ജർമനിയിൽ 16 വയസ്സുകാരിയോട് റോബോട്ട് അനുചിതമായി പെരുമാറിയെന്ന സംഭവം സമൂഹമാധ്യമങ്ങളിൽ ചർച്ചയാകുന്നു. കൊളോണിലാണ് സംഭവം നടന്നത്. പെൺകുട്ടിയുടെ ശരീരത്തിൽ റോബോട്ട് അനുചിതമായി സ്പർശിക്കുന്ന ദൃശ്യങ്ങൾ തത്സമയം പ്രചരിച്ചതോടെയാണ് സംഭവം ശ്രദ്ധ നേടിയത്. സംഭവത്തിൽ ഇടപെട്ട പോലീസ് റോബോട്ടിനെ പിടിച്ചെടുത്തു. സാങ്കേതികവിദ്യയുടെ ദുരുപയോഗത്തെക്കുറിച്ചും പൊതുസ്ഥലങ്ങളിലെ സുരക്ഷയെക്കുറിച്ചും പുതിയ ചോദ്യങ്ങൾ ഉയർത്തുന്നതാണ് സംഭവം.
ഞായറാഴ്ച അർധരാത്രിയോടെയാണ് സംഭവം നടന്നതെന്നാണ് റിപ്പോർട്ടുകൾ. ഏകദേശം 1.2 മീറ്റർ ഉയരമുള്ള ചുവപ്പും സ്വർണനിറവും കലർന്ന റോബോട്ട് പെൺകുട്ടിയുടെ പിന്നിലൂടെ എത്തി ശരീരത്തിൽ അനുചിതമായി സ്പർശിക്കുകയായിരുന്നു എന്നാണ് പരാതി. പെൺകുട്ടി സുഹൃത്തുക്കൾക്കൊപ്പം നിൽക്കുമ്പോഴാണ് സംഭവം നടന്നത്. റോബോട്ടിന്റെ പെരുമാറ്റത്തിൽ പെൺകുട്ടി പരിഭ്രാന്തയായതായും റിപ്പോർട്ടുകളുണ്ട്.
സംഭവത്തിന്റെ ദൃശ്യങ്ങൾ റോബോട്ടിന്റെ ഉടമയായ 16-കാരനും 19-കാരനായ സുഹൃത്തും ചേർന്ന് ചിത്രീകരിച്ച് സമൂഹമാധ്യമങ്ങളിലൂടെ തത്സമയം പ്രചരിപ്പിച്ചതായാണ് പോലീസ് കണ്ടെത്തിയത്. വിവരമറിഞ്ഞ് സ്ഥലത്തെത്തിയ പോലീസ് ഇരുവരെയും കണ്ടെത്തി. കാറിന്റെ പിൻഭാഗത്ത് ഒളിപ്പിച്ച നിലയിലായിരുന്ന റോബോട്ടും ഇവരുടേതെന്ന് കരുതുന്ന രണ്ട് മൊബൈൽ ഫോണുകളും പിടിച്ചെടുത്തു. സംഭവത്തിന്റെ ദൃശ്യങ്ങൾ തത്സമയം പ്രചരിച്ചതും പോലീസ് ഇടപെടലിലേക്ക് നയിച്ച പ്രധാന ഘടകമായി.
റോബോട്ടിന്റെ ചലനങ്ങൾ ആരെങ്കിലും മനഃപൂർവം നിയന്ത്രിച്ചിരുന്നോ, സംഭവം എങ്ങനെയാണ് നടന്നത് തുടങ്ങിയ കാര്യങ്ങളിൽ കൊളോൺ പോലീസ് അന്വേഷണം ആരംഭിച്ചിട്ടുണ്ട്. ലൈംഗിക അതിക്രമവുമായി ബന്ധപ്പെട്ട സംശയത്തിന്റെ അടിസ്ഥാനത്തിലാണ് അന്വേഷണം നടക്കുന്നത്. സാങ്കേതികവിദ്യ മനുഷ്യരുടെ സഹായത്തിനായി ഉപയോഗിക്കേണ്ടതിനു പകരം മറ്റുള്ളവരെ ഉപദ്രവിക്കാൻ ഉപയോഗിക്കുന്നതിനെക്കുറിച്ചുള്ള ആശങ്കകളും സംഭവത്തോടെ ശക്തമായിട്ടുണ്ട്. റോബോട്ടുകൾ പൊതുസ്ഥലങ്ങളിൽ കൂടുതൽ വ്യാപകമാകുന്ന സാഹചര്യത്തിൽ അവയുടെ പ്രവർത്തനത്തിനും സുരക്ഷയ്ക്കും നിയന്ത്രണങ്ങൾ ആവശ്യമാണെന്ന ചർച്ചയ്ക്കും സംഭവം വഴിവെച്ചിരിക്കുകയാണ്.
Comments