പശ്ചിമ ബംഗാളിലെ തിരക്കേറിയ റോഡിലൂടെ ആനക്കൂട്ടത്തിന് സുരക്ഷിതമായി കടന്നുപോകാൻ വാഹനങ്ങൾ തടഞ്ഞ് വനംവകുപ്പ് ഉദ്യോഗസ്ഥർ. ബാഗ്‌ഡോഗ്രയിലെ റോഡിലാണ് കാഴ്ചക്കാരുടെ ശ്രദ്ധ പിടിച്ചുപറ്റിയ സംഭവം. കുർസിയോങ് വനം ഡിവിഷനിലെ ഉദ്യോഗസ്ഥർ റോഡിലെ ഗതാഗതം നിയന്ത്രിച്ച് ആനകൾക്ക് വഴിയൊരുക്കുകയായിരുന്നു. ആനകൾ ഒന്നിനു പിന്നാലെ ഒന്നായി റോഡ് മുറിച്ചുകടക്കുമ്പോൾ വാഹനങ്ങൾ കാത്തുനിൽക്കുന്ന ദൃശ്യങ്ങൾ സമൂഹമാധ്യമങ്ങളിൽ വൈറലായിരിക്കുകയാണ്.
ആനക്കൂട്ടം റോഡ് മുറിച്ചുകടക്കുന്നതിനിടെ വാഹനങ്ങൾ മുന്നോട്ടുപോകാതിരിക്കാൻ ഉദ്യോഗസ്ഥർ തടസ്സം സൃഷ്ടിക്കുന്നതും ഗതാഗതം നിയന്ത്രിക്കുന്നതും ദൃശ്യങ്ങളിൽ കാണാം. ആനകളെ ശല്യപ്പെടുത്താതെ സുരക്ഷിതമായി മറുവശത്തെത്തിക്കുകയായിരുന്നു ഉദ്യോഗസ്ഥരുടെ ലക്ഷ്യം. ആനകൾ കടന്നുപോകുന്നതുവരെ വാഹനയാത്രക്കാരും ക്ഷമയോടെ കാത്തുനിന്നു. വന്യമൃഗങ്ങളുടെ സഞ്ചാരത്തിന് തടസ്സമുണ്ടാക്കാതെ അവയുടെ സുരക്ഷ ഉറപ്പാക്കാൻ ഉദ്യോഗസ്ഥർ നടത്തിയ ഇടപെടലാണ് ഇപ്പോൾ ശ്രദ്ധ നേടുന്നത്.
കേന്ദ്ര പരിസ്ഥിതി മന്ത്രി ഭൂപേന്ദർ യാദവാണ് ദൃശ്യങ്ങൾ എക്സിലൂടെ പങ്കുവെച്ചത്. മനുഷ്യരും വന്യമൃഗങ്ങളും ഒരുമിച്ച് ജീവിക്കുന്നതിന്റെ ഉദാഹരണമാണ് ഈ കാഴ്ചയെന്ന് അദ്ദേഹം കുറിച്ചു. ജനങ്ങളുടെയും വന്യമൃഗങ്ങളുടെയും സുരക്ഷ ഒരുപോലെ ഉറപ്പാക്കാൻ ഇത്തരം ഇടപെടലുകൾ സഹായിക്കുമെന്നും അദ്ദേഹം ചൂണ്ടിക്കാട്ടി. ആനകൾക്ക് വഴിയൊരുക്കിയ വനംവകുപ്പ് ഉദ്യോഗസ്ഥരെ അഭിനന്ദിച്ച് നിരവധി പേരാണ് സമൂഹമാധ്യമങ്ങളിൽ രംഗത്തെത്തിയത്.
ഇതിനിടെ, പശ്ചിമ ബംഗാളിൽ തന്നെ ആനക്കൂട്ടത്തെ രക്ഷിക്കാൻ വനംവകുപ്പ് ഉദ്യോഗസ്ഥൻ നടത്തിയ മറ്റൊരു ഇടപെടലും ശ്രദ്ധ നേടിയിരുന്നു. റെയിൽവേ പാളം മുറിച്ചുകടക്കുകയായിരുന്ന ആനക്കൂട്ടത്തിന് മുന്നിലൂടെ ട്രെയിൻ എത്തുന്നത് ശ്രദ്ധയിൽപ്പെട്ടതോടെ വനംവകുപ്പ് ജീവനക്കാരൻ ചുവന്ന തുണി വീശി ട്രെയിൻ ജീവനക്കാർക്ക് മുന്നറിയിപ്പ് നൽകുകയായിരുന്നു. സമയോചിതമായ ഇടപെടലിലൂടെ അപകടസാധ്യത ഒഴിവാക്കാൻ സാധിച്ചു. വനമേഖലകളിലൂടെ കടന്നുപോകുന്ന റോഡുകളിലും റെയിൽവേ പാതകളിലും വന്യമൃഗങ്ങളുടെ സുരക്ഷ ഉറപ്പാക്കേണ്ടതിന്റെ പ്രാധാന്യം വ്യക്തമാക്കുന്നതാണ് ഈ സംഭവങ്ങൾ.
Comments