പിറന്നാൾ ആഘോഷത്തിനിടെ അപ്രതീക്ഷിതമായി മുന്നിലെത്തിയ സഹോദരിയെ കണ്ട് വികാരാധീനയായി യുവതി. 25-ാം പിറന്നാൾ ആഘോഷിക്കുകയായിരുന്ന ശിവാംഗി തിവാരിക്കാണ് സഹോദരി ഒരുക്കിയ സർപ്രൈസ് സമ്മാനമായി മാറിയത്. അയർലൻഡിലെ ഡബ്ലിനിൽനിന്ന് സഹോദരി നേരിട്ടെത്തി പിറന്നാൾ ആഘോഷത്തിൽ പങ്കുചേർന്നതിന്റെ ദൃശ്യങ്ങളാണ് ഇപ്പോൾ സമൂഹമാധ്യമങ്ങളിൽ വൈറലാകുന്നത്. വിലകൂടിയ സമ്മാനങ്ങളേക്കാൾ പ്രിയപ്പെട്ടവരുടെ സാന്നിധ്യമാണ് ഏറ്റവും വലിയ സന്തോഷമെന്ന് ഓർമിപ്പിക്കുന്ന ഈ നിമിഷം നിരവധി പേരുടെ ഹൃദയം കീഴടക്കി.
പിറന്നാൾ കേക്ക് മുറിക്കാനുള്ള ഒരുക്കത്തിലായിരുന്നു ശിവാംഗി. കേക്കിനരികിൽ നിന്ന് ആഘോഷത്തിനായി തയ്യാറെടുക്കുന്നതിനിടെ പിന്നിൽനിന്ന് സഹോദരിയുടെ ശബ്ദം കേട്ടു. കേക്ക് മനോഹരമാണെന്ന് പറഞ്ഞുകൊണ്ടാണ് സഹോദരി അരികിലെത്തിയത്. ശബ്ദം കേട്ട് തിരിഞ്ഞുനോക്കിയ ശിവാംഗി മുന്നിൽ നിൽക്കുന്നത് സ്വന്തം സഹോദരിയാണെന്ന് തിരിച്ചറിഞ്ഞതോടെ അമ്പരന്നു. അപ്രതീക്ഷിതമായ കൂടിക്കാഴ്ചയുടെ സന്തോഷം അടക്കാനാകാതെ യുവതി വികാരാധീനയായി.
തന്റെ 25-ാം പിറന്നാളിന് ലഭിച്ച ഏറ്റവും വലിയ ആഗ്രഹം യാഥാർഥ്യമാകുന്ന നിമിഷമാണിതെന്ന് സൂചിപ്പിച്ചുകൊണ്ടാണ് ശിവാംഗി വീഡിയോ പങ്കുവെച്ചത്. ഡബ്ലിനിൽനിന്ന് ഇന്ത്യയിലേക്ക് യാത്ര ചെയ്താണ് സഹോദരി ഈ സർപ്രൈസ് ഒരുക്കിയത്. ഒരുമിച്ച് പിറന്നാൾ ആഘോഷിക്കാൻ കഴിയുമെന്ന് ശിവാംഗി പ്രതീക്ഷിച്ചിരുന്നില്ല. എന്നാൽ ആഘോഷത്തിനിടെ സഹോദരി അപ്രതീക്ഷിതമായി മുന്നിലെത്തിയതോടെ ആ ദിനം ഇരുവർക്കും മറക്കാനാവാത്ത അനുഭവമായി മാറി.
വീഡിയോ പുറത്തുവന്നതോടെ നിരവധി പേരാണ് സഹോദരിമാരുടെ സ്നേഹനിമിഷത്തെ അഭിനന്ദിച്ച് രംഗത്തെത്തിയത്. 'ഏറ്റവും മനോഹരമായ സർപ്രൈസ്' എന്നും 'ഹൃദയം നിറയ്ക്കുന്ന കാഴ്ച' എന്നുമുള്ള പ്രതികരണങ്ങളാണ് വീഡിയോയ്ക്ക് ലഭിക്കുന്നത്. ദൂരങ്ങൾ എത്രയുണ്ടെങ്കിലും പ്രിയപ്പെട്ടവർക്കായി സമയം കണ്ടെത്തുന്നതിന്റെ വില വ്യക്തമാക്കുന്നതാണ് ഈ കൂടിക്കാഴ്ചയെന്ന് പലരും അഭിപ്രായപ്പെട്ടു. സഹോദരിയുടെ അപ്രതീക്ഷിത വരവിലൂടെ ശിവാംഗിക്ക് ലഭിച്ച സന്തോഷം സമൂഹമാധ്യമങ്ങളിലും വലിയ ശ്രദ്ധ നേടുകയാണ്.
Comments