ബോളിവുഡ് ഡ്രീം ഗേളായി ഒരു കാലത്ത് തിളങ്ങി നിന്നിരുന്ന താരമാണ് ഹേമമാലിനി. അഭിനേതാവ് എന്നതിലുപരി ഭരതനാട്യം നര്‍ത്തകി കൂടിയായ ഹേമ മാലിനി ഇന്നും കലയെ തന്റെ ജീവിതത്തിലെ അവിഭാജ്യ ഘടകമായി കാണുന്നുണ്ട്. പരമ്പരാഗത ചലനങ്ങളും ഭാവപൂർണ്ണമായ ആഖ്യാനശൈലിയും സങ്കീർണ്ണമായ വേഷവിധാനങ്ങളും സമന്വയിപ്പിച്ചുകൊണ്ട്, വിപുലമായ നൃത്ത-നാടകങ്ങളിലൂടെ ഹൈന്ദവ പുരാണങ്ങളിലെ കഥകളും ഭക്തിനിർഭരമായ വിഷയങ്ങളും താരം വർഷങ്ങളായി അവതരിപ്പിക്കാറുണ്ട്.
ഇപ്പോഴിതാ ഹൈദരാബാദിൽ തന്റെ പ്രശസ്തമായ നൃത്ത-നാടകമായ ‘മാതാ ദുർഗ’യെ അവതരിപ്പിച്ചുകൊണ്ട് 2026-ലെ ശാരദീയ നവരാത്രി ആഘോഷങ്ങൾക്ക് തുടക്കം കുറിക്കുകയാണ് ഹേമമാലിനി. മാതാ പാർവതിയുടെ വേഷം അണിഞ്ഞ താരം, അന്നത്തെ ചിത്രങ്ങൾ സോഷ്യൽ മീഡിയയിൽ പങ്കുവെക്കുകയും ആ അനുഭവത്തെ ഒരു അനുഗ്രഹമായി വിശേഷിപ്പിക്കുകയും ചെയ്തു.
‘‘കഴിഞ്ഞ ദിവസം വൈകുന്നേരം, തെലങ്കാനയിലെ അഗർവാൾ സമാജ് സംഘടിപ്പിച്ച ‘ആഗ്ര ദാണ്ഡിയ നവരാത്രി ആഘോഷങ്ങളുടെ’ ഭാഗമായി ക്ലാസിക് കൺവെൻഷൻ സെന്ററിൽ ഞാൻ പരിപാടി അവതരിപ്പിച്ചു. 2026 ഒക്ടോബർ 11-ന് നടന്ന ഈ പരിപാടി മഹാരാജ അഗ്രസൻ ജയന്തി ആഘോഷം കൂടിയായിരുന്നു.
നവരാത്രിയുടെ ആദ്യ ദിനത്തിൽ എന്റെ ഏറ്റവും ജനപ്രിയമായ ‘ദുർഗ്ഗ’ എന്ന ബാലെ അവതരിപ്പിക്കാൻ കഴിഞ്ഞത് അതിമനോഹരവും സവിശേഷവുമായ ഒരു അനുഭവമായിരുന്നു... അതെന്നെ സംബന്ധിച്ചിടത്തോളം വലിയൊരു അനുഗ്രഹമായി തോന്നി....’’ എന്ന് കുറിച്ചാണ് ഹേമമാലിനി തന്റെ സ്റ്റേജ് പെര്‍ഫോമന്‍സിന്റെ ചിത്രങ്ങള്‍ പങ്കിട്ടത്. മാതാ പാർവതിയുടെ വേഷത്തിലുള്ള താനും ശിവനായി വേഷമിട്ട മറ്റൊരു കലാകാരനും ഒന്നിച്ചുള്ള ചിത്രങ്ങളാണ് താരം പങ്കിട്ടത്. തന്റെ 77-ാം വയസ്സിലും ശാസ്ത്രീയനൃത്തം വേദിയില്‍ അവതരിപ്പിച്ച താരത്തിന് നിറഞ്ഞ കൈയടിയാണ് ആരാധകര്‍ നല്‍കുന്നത്. നവരാത്രിയുടെ ചൈതന്യത്തെയും ശാസ്ത്രീയ കലാരൂപത്തോടുള്ള താരത്തിന്റെ അചഞ്ചലമായ സമർപ്പണത്തെയുമാണ് ഇതിലൂടെ കാണാന്‍ കഴിയുന്നത് എന്നാണ് പലരും കമന്റുകളില്‍ കുറിക്കുന്നത്.
Comments