കമല്‍ സംവിധാനം ചെയ്ത് 2018ല്‍ പുറത്തിറങ്ങിയ ചിത്രമാണ് ആമി. പ്രശസ്ത എഴുത്തുകാരി കമലാസുരയ്യയുടെ ജീവിതകഥ ആസ്പദമാക്കി ഒരുക്കിയ ചിത്രത്തില്‍ മഞ്ജു വാര്യര്‍ ആയിരുന്നു നായിക. ആദ്യം വിദ്യാബാലനെ ആയിരുന്നു സിനിമയിലേക്ക് പരിഗണിച്ചിരുന്നത്. വിദ്യാബാലന്‍ പിന്മാറിയ ശേഷം നയന്‍താരയെ നായികയാക്കാന്‍ ആലോചിച്ചിരുന്നുവെന്ന് പറയുകയാണ് സംവിധായകന്‍ കമല്‍. വനിതക്ക് നല്‍കിയ അഭിമുഖത്തിലാണ് കമലിന്റെ പ്രതികരണം.
‘വിദ്യാ ബാലൻ പിന്മാറിയതോടെ ആമിയിലേക്ക് ആര് എന്ന ചോദ്യമായി. പല പേരുകളും പരിഗണനയിലുണ്ടായിരുന്നു. സിനിമയ്ക്കായി നിർമാതാവ് വലിയൊരു തുക ചെലവഴിച്ചു കഴിഞ്ഞിരുന്നു. സാറ്റ്ലൈറ്റ് വിൽപന ഉൾപ്പെടെയുള്ള ബിസിനസ് നടക്കണമെങ്കിൽ പേരുള്ള ഒരു താരം തന്നെ നായികയായി വരണമായിരുന്നു ചിത്രത്തിലേക്ക്. അങ്ങനെയാണ് നയൻ‌താരയിലേക്ക് എത്തുന്നത്. മേക്കപ് ടെസ്റ്റും കഴിഞ്ഞു. പക്ഷേ, ആ കഥാപാത്രത്തെ അവതരിപ്പിക്കാനുള്ള ആത്മവിശ്വാസമില്ലെന്ന് നയൻതാര പറഞ്ഞു. എനിക്കും മാധവിക്കുട്ടിയായി നയൻതാരയെ സങ്കൽപ്പിക്കാൻ കഴിഞ്ഞിരുന്നില്ല.
അപ്പോഴും ആമിയുടെ നായിക ആരെന്ന കാര്യത്തിൽ തീരുമാനമായിരുന്നില്ല. നായികയെ തീരുമാനിക്കാൻ കഴിയാത്തതോടെ ചിത്രീകരണം അനിശ്ചിതമായി നീട്ടിവയ്ക്കേണ്ടിവന്നു. ഇതുപോലൊരു സാഹചര്യം തന്റെ സിനിമാജീവിതത്തിൽ ആദ്യമായിരുന്നു. അങ്ങനെ ചർച്ച ഒടുവിൽ മഞ്ജുവിലേക്ക് എത്തുകയായിരുന്നു. പ്രൊഡ്യൂസർ ആ പേരിൽ ഉറച്ചു. മഞ്ജുവിന് അത് എളുപ്പത്തിൽ അവതരിപ്പിക്കാൻ സാധിക്കുമെന്നുള്ള വിശ്വാസം തനിക്കുണ്ടായിരുന്നു. മഞ്ജുവിനെ വിളിച്ചപ്പോൾ ‘വിദ്യാബാലൻ പിന്മാറിയല്ലേ’ എന്നായിരുന്നു എന്നായിരുന്നു മഞ്ജുവിന്റെ ആദ്യത്തെ ചോദ്യം,’ കമൽ കൂട്ടിച്ചേർത്തു.
Comments