ന്യൂഡൽഹി: സമാധാന ബോണ്ടുകൾ ലംഘിച്ചതിനും ജന്തർ മന്തറിൽ അതിക്രമിച്ചു കയറിയതിനും 'കോക്രോച്ച് ജനതാ പാർട്ടി' (സിജെപി) നേതാക്കളായ സൗരവ് ദാസ്, അശുതോഷ് റാങ്ക എന്നിവരെ അഞ്ച് ദിവസത്തെ ജുഡീഷ്യൽ കസ്റ്റഡിയിൽ വിടുകയും തിഹാർ ജയിലിലെ വ്യത്യസ്ത സെല്ലുകളിൽ അടയ്ക്കുകയും ചെയ്തുവെന്ന് പോലീസ് അറിയിച്ചു.
ലഭിച്ച വിവരമനുസരിച്ച് സൗരവ് ദാസിനെ തിഹാർ ജയിൽ നമ്പർ 2-ലും റാങ്കയെ ജയിൽ നമ്പർ 4-ലുമാണ് പാർപ്പിച്ചിരിക്കുന്നത്. സഹപ്രവർത്തകനായ അജിങ്ക്യ ഷിൻഡെയോട് ആറുമാസത്തേക്ക് സമാധാനവും നല്ല പെരുമാറ്റവും പാലിക്കണമെന്ന് ആവശ്യപ്പെടുകയും, 5,000 രൂപയുടെ വ്യക്തിഗത ബോണ്ടിലും ആൾജാമ്യത്തിലും വിട്ടയച്ചതായും പോലീസ് വ്യക്തമാക്കി.
മുഖ്യ തിരഞ്ഞെടുപ്പ് കമ്മീഷണർ ജ്യാനേഷ് കുമാറിന്റെ രാജി ആവശ്യപ്പെട്ട് മുദ്രാവാക്യം വിളിച്ചുകൊണ്ടും ദേശീയ പതാക ഉയർത്തിക്കൊണ്ടും, ചൊവ്വാഴ്ച പുലർച്ചെ ബാരിക്കേഡുകൾ തകർത്ത് അനുമതിയില്ലാതെ ജന്തർ മന്തർ പ്രദേശത്തേക്ക് പ്രവേശിച്ചതിനാണ് സി.ജെ.പി നേതാക്കളെ കസ്റ്റഡിയിലെടുത്തത്. അതിക്രമിച്ചു കയറൽ, നിരോധനാജ്ഞ ലംഘനം, സമാധാന ബോണ്ട് ലംഘനം, ഔദ്യോഗിക കൃത്യനിർവഹണം തടസ്സപ്പെടുത്തൽ എന്നീ കുറ്റങ്ങളാണ് ഇവർക്കെതിരെ ചുമത്തിയിരിക്കുന്നത്.
ശനിയാഴ്ച കസ്റ്റഡിയിലെടുത്തതിന് ശേഷം സൗരവ് ദാസും റാങ്കയും ഒരു വർഷത്തേക്ക് സമാധാനം പാലിക്കുമെന്ന് ബോണ്ടിൽ ഒപ്പിട്ടിരുന്നതായി പോലീസ് പറഞ്ഞു. ഒക്ടോബർ 13-ന് പുലർച്ചെ ദാസ്, റാങ്ക, ഷിൻഡെ എന്നിവരും മറ്റ് 11 സിജെപി അംഗങ്ങളും ചേർന്ന്, പ്രതിഷേധ സ്ഥലങ്ങളുടെ പട്ടികയിൽ നിന്ന് ഒഴിവാക്കപ്പെട്ട ജന്തർ മന്തറിലേക്ക് സ്വകാര്യ വ്യക്തികളുടെ സ്ഥലം വഴി അതിക്രമിച്ചു കടന്നതായി ഡൽഹി പോലീസ് പ്രസ്താവനയിൽ വ്യക്തമാക്കി.
സംഭവവികാസങ്ങളോട് പ്രതികരിച്ച സി.ജെ.പി സ്ഥാപകൻ അഭിജീത് ദീപ്കെ, വിയോജിപ്പുകളെ അടിച്ചമർത്തുന്നുവെന്ന് ആരോപിച്ച് കേന്ദ്രസർക്കാരിനെതിരെ വിമർശനം ഉന്നയിച്ചു.
Comments