മുംബൈ : ആരാധകരെ വീണ്ടും ഞെട്ടിക്കുകയാണ് ക്രിക്കറ്റ്താരം പൃഥ്വിഷായും നടി ആകൃതി അഗര്‍വാളും. വിവാഹനിശ്ചയം റദ്ദാക്കി ഒരു മാസത്തിനു ശേഷം വേര്‍പിരിയുകയാണെന്ന് പ്രഖ്യാപിച്ച ഇരുവരും വീണ്ടും ഒന്നിക്കുന്നു. പഴയത്‌പോലെ സാമൂഹ്യമാധ്യമം വഴി ഇരുവരും ഇക്കാര്യം സ്ഥിരീകരിക്കുകയും ചെയ്തിട്ടുണ്ട്. ഇന്‍സ്റ്റഗ്രാമില്‍ പങ്കുവച്ച കുറിപ്പിലൂടെ ആകൃതിയാണ് വീണ്ടും ഒന്നിക്കുന്ന കാര്യം അറിയിച്ചത്.
തങ്ങളുടെ ബന്ധത്തില്‍ അനാവശ്യമായി ഇടപെട്ട അടുപ്പമുള്ളവര്‍ എന്ന് തോന്നിപ്പിച്ചവര്‍ ഉണ്ടാക്കിയ തെറ്റിദ്ധാരണയായിരുന്നു മുമ്പ് വേര്‍പിരിയാന്‍ എടുത്ത തീരുമാനം എന്ന് ആകൃതി അഗര്‍വാള്‍ കുറിപ്പില്‍ വ്യക്തമാക്കുന്നു. മാര്‍ച്ചിലായിരുന്നു പൃഥ്വി ഷായും ആകൃതി അഗര്‍വാളും തമ്മിലുള്ള വിവാഹനിശ്ചയം കഴിഞ്ഞത്. പിന്നീട് സെപ്റ്റംബര്‍ 17നാണ് തങ്ങള്‍ വേര്‍പിരിയുകയാണെന്ന് ആകൃതി അറിയിച്ചത്. ഭാവി ലക്ഷ്യങ്ങളും സാഹചര്യങ്ങളും പരസ്പരം പൊരുത്തപ്പെടാത്തതിനാലാണ് സംയുക്തമായി ഇങ്ങനെയൊരു തീരുമാനമെടുത്തതെന്ന് ആകൃതി പറഞ്ഞു.
തെറ്റിദ്ധരിക്കപ്പെട്ടെന്നും അര്‍ഹതപ്പെട്ട ആത്മാര്‍ഥമായ ഒരു സംഭാഷണത്തിന് പോലും അവസരം നല്‍കാതെയാണ് താന്‍ തീരുമാനം എടുത്തതെന്നും ആ തീരുമാനത്തിന്റെയും അതുണ്ടാക്കിയ വേദനയുടേയും ഉത്തരവാദിത്തം ഏറ്റെടുക്കുന്നതായും താരം പറഞ്ഞു. തുറന്നു സംസാരിക്കുകയും മനസ്സിലാക്കുകയും ചെയ്തപ്പോള്‍ പരസ്പരം മതിയായവര്‍ എന്ന് തോന്നിക്കുകയും വീണ്ടും ഒരുമിച്ച് ജീവിക്കാന്‍ തീരുമാനിക്കുകയുമായിരുന്നു. ഇനി മറ്റാരുടെയും ആവശ്യമില്ല. ഇത്തവണ പരസ്പര ധാരണയിലും വിശ്വാസത്തിലും സ്‌നേഹത്തിലും മാത്രം അധിഷ്ഠിതമായിരിക്കും ഭാവിജീവിതമെന്ന് ആഗ്രഹിക്കുന്നതായും കുറിച്ചു. പുതിയ തുടക്കത്തിലും തങ്ങളുടെ തീരുമാനത്തെ മാനിക്കാനും ആകൃതി അഭ്യര്‍ത്ഥിച്ചിട്ടുണ്ട്. ഇമോജികളോടെ ഇതേ പോസ്റ്റ് പൃഥ്വി ഷായും പങ്കുവച്ചിട്ടുണ്ട്.
കുറേനാളായി ക്രിക്കറ്റ് കരിയറില്‍ തിരിച്ചടി നേരിട്ടുകൊണ്ടിരിക്കുന്ന താരമാണ് പൃഥ്വിഷാ. 2018ല്‍ വെസ്റ്റിന്‍ഡീസിനെതിരെ സെഞ്ചറി നേടി ടെസ്റ്റ് ക്രിക്കറ്റില്‍ അരങ്ങേറ്റം കുറിച്ച താരത്തെ, 2026ലെ ഐപിഎല്‍ ലേലത്തിന്റെ അവസാന ഘട്ടത്തില്‍ 75 ലക്ഷം രൂപയ്ക്കാണ് ഡല്‍ഹി ക്യാപിറ്റല്‍സ് സ്വന്തമാക്കിയത്. എന്നാല്‍ 2026 ഐപിഎല്‍ സീസണില്‍ ഒരു മത്സരത്തില്‍ പോലും ഷായ്ക്ക് കളിക്കാന്‍ അവസരം ലഭിച്ചില്ല.
രഞ്ജി ട്രോഫിയില്‍ മഹാരാഷ്ട്രയുടെ ക്യാപ്റ്റനായ പൃഥ്വിഷാ ആഭ്യന്തര ക്രിക്കറ്റ് കരിയറിലും പൃഥ്വി ഷാ തിരിച്ചടികള്‍ നേരിട്ടിരുന്നു. 2024 ഒക്ടോബറില്‍ മുംബൈയുടെ രഞ്ജി ട്രോഫി ടീമില്‍ നിന്ന് താരത്തെ ഒഴിവാക്കിയിരുന്നു. ഇതോടെയാണ് താരം മഹാരാഷ്ട്രയ്ക്ക് കളിക്കുന്നത്.
Comments