കമലിന്റെ സംവിധാനത്തില്‍ പുറത്തിറങ്ങി മലയാളികള്‍ക്ക് ഏറെ പ്രിയപ്പെട്ട ചിത്രങ്ങളിലൊന്നാണ് ' അഴകിയ രാവണന്‍' . ശ്രീനിവാസന്‍ തിരക്കഥയെഴുതി 1996ല്‍ പുറത്തിറങ്ങിയ ചിത്രത്തില്‍ മമ്മൂട്ടിയാണ് കേന്ദ്ര കഥാപാത്രത്തെ അവതരിപ്പിച്ചത്.
മമ്മൂട്ടിയുടെ കരിയറിലെ തന്നെ വ്യത്യസ്തമായ വേഷങ്ങളിലൊന്നായിരുന്നു ' അഴകിയ രാവണ' നിലെ ശങ്കര്‍ദാസ്. ഇപ്പോഴിതാ ശങ്കര്‍ദാസ് എന്ന കഥാപാത്രമാകാന്‍ മമ്മൂട്ടിയെ തന്നെ തിരഞ്ഞെടുത്തതിന്റെ കാരണം വ്യക്തമാക്കുകയാണ് സംവിധായകനായ കമല്‍. മോഹന്‍ലാലിനെ കൊണ്ട് ചെയ്യിക്കാമായിരുന്നു എന്ന് പലരും പറഞ്ഞിരുന്നു. എന്നാല്‍ അതില്‍ പുതുമയുണ്ടാകില്ല എന്നാണ് കമല്‍ പറയുന്നത്. ദ് ഷോ സ്‌കേപ്പ് ജേണലിന് നല്‍കിയ അഭിമുഖത്തില്‍ സംസാരിക്കുകയായിരുന്നു അദ്ദേഹം.
"അഴകിയ രാവണ'നിലെ ശങ്കര്‍ ദാസിനെ മോഹന്‍ലാല്‍ അവതരിപ്പിക്കുമ്പോള്‍ അതിലൊരു പുതുമയില്ല. മമ്മൂട്ടി അവതരിപ്പിച്ചതു കൊണ്ടാണ് അതിലൊരു പുതുമ വരുന്നത്. പൊങ്ങച്ചക്കാരനായിട്ടുള്ള താനാണ് വലുതെന്ന് വിചാരിക്കുന്ന കഥാപാത്രമായിരുന്നു അത്. ആ കാലത്ത് മമ്മൂട്ടിയുടെ ഒരു ഇമേജ് അങ്ങനെയാണെന്ന് എല്ലാവരും പറഞ്ഞുണ്ടാക്കിയിട്ടുണ്ടായിരുന്നു. അതൊരു പരദൂഷണമായിട്ടാണ് എനിക്ക് തോന്നുന്നത്. യഥാര്‍ത്ഥത്തില്‍ പുള്ളി അങ്ങനെയൊന്നുമല്ല.
അദ്ദേഹം വളരെ ശുദ്ധനായിട്ടുള്ള ഒരു മനുഷ്യനാണ്. വേദനിക്കുന്ന കോടീശ്വരനായിട്ട് അദ്ദേഹം അഭിനയിക്കുകയായിരുന്നു. ഞങ്ങള്‍ ഈ കഥ ഉണ്ടാക്കി ആദ്യം കേള്‍പ്പിച്ചത് പ്രൊഡ്യൂസറെ ആയിരുന്നു. ഈ കഥാപാത്രത്തിന് നല്ലത് മോഹന്‍ലാല്‍ അല്ലേ എന്ന് അദ്ദേഹം ചോദിച്ചു. മമ്മൂട്ടിയെ ആ കാരക്ടറായിട്ട് ആര്‍ക്കും അംഗീകരിക്കാൻ പറ്റിയിരുന്നില്ല". - കമൽ പറഞ്ഞു.
Comments