തെന്നിന്ത്യയിലും ബോളിവുഡിലും ഒരേ പോലെ തിളങ്ങി നില്‍ക്കുന്ന താരമായ ശ്രിയ ശരണ്‍. മികച്ച കഥാപാത്രങ്ങളിലൂടെ പ്രേക്ഷകരുടെ മനസ്സിലിടം നേടിയ താരം ഫാഷന്‍ ലോകത്തിനും ഏറെയിഷ്ടമുള്ള താരമാണ്. ബ്രഹ്മാണ്ഡ സംവിധായകന്‍ എസ്.എസ്. രാജമൗലി സംവിധാനം ചെയ്ത ആര്‍ആര്‍ആര്‍ എന്ന ചിത്രത്തിലും സുപ്രധാനമായ ഒരു കഥാപാത്രത്തെ ശ്രിയ അവതരിപ്പിച്ചിരുന്നു. ചിത്രത്തിലെ ഫ്ലാഷ്‌ബാക്ക് രംഗങ്ങളിൽ അജയ് ദേവ്ഗൺ അവതരിപ്പിച്ച ‘അല്ലൂരി വെങ്കട്ടരാമ രാജു’ എന്ന വിപ്ലവകാരിയുടെ ഭാര്യയായ ‘സരോജിനി’ എന്ന വൈകാരിക പ്രാധാന്യമുള്ള കഥാപാത്രത്തെയാണ് താരം അവതരിപ്പിച്ചത്. ചിത്രത്തില്‍ രാം ചരണ്‍ അവതരിപ്പിച്ച അല്ലൂരി സീതാരാമ രാജുവിന്റെ അമ്മ കൂടിയായിരുന്നു താരം.
ഇപ്പോഴിതാ ഈ സിനിമയില്‍ അഭിനയിക്കാന്‍ വേണ്ടി കസിന്റെ വിവാഹാഘോഷങ്ങൾ പാതിവഴിയിൽ ഉപേക്ഷിക്കേണ്ടി വന്നതിനെപ്പറ്റി പറയുകയാണ് ശ്രിയ ശരണ്‍. രാജമൗലിയ്ക്കൊപ്പം വീണ്ടും പ്രവർത്തിക്കാനുള്ള അവസരം നഷ്ടപ്പെടുത്താൻ തനിക്ക് ആഗ്രഹമില്ലായിരുന്നുവെന്നും ചിത്രത്തിൽ അഭിനയിക്കാനുള്ള പെട്ടെന്നുള്ള ക്ഷണം ലഭിച്ചതിനെത്തുടർന്ന്, ജയ്പൂരിൽ നടന്ന തന്റെ കസിന്റെ വിവാഹാഘോഷങ്ങൾ പാതിവഴിയിൽ ഉപേക്ഷിച്ചു പോകേണ്ടി വന്നുവെന്നുമാണ് താരം പറയുന്നത്.
‘‘ഞാൻ അന്ന് എന്റെ കസിന്റെ വിവാഹത്തിലായിരുന്നു. അപ്പോഴാണ് പിറ്റേന്ന് വരാമോ എന്ന് ചോദിച്ച് ഒരു കോൾ വന്നത്. അങ്ങനെ, വിവാഹ ചടങ്ങുകൾക്കിടയിൽ നിന്ന് ഇറങ്ങി ഞാൻ ഹൈദരാബാദിലേക്ക് കുതിച്ചു. പുലർച്ചെ 5 മണിക്കായിരുന്നു എന്റെ വിമാനം. ആ രാത്രി മുഴുവൻ ഞാൻ ഉറങ്ങിയില്ല. ‘വന്നാൽ മാത്രം മതി, നാളെ സ്ക്രിപ്റ്റ് വായിക്കാം, മറ്റന്നാൾ ഷൂട്ടിംഗ് തുടങ്ങാം...’ എന്നാണ് അവർ പറഞ്ഞത്. ഒരു സ്ക്രിപ്റ്റ് വായനയും ലുക്ക് ടെസ്റ്റും മാത്രമായിരിക്കും ഉണ്ടാവുകയെന്നാണ് കരുതിയത്. എന്നാല്‍ അവിടെ എത്തിയപ്പോൾ, ‘ഞങ്ങൾ സ്ക്രിപ്റ്റ് വായിക്കുകയാണ്, നിങ്ങളുടെ ലുക്ക് ഒന്ന് കാണണം’ എന്ന് പറഞ്ഞു.
ഒടുവിൽ അവർ പറഞ്ഞു, ‘ശരി, നമുക്ക് ഷൂട്ടിംഗ് തുടങ്ങാം’ എന്ന്. അദ്ദേഹത്തോടൊപ്പം പ്രവർത്തിക്കുന്നത് എപ്പോഴും രസകരമാണ്. അദ്ദേഹത്തിന്റെ ചിത്രത്തിൽ പ്രവർത്തിക്കുമ്പോൾ എപ്പോഴും ഓർമ്മയിൽ നിൽക്കുന്ന ഒരു കാര്യം എല്ലാവരും ഒന്നിച്ച് ഉച്ചഭക്ഷണം കഴിക്കുന്നു എന്നതാണ്. എല്ലാവരും പുറത്തിറങ്ങി ഒന്നിച്ച് ഇരുന്ന് ഭക്ഷണം കഴിക്കും. അദ്ദേഹത്തിന്റെ ഭാര്യ രമ മാം വീട്ടിൽ നിന്ന് ഉണ്ടാക്കിയ ഭക്ഷണമാണ് കൊണ്ടുവരുന്നത്. ക്യാമറാമാനും മറ്റെല്ലാവരും ഒന്നിച്ച് ഇരുന്ന്, ഏത് രംഗമാണ് ചെയ്യാൻ പോകുന്നതെന്നും സിനിമകളെക്കുറിച്ചും മറ്റുള്ളവർക്ക് പ്രചോദനമാകുന്ന സിനിമകളെക്കുറിച്ചുമൊക്കെ സംസാരിക്കും. അദ്ദേഹത്തോടൊപ്പം അതെല്ലാം ചെയ്യുന്നത് വളരെ രസകരമാണ്...’’ ശ്രിയ പറഞ്ഞു. രാജമൗലിയ്ക്കൊപ്പം ശ്രിയ ശരൺ പ്രവർത്തിക്കുന്ന രണ്ടാമത്തെ ചിത്രമായിരുന്നു ‘ആർ.ആർ.ആർ’. നേരത്തെ, പ്രഭാസ് നായകനായ 2005-ലെ ‘ഛത്രപതി’ എന്ന ചിത്രത്തിലും താരം അഭിനയിച്ചിരുന്നു.
അഭിഷേക് പഥക് സംവിധാനം ചെയ്ത ‘ദൃശ്യം 3: ദ കൺക്ലൂഷൻ’ എന്ന ചിത്രത്തിലാണ് ശ്രിയ ശരൺ ഒടുവിൽ പ്രത്യക്ഷപ്പെട്ടത്. ചിത്രം നിറഞ്ഞ കൈയടി നേടി തിയേറ്ററുകളിൽ പ്രദർശനം തുടരുകയാണ്. ഇതുവരെ 400 കോടി രൂപയിലധികം കളക്ഷൻ നേടിയ ചിത്രത്തില്‍ അജയ് ദേവ്ഗണിന്റെ ഭാര്യ കഥാപാത്രമായിട്ടാണ് ശ്രിയ എത്തുന്നത്. ആദ്യ രണ്ടു ഭാഗങ്ങളിലും ശ്രിയ ഉണ്ടായിരുന്നു.
റഷ്യന്‍ സ്വദേശി ആന്‍ഡ്രേ കൊസ്ചീവ് ആണ് ശ്രിയയുടെ ജീവിതപങ്കാളി. തന്റെ പ്രെഗ്നന്‍സിയും മകള്‍ ജനിച്ചതുമെല്ലാം വളരെ പേഴ്‌സണല്‍ ആയിട്ടായിരുന്നു താരം സൂക്ഷിച്ചത്. 2021 ജനുവരിയില്‍ തനിക്ക് ഒരു മകള്‍ പിറന്നതായി 2021 ഒക്ടോബര്‍ മാസത്തിലായിരുന്നു താരം സോഷ്യല്‍ മീഡിയയിലൂടെ ആരാധകരെ അറിയിച്ചത്.
Comments