ന്യൂഡല്‍ഹി: ലോക്സഭയിലെ പ്രതിപക്ഷ നേതാവ് രാഹുല്‍ ഗാന്ധി ചൊവ്വാഴ്ച തന്റെ വസതിയില്‍ ഇന്ത്യാ മുന്നണി എം.പിമാര്‍ക്കും സാംസ്‌കാരിക-സാമൂഹ്യ പ്രവര്‍ത്തകര്‍ക്കും വിദ്യാര്‍ത്ഥി സംഘടനകള്‍ക്കും ചായസല്‍ക്കാരം നല്‍കും. വോട്ടുചോര്‍ച്ച ആരോപിച്ചുള്ള ശക്തമായ പ്രതിഷേധങ്ങള്‍ സുപ്രീം കോടതിയുടെ പടിവാതില്‍ക്കല്‍ എത്തിയതിന് തൊട്ടുപിന്നാലെയാണ് ഈ സംഭവം.
കനത്ത ബാരിക്കേഡുകള്‍ തീര്‍ത്ത പാതയിലൂടെ പ്രതിപക്ഷ പ്രമുഖരും ആക്ടിവിസ്റ്റുകളും പൗരസമൂഹ പ്രതിനിധികളും ചേര്‍ന്ന് 'ജനാധിപത്യ മാര്‍ച്ച്' നടത്തുകയും, എസ്.ഐ.ആറിനും ആരോപിക്കപ്പെട്ട തിരഞ്ഞെടുപ്പ് ക്രമക്കേടുകള്‍ക്കുമെതിരെ ദേശീയ തലസ്ഥാനത്ത് ശക്തിപ്രകടനം നടത്തി സംയുക്ത ഹര്‍ജി സമര്‍പ്പിക്കുകയും ചെയ്തു.പതാകകളും പോസ്റ്ററുകളും ഏന്തിയ വന്‍ ജനക്കൂട്ടം മധ്യ ഡല്‍ഹിയിലെ കണാട്ട് പ്ലേസിലേക്ക് ഒഴുകിയെത്തി.
ലോക്സഭയിലെയും രാജ്യസഭയിലെയും പ്രതിപക്ഷ നേതാക്കളായ രാഹുല്‍ ഗാന്ധി, മല്ലികാര്‍ജുന്‍ ഖാര്‍ഗെ, സമാജ്വാദി പാര്‍ട്ടി അധ്യക്ഷന്‍ അഖിലേഷ് യാദവ്, ടി.എം.സി സുപ്രീമോ മമതാ ബാനര്‍ജി, സി.പി.ഐ നേതാവ് ഡി. രാജ, സി.പി.എം നേതാവ് എം.എ. ബേബി, ആര്‍.ജെ.ഡിയുടെ തേജസ്വി യാദവ്, എന്‍.സി.പി-എന്‍.സി.പി (എസ്.സി.പി) നേതാവ് സുപ്രിയ സുലെ തുടങ്ങിയ പ്രമുഖര്‍ മാര്‍ച്ചില്‍ പങ്കെടുത്തു.ഭഗവാന്‍ ദാസ് റോഡിലെ ഒരു ബാരിക്കേഡ് സമരക്കാര്‍ ഭേദിച്ചെങ്കിലും, റോഡിലെ രണ്ടാമത്തെ ബാരിക്കേഡില്‍ അവരെ തടഞ്ഞു.
തുടര്‍ന്ന് ഇന്ത്യാ മുന്നണിയുടെ ഉന്നത നേതാക്കള്‍ ഹര്‍ജി സമര്‍പ്പിക്കാനായി സുപ്രീം കോടതിയിലേക്ക് പോയി. തിരഞ്ഞെടുപ്പ് കമ്മീഷന്‍ ഓഫ് ഇന്ത്യ, മുഖ്യ തിരഞ്ഞെടുപ്പ് കമ്മീഷണര്‍ ഗ്യാനേഷ് കുമാര്‍, മറ്റ് തിരഞ്ഞെടുപ്പ് കമ്മീഷണര്‍മാരായ സുഖ്ബീര്‍ സിംഗ് സന്ധു, വിവേക് ജോഷി എന്നിവരെ കേസില്‍ എതിര്‍കക്ഷികളാക്കിയാണ് ഹര്‍ജി സമര്‍പ്പിച്ചത്.വിഷയം സബ്ജുഡീസാണെന്ന് (കോടതിയുടെ പരിഗണനയില്‍ ഇരിക്കുന്നത്) വ്യക്തമാക്കി, പ്രതിപക്ഷ നേതാക്കളുടെ കൂടിക്കാഴ്ചയ്ക്കുള്ള അപേക്ഷ ചീഫ് ജസ്റ്റിസ് നിരസിച്ച് ഒരു ദിവസത്തിന് ശേഷമാണ് ഈ സംഭവവികാസങ്ങള്‍ ഉണ്ടായത്.
Comments