പ്രണയവും വിരഹവും ഹാസ്യവും കുടുബ ബന്ധങ്ങളുടെ സങ്കീര്‍ണതകളും എല്ലാം ഇഴചേർന്ന നിരവധി കഥാപാത്രങ്ങൾ മലയാള സിനിമയ്ക്ക് നല്‍കിയ നിത്യഹരിത നായികയാണ് ഷീല. ആറ് പതിറ്റാണ്ടിലധികം മലയാള-തമിഴ് സിനിമാ മേഖലകളില്‍ തന്റേതായ ഇടംനിലനിര്‍ത്തിയ ഷീല എപ്പോഴും പൊതുവേദികളിലും മറ്റും സജീവമാണ്. മലയാളം സിനിമയിലെ ഒരോ ചലനങ്ങളും സസൂക്ഷ്മം നിരീക്ഷിക്കാറുള്ള ഷീല പെയിന്റിംഗിലും മറ്റും ശ്രദ്ധ കേന്ദ്രീകരിക്കുന്നുണ്ട്. 1960കളിൽ സിനിമയിലെത്തിയ നടി ഇപ്പോഴും സിനിമാ രംഗത്തുണ്ട് എന്നുള്ളതു തന്നെയാണ് മറ്റുള്ള അഭിനേത്രികളില്‍ നിന്ന് ഷീലയെ വ്യത്യസ്തയാക്കുന്നത്.
ഇപ്പോഴിതാ ഷീലയെ കണ്ടുമുട്ടിയ സന്തോഷം പങ്കിടുകയാണ് മലയാളികളുടെ പ്രിയതാരമായിരുന്ന ലിസ്സി. പ്രിയദര്‍ശന്റെ ഭാര്യ കൂടിയായിരുന്ന ലിസ്സി ഇന്ന് സിനിമയില്‍ സജീവമല്ലെങ്കിലും സോഷ്യല്‍ മീഡിയയിലൂടെ തന്റെ എല്ലാ വിശേഷങ്ങളും പങ്കിടാറുണ്ട്. ചലച്ചിത്ര പരിഷത്തി’ന്റെ യോഗത്തിൽ വച്ച് ഷീലയെ കണ്ടുമുട്ടിയെന്നും തന്നെ കാണണമെന്ന് സുഹാസിനിയോട് ഷീല പറഞ്ഞിരുന്നെന്നുമാണ് ലിസ്സി കുറിച്ചിരിക്കുന്നത്.
‘‘കുറച്ചു ദിവസങ്ങൾക്ക് മുമ്പ്, എന്റെ സുഹൃത്ത് സുഹാസിനി മണിരത്നം എന്നെ വിളിച്ച് പറഞ്ഞു, ‘ഷീലാമ്മ നിങ്ങളെ ബന്ധപ്പെടാൻ ശ്രമിക്കുന്നുണ്ട്. ‘ചലച്ചിത്ര പരിഷത്തി’ന്റെ യോഗത്തിൽ നമ്മൾ രണ്ടുപേരും പങ്കെടുക്കണമെന്ന് അവർ ആഗ്രഹിക്കുന്നു...’എന്ന്. അടുത്ത ദിവസം തന്നെ ഷീലാമ്മ നേരിട്ട് എന്നെ വിളിച്ചു...
പരിഷത്തിനെ കൂടുതൽ സജീവമാക്കാനും, ആവശ്യമുള്ളവരെ സഹായിക്കാനും, നമ്മളെ അതിൽ കൂടുതൽ പങ്കാളികളാക്കാനും ഷീലാമ്മ മികച്ച രീതിയിൽ പരിശ്രമിക്കുന്നുണ്ട്. ഷീലാമ്മ അവിടെയുണ്ടാകുമെന്ന് അറിയുമ്പോഴെല്ലാം, ഞാൻ നന്നായി വസ്ത്രം ധരിക്കാനും ഭംഗിയായി ഒരുങ്ങാനും പ്രത്യേകം ശ്രദ്ധിക്കാറുണ്ട്- കാരണം അവർ എപ്പോഴും മനോഹരമായി വസ്ത്രം ധരിക്കുകയും അതീവ ചാരുതയോടെ പെരുമാറുകയും ചെയ്യുന്ന വ്യക്തിയാണ്...
അതിസുന്ദരിയും ഗാംഭീര്യവും ലാളിത്യവുമുള്ള, ഇതിഹാസതുല്യയായ ഈ നടിക്കൊപ്പം നിൽക്കുന്നത് എപ്പോഴും പ്രചോദനകരമാണ്. മലയാളികളുടെ ഗൃഹാതുരത്വവും അഭിമാനവുമാണ് അവർ... മികച്ച പ്രതിഭയുള്ള അഭിനേത്രിയും ഗിന്നസ് വേൾഡ് റെക്കോർഡ് ഉടമയുമായിരുന്നിട്ടും, അങ്ങേയറ്റം വിനീതയും സ്നേഹസമ്പന്നയും സൗഹൃദമനോഭാവമുള്ളവളുമാണ് അവർ.
ജീവിതത്തിന്റെ ഈ ഘട്ടത്തിലും (അതായത് ‘പ്രായ’ത്തിന്റെ കാര്യത്തിൽ-പക്ഷേ അവർക്ക് പ്രായമേ തോന്നുന്നില്ല എന്നതാണ് സത്യം! ) ആവശ്യമുള്ളവരെ സഹായിക്കുന്നത് തുടരാനുള്ള അവരുടെ ആവേശവും നിശ്ചയദാർഢ്യവും എന്നെ അവരോടുള്ള ബഹുമാനവും ആദരവും വർദ്ധിപ്പിക്കുന്നു. ഷീലാമ്മ, അങ്ങയോടൊപ്പം ഈ നിമിഷം പങ്കിടാൻ കഴിഞ്ഞത് വലിയൊരു ഭാഗ്യമായി കരുതുന്നു...’’ എന്നാണ് ലിസ്സി ചിത്രങ്ങള്‍ പങ്കിട്ട് കുറിച്ചിരിക്കുന്നത്. സുഹാസിനിയ്ക്കൊപ്പമുള്ള ചിത്രങ്ങളും ലിസ്സി പങ്കുവച്ചിട്ടുണ്ട്.
Comments