കണ്ണൂര്‍: തില്ലങ്കേരിയിലെ 20 കാരി കീര്‍ത്തനയുടെ ആത്മഹത്യയില്‍ അന്വേഷണം ക്രൈംബ്രാഞ്ചിന് കൈമാറി. പേരാവൂര്‍ ഡിവൈഎസ്പി നടത്തിയ അന്വേഷണത്തില്‍ കീര്‍ത്തനയുടെ കുടുംബം അതൃപ്തി അറിയിച്ചിരുന്നു. കീര്‍ത്തന ജീവനൊടുക്കിയത് പ്രണയ നൈരാശ്യത്തെ തുടര്‍ന്നാണെന്നും ആണ്‍സുഹൃത്തായ ആദിദേവിന്റെ അച്ഛന്‍ പോലീസുകാരനായതിനാല്‍ കേസ് അന്വേഷണം അട്ടിമറിക്കപ്പെടുന്നു എന്നുമായിരുന്നു കുടുംബത്തിന്റെ പരാതി.
മംഗലാപുരത്ത് ഫിസിയോ തെറാപ്പിനി വിദ്യാര്‍ത്ഥിനിയായിരുന്ന കീര്‍ത്തന ഏപ്രില്‍ 19നാണ് കിടപ്പുമുറിയില്‍ ജീവനൊടുക്കാന്‍ ശ്രമിച്ചത്. തുടര്‍ന്ന് ആശുപത്രിയില്‍ ചികിത്സയിലിരിക്കെ ഏപ്രില്‍ 30ന് കീര്‍ത്തന മരിച്ചു. ഈ സംഭവത്തിലാണ് ആറുമാസത്തിനുശേഷം അന്വേഷണം ക്രൈംബ്രാഞ്ചിന് കൈമാറുന്നത്.
കീര്‍ത്തന മട്ടന്നൂരില്‍ പ്ലസ് ടുവിനു പഠിക്കുമ്പോള്‍ ഒപ്പമുണ്ടായിരുന്ന ആദിദേവുമായി പ്രണയത്തിലായി. ഇതിനിടെ ആദിദേവും കീര്‍ത്തനയുമായുളള ബന്ധത്തില്‍ അസ്വാരസ്യങ്ങളുണ്ടായി.
ആദിദേവിന് മറ്റൊരു പെണ്‍കുട്ടിയുമായി ബന്ധമുണ്ടെന്നും, തന്നെ ഒഴിവാക്കാന്‍ ശ്രമിക്കുകയാണെന്നും, ആദിദേവ് ഇല്ലാതെ തനിക്ക് ജീവിക്കാന്‍ കഴിയില്ലെന്നും കാണിച്ച് അവസാനനാളുകളില്‍ സുഹൃത്തുക്കള്‍ക്ക് വാട്‌സ് ആപ്പ് സന്ദേശങ്ങള്‍ അയച്ചിരുന്നു. മംഗലാപുരത്ത് പഠിക്കാന്‍ പോയ കീര്‍ത്തന അവിടെ വെച്ച് ആത്മഹത്യയ്ക്ക് ശ്രമിച്ചിരുന്നു. തുടര്‍ന്ന് ചികിത്സയ്ക്ക് ശേഷം വീട്ടുകാര്‍ യുവതിയെ തില്ലങ്കേരിയിലെ വീട്ടിലേക്ക് കൂട്ടിക്കൊണ്ടുവന്നു.
തില്ലങ്കേരിയിലെ വീട്ടിലെത്തി രണ്ടു ദിവസത്തിന് ശേഷമാണ് കീര്‍ത്തന വീണ്ടും ആത്മഹത്യയ്ക്ക് ശ്രമിച്ചത്. ഒരാഴ്ചയ്ക്ക് ശേഷം മരിക്കുകയും ചെയ്തു. ആദ്യം കേസ് അന്വേഷിച്ച പേരാവൂര്‍ പോലീസ് ആദിദേവിനെതിരെ ആത്മഹത്യാ പ്രേരണ കുറ്റം ചുമത്തിയിരുന്നു. തുടര്‍ന്ന് ഹൈക്കോടതിയെ സമീപിച്ച ആദിദേവ് മുന്‍കൂര്‍ ജാമ്യവും നേടിയിരുന്നു.
കേസില്‍ ആദിദേവിനെ ഒന്നു ചോദ്യം ചെയ്യാന്‍ പോലും പോലീസ് തയ്യാറായിട്ടില്ലെന്നും കീര്‍ത്തനയുടെ കുടുംബം ആരോപിച്ചിരുന്നു. കേസ് മറ്റൊരു ഏജന്‍സിയെ ഏല്‍പ്പിക്കണമെന്ന് കുടുംബം ആഭ്യന്തരമന്ത്രി രമേശ് ചെന്നിത്തലയോട് ആവശ്യപ്പെട്ടിരുന്നു.
Comments