നവരാത്രി ആഘോഷത്തിനിടെ ബൈക്കുകളിലും ജീപ്പുകളിലും സഞ്ചരിച്ച് കൈയിൽ വാളേന്തി അഭ്യാസപ്രകടനം നടത്തുന്ന വനിതകളുടെ ദൃശ്യങ്ങൾ സമൂഹമാധ്യമങ്ങളിൽ വൈറലാകുന്നു. ഗുജറാത്തിലെ രാജ്കോട്ടിലാണ് പരമ്പരാഗത വാൾനൃത്തമായ 'തൽവാർ റാസ്' അവതരിപ്പിച്ച് വനിതകൾ ശ്രദ്ധ നേടിയത്. പരമ്പരാഗത വേഷത്തിൽ വാളുകളേന്തി വാഹനങ്ങളിൽ അഭ്യാസപ്രകടനം നടത്തുന്ന വനിതകളുടെ ദൃശ്യങ്ങൾ നിരവധി പേരാണ് സമൂഹമാധ്യമങ്ങളിൽ പങ്കുവെച്ചത്. പാരമ്പര്യവും ധൈര്യവും ഒത്തുചേരുന്ന പ്രകടനം കാണികളുടെ ശ്രദ്ധ പിടിച്ചുപറ്റി.
രാജ്കോട്ടിലെ ചരിത്രപ്രസിദ്ധമായ രഞ്ജിത് വിലാസ് കൊട്ടാരത്തിന്റെ മൈതാനത്താണ് പരിപാടി നടന്നത്. ക്ഷത്രിയ, രജപുത്ര സമുദായങ്ങളിലെ വനിതകളാണ് തൽവാർ റാസ് അവതരിപ്പിച്ചത്. സാധാരണ ഗർബ, ദണ്ഡിയ നൃത്തങ്ങൾക്കപ്പുറം വാളുപയോഗിച്ചുള്ള ആയോധനകലയുടെ ചുവടുകളും അഭ്യാസമുറകളും ഉൾക്കൊള്ളുന്നതാണ് ഈ കലാരൂപം. നവരാത്രി ആഘോഷങ്ങളുടെ ഭാഗമായി വർഷങ്ങളായി ഇവിടെ ഈ പ്രകടനം സംഘടിപ്പിച്ചുവരുന്നു. ഇത്തവണ ബൈക്കുകളിലും തുറന്ന ജീപ്പുകളിലും കയറിയുള്ള അഭ്യാസപ്രകടനങ്ങൾ കൂടി ഉൾപ്പെടുത്തിയതോടെ പരിപാടി കൂടുതൽ ശ്രദ്ധേയമായി.
വാളുകൾ കൈകാര്യം ചെയ്യുന്നതിനൊപ്പം വാഹനങ്ങളിൽ സന്തുലിതാവസ്ഥ നിലനിർത്തിയും ചുവടുകൾ അവതരിപ്പിച്ചുമാണ് വനിതകൾ കാണികളെ അമ്പരപ്പിച്ചത്. പരിപാടിയിൽ പങ്കെടുക്കുന്നവർ നവരാത്രിക്ക് ഏകദേശം ഒന്നര മാസം മുമ്പുതന്നെ പരിശീലനം ആരംഭിക്കാറുണ്ടെന്നാണ് റിപ്പോർട്ടുകൾ. പരിചയസമ്പന്നരായ പരിശീലകരുടെ നേതൃത്വത്തിലാണ് അഭ്യാസമുറകളും വാളിന്റെ ചലനങ്ങളും പഠിക്കുന്നത്. ആദ്യമായി വാൾ കൈയിലെടുക്കുന്നവർക്ക് പോലും ശരിയായ പരിശീലനം നൽകിയ ശേഷമാണ് പ്രകടനത്തിൽ പങ്കെടുപ്പിക്കുന്നതെന്ന് സംഘാടകരുമായി ബന്ധപ്പെട്ടവർ വ്യക്തമാക്കുന്നു.
പരമ്പരാഗത കലാരൂപത്തെ പുതിയ രീതിയിൽ അവതരിപ്പിച്ചതാണ് ഇത്തവണത്തെ തൽവാർ റാസിനെ ശ്രദ്ധേയമാക്കിയത്. സ്ത്രീകളുടെ ധൈര്യവും ആത്മവിശ്വാസവും പ്രകടിപ്പിക്കുന്ന വേദി കൂടിയാണിതെന്ന് പരിപാടിയിൽ പങ്കെടുത്തവർ പറയുന്നു. തലമുറകളിലൂടെ കൈമാറിവന്ന പാരമ്പര്യം സംരക്ഷിക്കുന്നതിനൊപ്പം പുതുതലമുറയ്ക്ക് ഈ കലാരൂപത്തെ പരിചയപ്പെടുത്താനും പരിപാടി സഹായിക്കുന്നുണ്ട്. വാളേന്തിയുള്ള വനിതകളുടെ പ്രകടനത്തിന്റെ ദൃശ്യങ്ങൾ വ്യാപകമായി പ്രചരിച്ചതോടെ രാജ്കോട്ടിലെ നവരാത്രി ആഘോഷം സമൂഹമാധ്യമങ്ങളിൽ ചർച്ചയാവുകയാണ്.
Comments