മലയാള സിനിമയുടെ കാരണവരായി ഇന്നും തിളങ്ങി നില്‍ക്കുന്ന അതുല്യകലാകാരന്‍ മധു തന്റെ 93-ാം പിറന്നാളിന്റെ മധുരത്തിലാണ്. അറുപതുകളിലും എഴുപതുകളിലും തുടങ്ങി ന്യൂ ജെൻ വരെ തുടരുന്ന താരങ്ങളുടെ തലതൊട്ടപ്പനാണ് മധു. അധ്യാപനം ഉപേക്ഷിച്ച് സിനിമയിലെത്തിയ താരം ‘മൂടുപടം’ എന്ന സിനിമയിലൂടെയാണ് വെള്ളിത്തിരയിലെത്തിയത്. പിന്നീടിങ്ങോട്ട് മലയാള സിനിമയുടെ മാത്രമല്ല തമിഴ്, ഹിന്ദി ഭാഷകളിലായി തിളങ്ങി.
രാജ്യം പത്മശ്രീ ബഹുമതി നൽകിയാദരിച്ച മധു ആറു പ്രാവശ്യം സംസ്ഥാന ചലച്ചിത്ര പുരസ്കാരം സ്വന്തമാക്കി. അഭിനയത്തിനൊപ്പം തന്നെ 12 ചിത്രങ്ങൾ സംവിധാനം ചെയ്ത താരം, ആദ്യമായി സംവിധാനം ചെയ്ത ചിത്രം ‘പ്രിയ’ മലയാള സിനിമയിലെ ട്രെൻഡ്സെറ്ററായും മാറിയിരുന്നു.
ഇപ്പോഴിതാ മധുവിന്റെ 93-ാം പിറന്നാള്‍ ദിനത്തില്‍ അദ്ദേഹത്തിന് ആശംസയും പ്രാര്‍ത്ഥനയും നേരുകയാണ് കേന്ദ്രമന്ത്രിയും അഭിനേതാവുമായ സുരേഷ് ഗോപി. പിറന്നാൾ ദിനത്തിൽ രാധികയ്ക്കൊപ്പം മധുവിന്റെ അരികിലെത്തിയ സുരേഷ് ഗോപി, മധുവിനൊപ്പമിരുന്ന് സദ്യ കഴിച്ചുവെന്നും കുറിക്കുന്നു. സ്നേഹവാത്സല്യങ്ങൾ നിറഞ്ഞ സാന്നിധ്യത്തിൽ കുറച്ചു സമയം ചിലവഴിക്കാനും സാധിച്ചത് വലിയൊരു അനുഗ്രഹമായി കരുതുന്നു എന്നും സുരേഷ് ഗോപി കുറിച്ചിട്ടുണ്ട്.
‘‘മലയാള സിനിമയുടെ കുലപതി, ഞങ്ങളുടെയെല്ലാം പ്രിയപ്പെട്ട മധു സാറിന് ഹൃദയം നിറഞ്ഞ പിറന്നാള്‍ ആശംസകള്‍!
ഈ പിറന്നാൾ ദിനത്തിൽ രാധികയ്ക്കൊപ്പം സാറിന്റെ അരികിലെത്താനും, ആ സ്നേഹവാത്സല്യങ്ങൾ നിറഞ്ഞ സാന്നിധ്യത്തിൽ കുറച്ചു സമയം ചിലവഴിക്കാനും സാധിച്ചത് വലിയൊരു അനുഗ്രഹമായി കരുതുന്നു.
ഒരുമിച്ചിരുന്ന് പങ്കിട്ട പിറന്നാള്‍ സദ്യയും, പഴയകാല ഓർമ്മകൾ പുതുക്കിയുള്ള സംഭാഷണങ്ങളും മനസ്സിന് തന്ന സന്തോഷം വാക്കുകൾക്കതീതമാണ്. കൂടാതെ, സാറിന്റെ കൊച്ചുമകന്റെ മകൻ, കുഞ്ഞു ത്രിലോകിനൊപ്പം ചിലവഴിച്ച നിമിഷങ്ങൾ ഈ കൂടിക്കാഴ്ചയ്ക്ക് ഇരട്ടി മധുരം പകർന്നു. ചിരിയും കുറുമ്പുകളുമായി ആ കുരുന്നും ഞങ്ങളോടൊപ്പം ചേർന്നപ്പോൾ വീടൊരു ഉത്സവപ്പറമ്പായി മാറി.
മലയാള സിനിമയ്ക്ക് വഴികാട്ടിയായ, അഭിനയകലയുടെ കുലപതിയായ പ്രിയപ്പെട്ട മധു സാറിന് ആയുരാരോഗ്യസൗഖ്യങ്ങൾ നൽകി സർവ്വേശ്വരൻ അനുഗ്രഹിക്കട്ടെ എന്ന് പ്രാർത്ഥിക്കുന്നു....’’ എന്നാണ് ചിത്രങ്ങള്‍ പങ്കിട്ട് സുരേഷ് ഗോപി കുറിച്ചിരിക്കുന്നത്. സിനിമാലോകവും ആരാധകരും മധുവിന് ഹൃദയം നിറയ്ക്കുന്ന ആശംസകളും പ്രാര്‍ത്ഥനകളും കമന്റുകളിലൂടെ കുറിക്കുന്നുണ്ട്.
Comments