ക്രിക്കറ്റിന്റെ ദൈവം എന്നറിയപ്പെടുന്ന ഇന്ത്യൻ ക്രിക്കറ്റ് ഇതിഹാസം സച്ചിന്‍ ടെണ്ടുല്‍ക്കറിന്റെ മകള്‍ എന്ന മേല്‍വിലാസത്തിനപ്പുറം തന്റേതായ ഒരു ഐഡന്റിറ്റി നേടിയെടുത്ത താരപുത്രിയാണ് സാറ ടെണ്ടുല്‍ക്കര്‍. സോഷ്യല്‍ മീഡിയയില്‍ ലക്ഷക്കണക്കിന് ഫോളോവേഴ്സുള്ള ഇന്‍ഫ്ലുവന്‍സറായ സാറ, മുംബൈയില്‍ ‘പലാട്ടീ സ്റ്റുഡിയോ’ എന്ന സംരംഭവും നടത്തുന്നുണ്ട്. ഗ്ലോബല്‍ ഇ- ക്രിക്കറ്റ് പ്രീമിയര്‍ ലീഗില്‍ മുംബൈ ഫ്രാഞ്ചൈസിയുടെ ഉടമസ്ഥ കൂടിയാണ് സാറ.
സോഷ്യല്‍ മീഡിയയില്‍ സജീവമായ സാറ ഫാഷൻ-ലൈഫ്‌സ്റ്റൈൽ മേഖലകളിലും പ്രമുഖ ബ്രാൻഡുകളുടെ സഹകരണങ്ങളിലൂടെയും നിരവധി ഫോട്ടോഷൂട്ടുകള്‍ പങ്കിടാറുണ്ട്. തന്റെ 29-ാം ജന്മദിനാഘോഷത്തിന്റെ നിറവിലാണ് സാറ. ആരാധകരും സുഹൃത്തുക്കളുമടക്കം നിരവധി പേര്‍ താരപുത്രിക്ക് ആശംസകളും സ്നേഹവും പങ്കിടുന്നുണ്ട്.
ഇപ്പോഴിതാ മകള്‍ക്ക് ഹൃദയഹാരിയായ ആശംസ പങ്കിടുകയാണ് സാറ ടെണ്ടുല്‍ക്കര്‍. സച്ചിന്‍ പങ്കിട്ട ബ്ലാക്ക് ആൻഡ് വൈറ്റ് ചിത്രത്തിൽ, പരമ്പരാഗത വസ്ത്രം ധരിച്ച അച്ഛനെയും മകളെയും കാണാം.
‘‘ഞാന്‍ നിനക്ക് വഴി കാണിച്ചുകൊടുത്തിരുന്ന ഒരു കാലമുണ്ടായിരുന്നു...ഇപ്പോൾ, സ്വയം തിരഞ്ഞെടുക്കുന്ന വഴികളിലൂടെ സഞ്ചരിച്ച് മുന്നേറുന്നത് കാണുമ്പോൾ അളവറ്റ സന്തോഷമാണ് എനിക്ക്....ജന്മദിനാശംസകൾ, സാറ. ഒരുപാട് സ്നേഹം...’’ എന്നാണ് സച്ചിന്‍ ടെണ്ടുല്‍ക്കര്‍ കുറിച്ചിരിക്കുന്നത്. ചിത്രത്തില്‍ കുര്‍ത്ത- പൈജാമ ധരിച്ച സച്ചിനെയും സാരിയഴകളില്‍ തിളങ്ങുന്ന സാറയെയും കാണാം. ഈ പോസ്റ്റ് പെട്ടെന്നുതന്നെ സോഷ്യൽ മീഡിയയില്‍ ശ്രദ്ധ ആകർഷിച്ചു. ബ്രൗൺ ഹാർട്ട് ഇമോജികൾ നൽകി, ‘നന്ദി ബാബ, സ്നേഹിക്കുന്നു....’ എന്നാണ് സാറ അച്ഛന്റെ ആശംസയോട് പ്രതികരിച്ചത്. നിരവധി പേര്‍ സച്ചിന്റെ പോസ്റ്റിനു താഴെ സ്നേഹാശംസകള്‍ നിറയ്ക്കുന്ന കമന്റുകള്‍ കുറിച്ചിട്ടുണ്ട്.
Comments