അമേരിക്കയിലെ ഷിക്കാഗോയിൽ കോടീശ്വരന്റെ വിചിത്രമായ പ്രവൃത്തി വിവാദത്തിൽ. പൊതുപാർക്കിലും വീടിന് സമീപത്തും കശുവണ്ടി ഉൾപ്പെടെയുള്ള വിലകൂടിയ നട്സും വിത്തുകളും വിതറാൻ ആളുകളെ ജോലിക്കെടുത്തതാണ് സംഭവം. എന്നാൽ, വന്യമൃഗങ്ങൾക്ക് ഭക്ഷണം നൽകാനുള്ള ഈ പ്രവൃത്തി പ്രദേശത്ത് എലിശല്യം രൂക്ഷമാക്കിയെന്നാണ് ആരോപണം. മുന്നറിയിപ്പുകളും പിഴകളും നൽകിയിട്ടും ഭക്ഷണം വിതറുന്നത് തുടരുന്നതായുള്ള റിപ്പോർട്ടുകൾ പുറത്തുവന്നതോടെ സംഭവം ശ്രദ്ധ നേടുകയാണ്.
ഷിക്കാഗോയിലെ ലിങ്കൺ പാർക്കിന് സമീപം താമസിക്കുന്ന 94-കാരനായ കോടീശ്വരൻ ബാരെ സെയ്ഡിനെതിരെയാണ് ആരോപണം ഉയർന്നിരിക്കുന്നത്. ഇയാളുടെ നിർദേശപ്രകാരം ജീവനക്കാർ വലിയ ബാഗുകളിൽ നട്സും വിത്തുകളും മറ്റ് ഭക്ഷണസാധനങ്ങളുമായി എത്തി പാർക്കിലും പരിസരത്തും വിതറുന്നതായി പ്രദേശവാസികൾ പറയുന്നു. ബ്രസീൽ നട്സ്, വാൾനട്സ് തുടങ്ങിയ വിലകൂടിയ ഭക്ഷണസാധനങ്ങളാണ് ഇത്തരത്തിൽ വിതറുന്നതെന്നും റിപ്പോർട്ടുകളുണ്ട്. ഭക്ഷണം തേടി അണ്ണാനുകളും പ്രാവുകളും എത്തുന്നതിന് പിന്നാലെ എലികളുടെ എണ്ണവും വർധിച്ചതായാണ് നാട്ടുകാരുടെ പരാതി.
പാർക്കിന്റെ വിവിധ ഭാഗങ്ങളിൽ എലികൾ മാളങ്ങൾ ഉണ്ടാക്കുകയും കൂട്ടത്തോടെ പ്രത്യക്ഷപ്പെടുകയും ചെയ്യുന്നതായി പ്രദേശവാസികൾ പരാതിപ്പെട്ടിട്ടുണ്ട്. ഭക്ഷണാവശിഷ്ടങ്ങളും വിതറുന്ന നട്സും എലികൾക്ക് സ്ഥിരമായി ഭക്ഷണം ലഭിക്കുന്ന സാഹചര്യം സൃഷ്ടിക്കുന്നുവെന്നാണ് അധികൃതരുടെ വിലയിരുത്തൽ. ഇത് പൊതുജനാരോഗ്യത്തിന് ഭീഷണിയാകാമെന്നും സമീപത്തെ വീടുകൾക്കും പാർക്കിനും നാശനഷ്ടങ്ങൾ ഉണ്ടാകാമെന്നും ആശങ്ക ഉയർന്നിട്ടുണ്ട്. വിഷയത്തിൽ നഗരസഭ നേരത്തെ പലതവണ മുന്നറിയിപ്പുകളും പിഴകളും നൽകിയിട്ടുണ്ടെന്നാണ് റിപ്പോർട്ടുകൾ.
എന്നാൽ പിഴകൾ നൽകിയിട്ടും ഭക്ഷണം വിതറുന്ന പ്രവൃത്തി അവസാനിച്ചിട്ടില്ലെന്നാണ് അധികൃതർ പറയുന്നത്. പ്രശ്നം പരിഹരിക്കാൻ ഭക്ഷണം വിതറുന്നത് നിർത്തണമെന്നും മാലിന്യങ്ങൾ എലികൾക്ക് എത്തിപ്പെടാനാകാത്ത വിധത്തിൽ സൂക്ഷിക്കണമെന്നും ആവശ്യപ്പെട്ടിട്ടുണ്ട്. സംഭവത്തിൽ കൂടുതൽ നടപടികൾ സ്വീകരിക്കുന്നതും അധികൃതർ പരിഗണിക്കുന്നുണ്ട്. വന്യമൃഗങ്ങൾക്ക് ഭക്ഷണം നൽകാനുള്ള ശ്രമം ഒരു പ്രദേശത്ത് എലിശല്യം വർധിപ്പിക്കുന്ന സാഹചര്യം സൃഷ്ടിച്ചതാണ് ഇപ്പോൾ ചർച്ചയാകുന്നത്.
Comments