ഇന്ത്യൻ സിനിമയുടെ ‘ബിഗ് ബി’യും, തന്റെ ഘനഗാംഭീര്യമുള്ള ശബ്ദത്തിലൂടെ ബോളിവുഡിന്റെ ‘ഷഹെൻഷാ’യായും മാറിയ അമിതാഭ് ബച്ചന് 84-ാം ജന്മദിനത്തിന്റെ നിറവിലാണിന്ന്. ബോളിവുഡ് ആരാധകരെ പിടിച്ചുകുലുക്കിയ ആ ശബ്ദത്തിന് ഗാംഭീര്യമില്ലെന്ന കാരണത്താൽ ആകാശവാണിയിൽ ജോലി ലഭിക്കാതെ പോയ അതേ യുവാവ്, പിന്നീട് ഇന്ത്യൻ സിനിമയുടെ തന്നെ ശബ്ദവും മുഖവുമായി മാറി.
ഇന്ത്യൻ സിനിമയിൽ സമാനതകളില്ലാത്ത അഭിനയജീവിതം കാഴ്ചവെച്ച താരം നിരവധി ഐക്കണിക് കഥാപാത്രങ്ങളിലൂടെയാണ് പ്രേക്ഷകരുടെ മനസ്സ് കീഴടക്കിയത്. 39-ാം വയസിൽ നേടിയ സൂപ്പർ മെഗാ സ്റ്റാർ താരപദവി 84-ാം വയസ്സിലും തുടരുന്ന ബിഗ് ബിയ്ക്ക് ആശംസകളും സ്നേഹവും പങ്കിട്ട് ആരാധകരും സിനിമാലോകവും സോഷ്യല്‍ മീഡിയയിലെത്തുന്നുണ്ട്.
ഇപ്പോഴിതാ അമിതാഭ് ബച്ചന് ഹൃദയത്തില്‍ ചാലിച്ച ആശംസ നേരുകയാണ് തമിഴകത്തിന്റെയും ഇന്ത്യന്‍ സിനിമയുടെയും ഉലകനായകന്‍ കമല്‍ ഹാസന്‍. ഗാംഭീര്യമുള്ള ശബ്ദത്തെ അടയാളമാക്കിയ മാറ്റിയ നിശബ്ദതകൾക്ക് നാടകീയത പകർന്ന ആംഗ്രി യങ് മാനായ അമിതാഭ് ബച്ചന് ജന്മദിനാശംസകള്‍ എന്നാണ് കമല്‍ ഹാസന്‍ കുറിച്ചിരിക്കുന്നത്.
‘‘ആ ഗാംഭീര്യമുള്ള ശബ്ദത്തെ അദ്ദേഹം ഒരടയാളമാക്കി മാറ്റി, നിശബ്ദതകൾക്ക് നാടകീയത പകർന്നു, ഒപ്പം ആ പുരികം ഉയർത്തലിനെ ഒരു സിനിമാറ്റിക് ട്വിസ്റ്റാക്കി മാറ്റി. വെറും ലളിതമായ ‘ദേവിയോം ഔർ സജ്ജനോം’ എന്ന പറച്ചില്‍ പോലും ഒരു ബ്ലോക്ക്ബസ്റ്റർ സിനിമയുടെ തുടക്കം പോലെയാക്കാൻ അമിത് ജിക്ക് മാത്രമേ കഴിയൂ. അദ്ദേഹം എന്നും എക്കാലത്തും വേറെയൊരു ലെവലാണ്...
ജന്മദിനാശംസകൾ, ആംഗ്രി യങ് മാൻ...’’ എന്ന് കുറിച്ചാണ് തന്റെ പ്രിയ സുഹൃത്തും സഹതാരവുമായ അമിതാഭ് ബച്ചന് കമല്‍ ഹാസന്‍ ആശംസ നേര്‍ന്നിരിക്കുന്നത്. 1985 ൽ പുറത്തിറങ്ങിയ ‘ഗിരഫ്താർ’ എന്ന ചിത്രത്തിലെ ഇരുവരുടെയും പഴയൊരു സ്റ്റില്‍ പങ്കുവച്ചാണ് ഉലകനായകന്റെ ആശംസ. ഈ ഹിന്ദി ആക്ഷൻ ഡ്രാമയിൽ കിഷൻ കുമാർ ഖന്നയായി കമൽ ഹാസനും, ഏറെക്കാലമായി വേർപിരിഞ്ഞുപോയ സഹോദരൻ കരൺ കുമാർ ഖന്നയായി ബച്ചനും വേഷമിട്ടു. രജനീകാന്തും ഈ ചിത്രത്തിലെ അഭിനേതാക്കളിൽ ഒരാളായിരുന്നു. പതിറ്റാണ്ടുകൾക്ക് ശേഷം പിന്നീട് 2024 ൽ പുറത്തിറങ്ങിയ ‘കൽക്കി 2898 എഡി’ എന്ന സയൻസ്-ഫിക്ഷൻ ബ്രഹ്മാണ്ഡ ചിത്രത്തിലും ഇരുവരും ഒരുമിച്ച് അഭിനയിച്ചിരുന്നു.
Comments