കന്നഡ ചിത്രമായ ‘ഉല്ലാസ ഉത്സാഹ’യിലൂടെ വെള്ളിത്തിരയിലെത്തിയ താരമാണ് യാമി ഗൗതം. തുടര്‍ന്ന് പഞ്ചാബി, തെലുങ്ക്, ഹിന്ദി, തമിഴ്, തെലുങ്ക് ഭാഷകളിലടക്കം താരം തിളങ്ങി. പൃഥിരാജ് ചിത്രമായ ‘ഹീറോ’യിലൂടെ മലയാളസിനിമാപ്രേക്ഷകരുടെ മനസ്സിലും താരം ഇടം നേടി. ബോളിവുഡിലെ മികച്ച ചിത്രങ്ങളുടെ ഭാഗമായ താരം ധുരന്ധർ, ഉറി ദ് സർജിക്കൽ സ്ട്രൈക്ക് എന്നീ ചിത്രങ്ങളുടെ സംവിധായകനായ ആദിത്യ ധറിനെയാണ് വിവാഹം ചെയ്തത്. ലൈംലൈറ്റില്‍ തിളങ്ങി നില്‍ക്കുമ്പോഴും യാമിയും ആദിത്യയും വ്യക്തിജീവിതം പൊതുചർച്ചയാക്കുന്നതിൽനിന്ന് പൊതുവേ വിട്ടുനിൽക്കുന്ന താരദമ്പതിമാരാണ്.
ഇപ്പോഴിതാ ഹോളിവുഡ് സൂപ്പര്‍താരം ബ്രാഡ് പിറ്റിനൊപ്പം ഓട്ടോറിക്ഷയില്‍ യാത്ര ചെയ്യാന്‍ അവസരം ലഭിച്ചാല്‍ എന്തായിരിക്കും പ്രതികരണം എന്ന ചോദ്യത്തിന് കൗതുകകരമായ മറുപടി നല്‍കുകയാണ് യാമി ഗൗതം. തന്റെ പുതിയ ചിത്രമായ 'നയീ നവേലി'യുടെ അഹമ്മദാബാദിലെ പ്രൊമോഷന്‍ പരിപാടിക്കിടെയായിരുന്നു യാമിയുടെ രസകരമായ മറുപടി.
പരിപാടിക്കിടെ അവതാരകന്‍ യാമിയോട്, ‘ബ്രാഡ് പിറ്റിനൊപ്പം ഓട്ടോറിക്ഷയില്‍ സഞ്ചരിക്കുമ്പോള്‍, താങ്കള്‍ ഓട്ടോറിക്ഷ മീറ്ററിലേക്ക് ശ്രദ്ധിക്കുമോ?’ എന്ന് ചോദിച്ചു. ആരാണെങ്കിലും ഹോളിവുഡ് ക്രഷ് ബ്രാഡ് പിറ്റിന്റെ പേരു പറയുന്ന സ്ഥാനത്ത്, ഒട്ടും ആലോചിക്കാതെ യാമി പറഞ്ഞ മറുപടി, ‘എന്റെ കണ്ണുകള്‍ എപ്പോഴും ആദിത്യ ധറില്‍ തന്നെയായിരിക്കും...’ എന്നാണ്. കയ്യടിയും ആര്‍പ്പുവിളികളും നല്‍കിയാണ് യാമിയുടെ ഈ മറുപടി സദസ്സിലുള്ള ആരാധകര്‍ സ്വീകരിച്ചത്.
2021 ലാണ് യാമി ഗൗതമും ആദിത്യ ധറും തമ്മില്‍ വിവാഹിതരായത്. 2024 ല്‍ ഇവര്‍ക്ക് ‘വേദവിദ്’ എന്നൊരു മകന്‍ ജനിച്ചു. എന്ന മകന്‍ ജനിക്കുന്നത്. കഴിഞ്ഞ മാസം ഗുജറാത്തിലെ ഏക്താ നഗറില്‍ നടന്ന 72-ാമത് ദേശീയ ചലച്ചിത്ര പുരസ്‌കാര ചടങ്ങില്‍ വച്ച് ‘ആര്‍ട്ടിക്കിള്‍ 370’ എന്ന ചിത്രത്തിലെ മികച്ച പ്രകടനത്തിന് യാമി ഗൗതമിന് മികച്ച നടിക്കുള്ള ദേശീയ പുരസ്‌കാരം ലഭിച്ചപ്പോള്‍, അതേ ചിത്രത്തിന്റെ നിര്‍മ്മാതാവ് എന്ന നിലയില്‍ ആദിത്യ ധറിന് മികച്ച ചിത്രത്തിനുള്ള പുരസ്‌കാരവും ലഭിച്ചിരുന്നു.
തമിഴ് സംവിധായകന്‍ ബാലാജി മോഹന്‍ ബോളിവുഡില്‍ അരങ്ങേറ്റം കുറിക്കുന്ന ‘നയീ നവേലി’ എന്ന ഹൊറര്‍-കോമഡി ചിത്രത്തിന്റെ റിലീസിനായുള്ള തയ്യാറെടുപ്പിലാണ് യാമി ഗൗതം. ഒക്ടോബര്‍ 16-നാണ് ചിത്രം തിയേറ്ററുകളിലെത്തുന്നത്. ആദിനാഥ് കോത്താരെ, മിതാ വസിഷ്ഠ്, സോണാല്‍ ഝാ, സുനിത രാജ്വര്‍ എന്നിവരാണ് ചിത്രത്തിലെ മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്.
Comments