ ഇൻജെക്ഷൻ എടുത്തു. അതുകഴിഞ്ഞ് ഒരു ഗുളിക കൂടി കഴിച്ചു. ഇത്രയും ആയപ്പോള്‍ എന്റെ ശരീരം മരച്ച്‌ ഇരിക്കുന്ന പോലെയായി. അതായത്, എന്നെ തല്ലിയാല്‍ പോലും എനിക്ക് വേദന എടുക്കില്ല. പിന്നെ ഞാൻ ഡീ ഹൈഡ്രേറ്റഡ് ആയി. മുഖമൊക്കെ നീര് വച്ച്‌ ഒരുമാതിരി ആയി. പക്ഷേ ആ സീനിന് അത് ഓക്കെയായിരുന്നു. അതുകൊണ്ട് എന്റെ ലുക്ക് പ്രശ്നമല്ലായിരുന്നു. പക്ഷേ എനിക്ക് ഇമോഷൻസ് ഫീല്‍ ചെയ്യുന്നില്ല. നെല്‍സണ്‍ സാർ രണ്ട് ടേക്കില്‍ കൂടുതല്‍ എന്റെ എടുക്കാറേ ഇല്ല. ഇത് കഴിഞ്ഞപ്പോള്‍ എനിക്ക് സംശയമായി ഞാനിത് നന്നായി തന്നെയാണോ ചെയ്തത് എന്നോർത്ത്.
അങ്ങനെ മൂന്നാമത് ഒരു ടേക്ക് എടുക്കാമെന്ന് ഞാനങ്ങോട്ട് പറഞ്ഞു. അപ്പോള്‍ നെല്‍സണ്‍ സാർ പറഞ്ഞു, അത് ഓക്കെ ആണെന്ന്. ഞാൻ പറഞ്ഞു, സാർ എനിക്ക് ശരിയാകത്തെ പോലെ തോന്നി എന്ന്. ഇല്ല, ഇല്ല എനിക്ക് ഓക്കെയാണെന്ന് അദ്ദേഹം പറഞ്ഞു. നൂറ് ശതമാനവും ഓക്കെയാണോ എന്ന് ഞാൻ ചോദിച്ചു. എല്ലാം കറക്ടാണ് കുഴപ്പം ഒന്നുമില്ലെന്ന് ഞാൻ പറഞ്ഞു. പക്ഷേ ഇന്നും ആ സീൻ ഓർക്കുമ്പോള്‍ എനിക്കെന്തോ പോലെ തോന്നും. ഞാൻ യാത്ര ചെയ്യുമ്പോഴും ഒക്കെ അതോർക്കും. ശോ... ഞാൻ ചെയ്തത് ശരിയായോ എന്നൊക്കെ. പിന്നെ ഡബ്ബിങിന് പോയപ്പോള്‍ ഞാൻ ആ സീൻ കണ്ടു, കുഴപ്പം ഒന്നും തോന്നിയില്ല. പക്ഷേ നമ്മുടെ മനസില്‍ ഇങ്ങനെ തോന്നുമല്ലോ. അന്ന് എനിക്ക് വേണ്ടി സെറ്റില്‍ എല്ലാവരും കാത്തിരുന്നു. ഏകദേശം ഒരു മണിക്കൂർ വൈകിയാണ് ഞാൻ അന്ന് സെറ്റിലെത്തിയത്...’’ മിര്‍ണ മേനോന്‍ പറഞ്ഞു. ഒരു തമിഴ് മാധ്യമത്തിന് നല്‍കിയ അഭിമുഖത്തിലാണ് താരം മനസ്സു തുറന്നത്.
നേരത്തെ വൻ വിജയം നേടിയ ‘ജയിലറി’ന്റെ രണ്ടാം ഭാഗമാണ് ‘ജയിലർ 2’. നെൽസൺ ദിലീപ്കുമാർ സംവിധാനം ചെയ്യുന്ന ചിത്രം സൺ പിക്‌ചേഴ്സാണ് ബിഗ് ബഡ്ജറ്റിൽ ഒരുക്കിയിരിക്കുന്നത്. ഒക്ടോബർ 15ന് ചിത്രം ലോകമെമ്പാടുമുള്ള തിയേറ്ററുകളിൽ റിലീസ് ചെയ്യും.
Comments