നടി അഹാന കൃഷ്ണയുടെ ജന്മദിനത്തിൽ അമ്മ സിന്ധു കൃഷ്ണ പങ്കുവെച്ച ഹൃദയസ്പർശിയായ കുറിപ്പ് സമൂഹമാധ്യമങ്ങളിൽ ഏറെ ശ്രദ്ധ നേടുന്നു. തന്റെ മൂത്ത മകളായ അഹാനയ്ക്കൊപ്പമുള്ള 31 വർഷത്തെ ഓർമ്മകളും സ്നേഹവും കോർത്തിണക്കിയാണ് സിന്ധു കൃഷ്ണ ജന്മദിനാശംസകൾ നേർന്നിരിക്കുന്നത്.
തന്റെ ആദ്യത്തെ കൺമണിയായ അഹാനയുടെ ജനനത്തോടെയാണ് താൻ ഇതുവരെ അറിയാത്തവിധത്തിലുള്ള സ്നേഹം അനുഭവിച്ചറിഞ്ഞതെന്ന് സിന്ധു കുറിക്കുന്നു. വർഷങ്ങൾ മിന്നൽ വേഗത്തിൽ കടന്നുപോയെങ്കിലും, അഹാനയുടെ കുഞ്ഞുനാളിലെ സുഗന്ധവും ആദ്യമായി നോക്കിയ നോട്ടവും പാലുകുടിച്ച നിമിഷങ്ങളുമെല്ലാം ഇന്നും പുതിയതുപോലെ ഓർമ്മയിലുണ്ടെന്നും അവർ പറയുന്നു.
സിന്ധു കൃഷ്ണയുടെ വാക്കുകളിലേക്ക്:
"അമ്മു, നിനക്ക് ഹൃദയം നിറഞ്ഞ ജന്മദിനാശംസകൾ! കഴിഞ്ഞ 31 വർഷമായി നീ എന്റെ കൂടെയുണ്ട്. നിന്റെ അമ്മയാകാൻ കഴിഞ്ഞത് എന്റെ ജീവിതത്തിലെ ഏറ്റവും വലിയ അനുഗ്രഹങ്ങളിൽ ഒന്നാണ്. എന്റെ ആദ്യത്തെ കൺമണി! നീ വന്നതോടുകൂടിയാണ് ഇതിനുമുമ്പ് ഞാൻ അറിയാത്ത ഒരത്ഭുത സ്നേഹം അനുഭവിച്ചറിഞ്ഞത്. വർഷങ്ങൾ മിന്നൽ വേഗത്തിൽ കടന്നുപോയി. എങ്കിലും എന്റെ ഓർമ്മകൾ ഇന്നും പുതിയതുപോലെ വ്യക്തമാണ്...
നിന്റെ കുഞ്ഞു സുഗന്ധവും, നീ ആദ്യമായി എന്നെ നോക്കിയ നോട്ടവും, ആദ്യമായി യാതൊരു കുഴപ്പവുമില്ലാതെ എന്റെ പാല് കുടിച്ച ആ പൂർണ്ണതയും എനിക്ക് ഇപ്പോഴും ഓർമ്മയുണ്ട്. ഈ ലോകത്തിലെ എല്ലാ സന്തോഷങ്ങളും നിനക്ക് ആശംസിക്കുന്നു. നീയും നിമിഷും ചേർന്ന് നിങ്ങളുടെ സ്വപ്നങ്ങളുടെ ജീവിതം നയിക്കട്ടെയെന്നും ആശംസിക്കുന്നു.
എനിക്ക് ഏറ്റവും ആവശ്യമുള്ളപ്പോഴെല്ലാം കൂടെയുണ്ടായിരുന്നതിനും എന്നെ താങ്ങിനിർത്തിയതിനും നന്ദി. നീ ഒരു മികച്ച മകളും, നല്ലൊരു സഹോദരിയും, ആർക്കും ചോദിച്ചുവാങ്ങാൻ കഴിയുന്നതിൽ വെച്ച് ഏറ്റവും മികച്ച കൂട്ടുകാരിയുമാണ്. അതുപോലെതന്നെ നീ ഭാവിയിൽ നല്ലൊരു ഭാര്യയും, അത്ഭുതകരമായ ഒരു അമ്മയും ആകുമെന്ന് എനിക്ക് ഉറപ്പാണ്. ജന്മദിനാശംസകൾ എന്റെ അമ്മുക്കുട്ടി!"
Comments