നടനും തമിഴ്‌നാട് മുഖ്യമന്ത്രിയുമായ ജോസഫ് വിജയനെ സന്ദര്‍ശിച്ച് താരദമ്പതികളായ വിജയ് ദേവരകൊണ്ടയും രശ്മിക മന്ദാനയും. ചെന്നൈയില്‍ വെച്ച് നടന്ന കൂടിക്കാഴ്ചയുടെ ചിത്രങ്ങള്‍ താരങ്ങള്‍ തന്നെയാണ് സമൂഹമാധ്യമങ്ങളിലൂടെ പങ്കുവെച്ചത്.
‘വളരെക്കാലത്തിന് ശേഷം വിജയ് സാറിനെ കാണാന്‍ ചെന്നു. ഓര്‍മിക്കാന്‍ കഴിയുന്നതിലും അപ്പുറം അദ്ദേഹത്തിന്റെ ആരാധകിയായിരുന്നത് മുതല്‍ സാറിനൊപ്പം പ്രവര്‍ത്തിക്കാന്‍ അവസരം ലഭിച്ചതുവരെ, ഇന്ന് അദ്ദേഹം ആയിരിക്കുന്ന മുഖ്യമന്ത്രി പദത്തെ ആരാധിക്കുന്നത് വരെ. അദ്ദേഹത്തിന്റെ യാത്ര അവിശ്വസനീയമാണ്. എക്കാലത്തും സാറിന് എന്റെ വലിയ സ്‌നേഹവും ആശംസകളും ’എന്നായിരുന്നു ചിത്രങ്ങള്‍ പങ്കിട്ട് രശ്മിക കുറിച്ചത്. 'വാരിസ്' എന്ന ചിത്രത്തില്‍ വിജയയ്‌ക്കൊപ്പം രശ്മിക അഭിനയിച്ചിട്ടുണ്ട്.
ഒരൊറ്റ കൂടിക്കാഴ്ചകൊണ്ട് തന്നെ വിജയ് സാര്‍ തന്റെ പ്രിയപ്പെട്ട വ്യക്തിയായി മാറി എന്നായിരുന്നു വിജയ് ദേവരക്കൊണ്ട പറഞ്ഞത്. ‘ഏറ്റവും പ്രിയപ്പെട്ട ദളപതി വിജയ് സാറിനൊപ്പം ഏറ്റവും മനോഹരമായ സമയം ചെലവഴിച്ചു. ഏറെ നീണ്ട തിരക്കേറിയ ദിവസത്തിന് ശേഷവും അദ്ദേഹം ഞങ്ങളെ ഏറെ സ്‌നേഹത്തോടെ സ്വീകരിക്കുകയും ജീവിതത്തെയും ജോലിയെയും ലോകത്തെയും കുറിച്ച് വ്യക്തിപരമായ പല കാര്യങ്ങളും പങ്കുവെക്കുകയും ചെയ്തു. ഒരൊറ്റ കൂടിക്കാഴ്ച കൊണ്ട് തന്നെ സാര്‍ എന്റെ പ്രിയപ്പെട്ട ആളായി മാറി. വീണ്ടും കാണുന്നത് വരെ... എന്റെ സ്‌നേഹവും ആദരവും ’എന്നായിരുന്നു വിജയ് ദേവരക്കൊണ്ടയുടെ വാക്കുകള്‍.
തമിഴ് സിനിമയിലെ മൂന്ന് പതിറ്റാണ്ടിലേറെ നീണ്ട അഭിനയജീവിതത്തിന് ശേഷമാണ് വിജയ് രാഷ്ട്രീയത്തിലേക്ക് പ്രവേശിച്ചത്. 2024-ൽ 'തമിഴക വെട്രി കഴകം' (ടി.വി.കെ) എന്ന രാഷ്ട്രീയ പാർട്ടി രൂപീകരിച്ച താരം, പിന്നീട് അഭിനയത്തിൽ നിന്ന് പൂർണ്ണമായും വിരമിച്ച് പൊതുസേവനത്തിലേക്ക് തിരിയുകയായിരുന്നു. തമിഴ് സിനിമയിലെ മുന്‍നിര നായകനില്‍ നിന്ന് മുഖ്യമന്ത്രിയിലേക്കുള്ള അദ്ദേഹത്തിന്റെ ഈ യാത്ര ഏറെ ശ്രദ്ധ ആകര്‍ഷിച്ചിട്ടുണ്ട്.
അതേസമയം 'ഗീത ഗോവിന്ദം', 'ഡിയര്‍ കോമ്രേഡ്' എന്നീ ചിത്രങ്ങള്‍ക്ക് ശേഷം രശ്മിക മന്ദാനയും വിജയ് ദേവരക്കൊണ്ടയും വീണ്ടും ഒന്നിക്കുന്ന പുതിയ ചിത്രമാണ് 'രണബാലി'. രാഹുല്‍ സംകൃത്യന്‍ സംവിധാനം ചെയ്യുന്ന ഈ ചിത്രം, 2026 ഫെബ്രുവരിയില്‍ വിവാഹിതരായ ഇവരുടെ വിവാഹശേഷമുള്ള ആദ്യ റിലീസ് കൂടിയാണെന്ന പ്രത്യേകതയുമുണ്ട്.
Comments