കൊച്ചി: എറണാകുളത്ത് സിനഗോഗിന് നേരെയുണ്ടായ തീവെയ്പ്പ് സംഭവത്തില്‍ തീവ്രവാദബന്ധം സംശയിച്ച് പൊലീസ്. പിടികൂടിയയാളെ കേന്ദ്ര ഏജന്‍സികളടക്കം ചോദ്യം ചെയ്തു. ടെലഗ്രാം വഴിയുള്ള നിര്‍ദേശാനുസരിച്ചാണ് കുറ്റകൃത്യം നടത്തിയതെന്ന് സൂചനയുണ്ട്. എറണാകുളം സെന്‍ട്രല്‍ പൊലീസും പുത്തന്‍കുരിശ് പൊലീസും കേസെടുത്തിട്ടുണ്ട്. ഇയാളുടെ വീട്ടില്‍ നിന്നും മയക്കുമരുന്നും കണ്ടെത്തി.
സംഭവവുമായി ബന്ധപ്പെട്ട് പുത്തന്‍കുരിശ് സ്വദേശിയായ എബിന്‍ ബി.പോളിനെ (32) പൊലീസ് പിടികൂടി. സിനഗോഗിന് മുന്നിലുള്ള നഴ്‌സറിയുടെ ഫ്‌ലക്‌സുകളില്‍ പെട്രോളൊഴിച്ച് തീ കൊളുത്തുകയും ഈ ദൃശ്യങ്ങള്‍ മൊബൈല്‍ ഫോണില്‍ പകര്‍ത്തുകയും ചെയ്തതായിട്ടാണ് വിവരം. താമസസ്ഥലത്ത് നിന്നും പോലീസ് രാസലഹരിയും പിടിച്ചെടുത്തിട്ടുണ്ട്.
തിങ്കളാഴ്ച പുലര്‍ച്ചെ 2.30ഓടെയാണ് എറണാകുളം മാര്‍ക്കറ്റിനുള്ളിലെ സിനഗോഗിനു മുന്‍വശത്ത് തീവയ്പുണ്ടായത്. സിനഗോഗിന്റെ മാനേജിങ് ട്രസ്റ്റി പരിപാലിക്കുന്ന ഹോര്‍ട്ടികള്‍ച്ചര്‍ നഴ്‌സറിയുടെ ബാനറുകളും ഫ്‌ലെക്‌സുകളും പെട്രോളൊഴിച്ചു തീ കൊളുത്തുകയായിരുന്നു. രാവിലെയാണു സംഭവം ശ്രദ്ധയില്‍പ്പെട്ട പൊലീസ് സിസിടിവി ദൃശ്യങ്ങള്‍ പരിശോധിക്കുകയും ഒരു കാറിന്റെ നമ്പര്‍ കണ്ടെത്തുകയുമായിരുന്നു. ഈ കാര്‍ നമ്പര്‍ കേന്ദ്രീകരിച്ചു നടത്തിയ അന്വേഷണത്തിലാണ് പ്രതിയിലേക്ക് എത്തിയത്.
പ്രതി പുത്തന്‍കുരിശിലെ ഒരു വില്ലയില്‍ വാടകയ്ക്കു താമസിക്കുന്നയാളാണെന്ന കണ്ടെത്തലാണ് എബിനിലേക്ക് എത്തിയത്. സിനഗോഗിന് പോലീസ് സംരക്ഷണമുണ്ടായിരുന്നെങ്കിലും തീ കൊളുത്തിയ സംഭവം പോലീസ് ശ്രദ്ധിച്ചിരുന്നില്ല. കാറിലെത്തിയ പ്രതി, വാഹനം മാറ്റിയിട്ട് പള്ളിക്കു മുന്നിലെ നഴ്‌സറിയിലേക്ക് പെട്രോള്‍ ഒഴിക്കുകയും തുടര്‍ന്ന് മാറിനിന്നു തീ എറിയുകയും മൊബൈലില്‍ ദൃശ്യം പകര്‍ത്തുകയും ചെയ്തു. പിന്നീട് വീട്ടുകാരുമായെത്തി പ്രതിയെ പിടികൂടിയ പോലീസ് ഇയാളുടെ ഫോണില്‍ നടത്തിയ പരിശോധനയില്‍ ടെലിഗ്രാം സന്ദേശം കണ്ടെത്തുകയായിരുന്നു. അതേസമയം ഈ നിര്‍ദേശം ആരുടേതാണെന്ന് കണ്ടെത്താനായിട്ടില്ല.
ഇയാള്‍ താമസിച്ചിരുന്ന വടയമ്പാടി പത്താംമൈലിലുള്ള വീട്ടില്‍ നടത്തിയ പരിശോധനയില്‍ വന്‍ തോതില്‍ രാസലഹരി മരുന്നുകളും പിടികൂടിയിരുന്നു. സെന്‍ട്രല്‍ പൊലീസ് നല്‍കിയ വിവരമനുസരിച്ച് പുത്തന്‍കുരിശ് പൊലീസ് ബ്രൗണ്‍, വെള്ള ഹെറോയിന്‍, കെറ്റാമിന്‍ എന്നിവയടക്കമുള്ള മയക്കുമരുന്നാണ് കണ്ടെത്തിയത്.
Comments